تجربتى الشخصية فى العناية بالشعر

فى بوست النهاردة هتكلم عن العناية بالشعر بشكل كامل من الألف للياء وده كله من تجربتى الشخصية وحاجات جربتها بنفسى ومش منقولة من أى موقع تانى وهتكلم عن الحاجات المفيدة والضارة للشعر و إزاى بعتنى بيه من غير أى تعب طبعا فى بنات كتير هدفها أن شعرها يبقى تقيل وناعم جدا مهما أختلفت الأذواق بين الشعر الطويل والقصير فأنا هنا هتكلم عن تطويل الشعر وتنعيمه والحفاظ عليه كمان بالشكل ده على طول
أولا أنا كان شعرى هايش جدا وطبيعته صعبة فعلا وفى يوم قررت الإهتمام به وللصراحة أتحول 180 درجة وبقا رائع D:

إزاى اعتنيت بشعرى؟
أنا جربت وصفات كتير جدا و هكتبها هنا بالتفصيل زى ما عملتها بالضبط وكمان طريقة تمشيط الشعر وهتكلم عن الحاجات اللى لازم نبعد عنها تماما علشان صحة الشعر والحاجات اللى المفروض نعملها 
و كمان عايزة أنبه لنقطه مهمة وهى أن طريقة الإعتناء بالعر فى الشتاء بتختلف عن الصيف تماما
فمثلا فى الشتاء أنا عن نفسى بفضل إستخدام الزيوت و فى الصيف بنوع بين حمامات الكريم والزيوت لأن شمس الصيف والحر عموما بيخلى الشعر جاف سواء بنت محجبة أو مش محجبة لكن الشتاء عكس كدة مش بحتاج كريم للشعر على أد ما بحتاج زيت

العناية بالشعر فى الشتاء :
فى البداية كدة أنا بدأت بعمل وصفات طبيعية لأنى على طول بميل لكدة فبدأت بخلطة زيت جوز الهند و الزيتون

المكونات :
- زيت جوز هند و زيت زيتون من العطار وكل واحد فى زجاجة لوحده

الطريقة : 
1- يتم خلط نوعين الزيت فى إناء عميق جيدا و تدفئتهم على النار بشكل بسيط جدا .. ( يعنى الزيت يكون دافئ مش ساخن )
2- نتأكد من أن الشعر خالى من أى زيوت أو كريمات ثم يدلك الشعر بالخليط بداية من فروة الرأس و حتى اطراف الشعر بشكل غزير و لمدة 5 دقايق كاملة ( مساج للشعر وفروة الرأس)
3- يمشط الشعر بهدوء 30 مرة مع تأكد وصول اسنان المشط أو الفرشاه لجلد الرأس
4- يعقد الشعر للخلف على شكل كحكة و لمدة 3 ساعات
5- يغسل الشعر جيدا بالشامبو 
6- يسرح الشعر ويدهن بكريم مرطب يتناسب مع نوع الشعر

الوصفة دى انا عملتها لمدة 6 أشهر ... فى البداية 3 مرات فى الأسبوع لمدة 3 أشهر وبعد كدة مرتين فى الأسبوع 3 أشهر تانيين!
فى الحقيقة دى كانت اول حاجة عملتها و فرقت تماما مع شعرى و بتخليه ناعم وطبعا بيتقل لأن بصيلات الشهر بتتغذى و بتنمو أسرع وبغزارة أكتر

ملحوظة مهمة جدا : زيت جوز الهند الأصلى فى الشتاء بيكون مجمد تماما لإن دى طبيعته و لو حد عرضه للبيع فى الشتاء وهو سائل إعرفى فورا إنه مخلوط بزيت جرافين ومش طبيعى !

زيت هندى :
بعد كدة بدأت أتجه لأنواع أخرى من الزيوت و كتجربه شخصية أنصح بزيت (ترشوب)
أنا طبعا شفت إعلان عنه وبس فقررت أجرب فى نفسى و يا نجحت يا منجحتش لكن الحقيقة من روعة الزيت ده فضلت أستخدمه 5 سنوات لحد دلوقتى مرتيين فى الأسبوع

