كل فتاه تحلم بأن تكون أميرة ذات مكانة عالية يحبها الناس جميعاً
إليك بعض البنود التى جمعتها بنفسى لأن من خلالها ستكونى أميرة حقيقية :
١- إستيقظى من النوم بنشاط وأفتكرى دايما أول ما تصحى من النوم أى ذكرى سعيدة حصلتلك وإبتسمى وخلى عندك أمل وتفاؤل أن يومك هيكون ممتاز.
٢- داومى على الأذكار فى كل فترات يومك من الصباح للمساء ؛ لإن الأذكار بتملأ قلبك بالطمأنينة وبتخليكى تحسى أن دايما فى جانب الله وده أعظم شئ يخليكى تحسى بالثقة فى نفسك.
٣- أرجووكى كفاية تبعتى لنفسك رسائل سلبية على غرار ( أنا شكلى وحش - ايه الوش ده - أنا عمرى ما هنجح - حياتى زفت - محدش بيحبنى - إلخ...).
٤- إتبسطى بحياتك سواء كنتى متزوجة أو عزباء ، بتتشتغلى أو لأ و أياً كانت ظروفك إسعدى نفسك بأبسط الطرق.
٥- عاملى نفسك كالأميرات ، مش لازم يكون عندك لبس غالى أو ميكب ماركة معروفة وغالية لإن خطواتك الواثقة من نفسها وإنتى ماشية وإحترامك لنفسك و رقتك هى العامل الأساسى اللى هتظهرك زى الأميرات و تزود ثقتك بنفسك.
٦- إذا غلطتى فى حق حد أو تطاولتى بالكلام عليه فى وقت عصبية إعتذرى فى أقرب وقت ممكن ، لأن مش مهم تظهرى بمظهر المسيطرة فى النقاشات والجدال لكن الأخلاق الحقيقية بتكمن فى الإعتذار وقت الغلط والحكم الصحيح على الأمور.
٧-إذا كنتى فى مدرسة أو جامعة أو خريجة زودى ثقافتك دايما عن طريق القراءة والإطلاع على كل ما هو جديد فى العالم ولا تكتفى بما يقدم فى المدارس والجامعات فقط كعلم ؛ لإن القراءة بتوسع المدارك وبتفتح سٌبل جديدة للعقل أنه ينمو ويفكر ويعيد التفكير فى كل قراراته وبتزود حكمة الإنسان .
٨- عاملى صديقاتك دايما برفق وحب ، كتير بنشوف بنات بيهزروا مع صديقاتهن بهزار نقدر نقول عليه ( ثقيل ) ، ودى من العوامل الرئيسية اللى هتخلى الناس تبعد عنك وهتخليكى تحسى بالذنب
٩- إختارى صديقاتك بعناية ولا تندمجى مع أى شخصية تقابلينها بسهولة ، فمثلاً حددى بنود معينة للصديقة الجيدة مثل إنها تكون حسنة الأخلاق و لا تلفظ بكلام بذئ و رقيقة وليست فظة .. أظن أن هذا يكفى لخلق صداقة جيدة
١٠- خليكى إنسانة معطاءة ، والعطاء اللى أقصدة بيشمل إعطاء الإهتمام لأسرتك وصديقاتك و إعطاء الصدقات للمحتاجين ، إعطاء نصائح جيدة تٌرضى الله لمن هم فى حاجة لها وبالتالى أنا أقصد العطاء المادى والمعنوى
١١- لا تجعلى نفسك من فئة ( البنات العصبية ) لأن عصبية البنت وصوتها العالى بتفقدها جمالها كله وحتى لو طبقت كل الشروط السابق ذكرها على نفسها ، العصبية لحظة ولكنها بتفرق كتير ... إذا واجهك موقف سيئ استغفرى ربنا كتير وأجلى الكلام لحد ما شعور العصبية يروح وتقدرى بعدها تتناقشى فى هدوء
١٢- إكرمى نفسك دائما بهدايا صغيرة كمكافأة ليكى على أى عمل جيد قمتى به سواء مساعدة شخص ، الإنتهاء من قراءة القرآن ، توصلتى لحل لمشكلة ما ... فأى شئ كبر أو صغر تقدرى تكافئى نفسك عليه بقطعة شيكولاتة أو وردة مثلا.
١٣- ليس معنى أن تعاملى نفسك كأميرة أن تتصرفى بنوع من الإتكال على الغير .. إحذرى ! .. ده أكبر خطأ ، لازم تعتمدى على نفسك وتساعدى أهلك وأصدقاءك حتى وإن لم يطلبوا لإن ده من نبل الأخلاق ونبل الأخلاق من الصفات الأساسية للأميرات!
١٤- لا تجعلى ثقتك بنفسك تصل لحد الغرور .. إحذرى مرة أخرى! فهناك خط رفيع بين الثقة بالنفس والغرور... ولأننا كلنا نفس بشرية قد نشعر للحظة بالتفاخر على الأقل فلذلك علاج وهو؟؟ فى الخطوة رقم ١٥
١٥- إقرأى القرآن يومياً ما تيسر منه وتذكرى أن الله هو العلى القدير فوق الجميع وإذا شعرتى بأى تفاخر عليكى قراءة الآية ( إن الله لا يحب كل مختال فخور ) مراراً وتفكرى فى عظمة خلق الله وأنه لا داعى حتى للشعور بالفخر لأى شئ لأن كل ما رزقك الله به هو نعمة من عنده فقط.
١٦- إهتمى بجمالك كأى فتاه أخرى ولا تبالغى فى ذلك ، فيكفى أن تحافظى على نظافتك الشخصية وعلى جمال شعرك وبشرتك وجسدك وكل ذلك فى الحدود الطبيعية لأن المبالغة فى ذلك سيجعلك مهووسة وستدخلين دوامة ل تنتهى.
ده اللى قدرت أوصله بعد تفكير مع نفسى ، والكلام ده مش منقول طبعاً ... لو عندكم أى إضافات راسلوا المدونة هنا وأنا هقرأ أولا بأول ..
ليست هناك تعليقات:
إرسال تعليق