الطريقة : 
1- نتأكد من أن الشعر غير مدهون بأى كريم أو زيت أخر و يدلك الشعر بزيت ترشوب جيدا من فروة الرأس وحتى الأطراف
2- يمشط الشعر 30 مرة على كل الجوانب و يعقد على شكل كحكة لمدة 5 ساعات 
3- يغسل الشعر بالشامبو جيدا 
4- يمشط الشعر بدون وضع أى شئ عليه
 ملحوظة : من تجربتى الشخصية أن الزيت ده له رائحة الأعشاب و يبقى أثرا له فى الشعر ليومين حتى بعد غسله بالشامبو فمفيش داعى للقلق و أنى أغسل شعرى أكتر من مرة بالشامبو لأنى كدة هدمره

وصفة تانية بعد إعلان شوفته فى التليفزيون :و بما إنى بحب أتفرج على قنوات الأفلام الهندية فلقيت إعلان عن زيت تانى وقررت أخوض المغامرة دى تانى بما إنى بجرب فى نفسى وكانت النتيجة إنه من أروع أنواع الزيوت اللى إستخدمتها على الإطلاق ( زيت كيشور دهنى )
ايوه هو إسمه كدة D:
الزيت ده بيستخدم كعلاج للشعر و مينفعش بأى حال من الأحوال أستخدمه بطريقة غير اللى هقولها حالا ودى الطريقة اللى مكتوبة فى ورقة جوه علبة الزيت نفسها

الطريقة :
1- يتم تفريغ زجاجة الزيت كاملة فى أى برطمان قديم 
2- يضاف إليه 100 مل زيت زيتون 
3- يرج البرطمان جيدا جدا حتى يخطلط نوعين الزيت معا
4- نتأكد من أن الشعر غير مبلل و خالى من أى نوع كريم او زيت أخر ثم ندهن الشعر بالخليط جيدا و ندلك فروة الرأس به لمدة خمس دقائق كل يوم وحتى تنتهى الكمية كلها
5- يمشط الشعر جيدا صباحا ومساءا 30 مرة و نربطه على شكل كحكة

طبعا زى ما قلت قبل كدة كل الحاجات دى انا جربتها بشكل شخصى فى نفسى الأول فمفيش داعى للقلق ابدا من أى مكون لكن المهم اننا نستخدمه صح

إتجهى إلى المطبخ فورا D:
العنوان اللى بيضحك ده له فوايد والله مش بهزر 
طب إيه هى؟
إحنا عارفين إن من أشهر أنواع الزيوت عندنا فى المطبخ واللى بنستخدمهم فى الطهى هما ( زيت الذرة و زيت دوار الشمس )
إحنا ممكن نحطهم ماسك على شعرنا و بيعطوا نتيجة هايلة وخصوصا زيت الذرة اللى بيعالج القشرة 
هنستخدمهم إزاى؟
بنفس الطريقة اللى فاتت بالضبط و لكن كل نوع زيت على حدى و بلاش نخلطهم مع بعض

العناية بالشعر فى الصيف :فى الصيف الشعر بيتعرض للشمس أو حرارة الجو عموما ( حتى لو محجبة ) و ده بيخليه مجهد و مقصف ... علشان كدة بفضل إستخدام الكريمات أكتر من الزيوت فى الصيف على عكس الشتاء لكن كمان ممكن نستخدم الزيوت فى الصيف لكن بطريقة مختلفة شوية

حمام الزيت والكريم بطريقة مختلفة: بعد ما ندهن الشعر بالزيت بنفس الخطوات اللى قولنا عليها فوق مش هنعمله على شكل كحكة
1- يتم تدليك الشعر بالزيت جيدا من فروة الرأس وحتى أطراف الشعر
2- يمشط الشعر جيدا 30 مرة على كل الجوانب
3- نقوم بتسخين مياه فى إناء عميق ونضع فيه فوطه ثم نخرج الفوطة و نعصرها بشكل خفيف
4- إنحنى إلى الأمام و قومى بلف الفوطة على الشعر بأكمله
5- يتم تسخين الفوطة مرة أخرى فى كل مرة تبرد فيها
6- نكرر العملية لمدة ساعة كاملة ثم نقوم بغسل الشعر بالشامبو جيدا وتصفيفه بعد ذلك

ملحوظة : نقوم بنفس الخطوات السابقة فى حالة إستخدام حمام الكريم مع مراعاه إختيار نوع حمام الكريم المناسب للشعر ( أنصح بحمام كريم تريشوب وهو نفس نوع الزيت اللى اتكلمنا عنه قبل كدة)

الحناء: بفضل دايما إستخدام الحناء فى فصل الصيف و ده لسبب بسيط بعيدا عن الشعر خالص وهو إن طريقة إستخدامها مش متناسبة مع برد الشتاء وممكن تسبب صداع و برد فعلشان كدة فى الصيف الوضع بيكون أفضل
وهتكلم بردو عن طريقة إستخدام الحنة فى تلوين الشعر و تغذيته زى ما أنا شخصيا عملت ونجحت معايا التجربة و أصبحت الحناء جزء لا يتجزأ من روتين الصيف

المكونات:   حناء حسب كثافة الشعر - علبة زبادى - ليمونة - ماء دافئ
الطريقة :
1- فى إناء عميق يتم وضع بودرة الحناء و يضاف إليها الزبادى و نعصر حبة الليمون
2- نخلط المكونات معا بعد تقلب جيد جدا
3- يضاف ماء دافئ بالتدريج حتى تصبح العجينة مثل قوام الطحينة
4- نتاكد من أن الشعر جاف وغير مبلل و غير مدهون بأى زيت أو كريم
5- نقسم الشعر 4 أجزاء متساوية و نستخدم فرشاه دهن لتوزيع الحناء على الشعر كله من فروة الرأسى إلى الأطراف مع مراعاه عدم ترك أى جزء لا تصل الحناء له
6- نترك الحناء على الشعر 7 ساعات و حتى تجف تماما
7- يغسل الشعر بماء دافئ جيدا للتخلص منها تماما

ملحوظات حول إستخدام الحناء :
1- بفضل شخصيا إستخدام حناء ( الكابتن ) أو حناء أسوانية ذات جودة عالية ومن عطار موثوق به
2- يفضل فرد فوطة جافة على الظهر حتى لا تترك بقعا ملونة على الملابس
3- لإستخدام الحناء فى تلوين الشعر بالأحمر نضع مع الخليط السابق ملعقتين كبيرتين ( بودرة دم الغزال ) مع مراعاه شراء حناء للتلوين بالشعر الأحمر من البداية
4- للتلوين بالشعر الأصفر نستخدم ملعقتين كبيرتين من الكركم مع الخليط السابق مع شراء حناء للشعر الكستنائى
ملحوظات هامة جدا لصحة الشعر :
1- إبتعدى تماما عن إستخدام الصبغات لإنها بتحرق بصيلة الشعر وبتقصفه لأن كلها مواد كيميائية و إستخدمى الحناء بدلا منها
2- يجب تمشيط الشعر بالطريقة اللى قولناها قبل كدة مرتين فى اليوم ( مرة صباحا ومرة مساءا)
3- تناول الوجبات الصحية والمفيدة و التى تحتوى على البروتينات مثل البيض واللبن و الفيتامينات مثل أنواع الخضار والفاكهه المختلفة
4- إستخدمى شامبو للأطفال بدلا من شامبو عادى لأن شامبو الأطفال فيه مواد كيميائية أقل وده هيحافظ على الشعر أكتر
5- إوعى تستخدمى أى نوع من الزيوت الهندية إلا لو عرفتى طريقة إستخدامها لأن الزيوت دى بتوصف فى الهند كعلاج ومينفعش أستخدمها أكتر من المرات المحددة أو اتركه على الشعر لعدد ساعات أكتر من المطلوب .. وكمان مينفعش أخلط نوعين من الزيوت الهندية ببعض لأن كل واحد منهم له خواص و طريقة إستخدام مختلفة
6- إوعى تستخدمى مكواه فرد لشعر إلا فى أضيق الحدود أو فى المناسبات الخاصة فقط لأنها طبعا بتتلف الشعر مهما كانت جودتها أو ماركتها
7- بعد تمشيط الشعر بالليل وقبل النوم إستخدمى ربطة شعر ( توكة ) خفيفة وكمان إربطى شعرك بشكل خفيف لأن شد الشعر بيضعفه و بيؤدى لتساقطه على المدى البعيد
8- إتركى شعرك حر قبل النوم بساعة بدون أى ربطات للشعر لأن ده بيعمل على تهويته 
9- لا تستخدمى حمام الكريم كدهان للشعر بعد غسله بدلا من الكريم لأن حمام الكريم لو استخدمناه بطريقة غير اللى كتبتها .. بينشف الشعر جدا وممكن يسبب قشرة !!