ما هو التأمل وكيف نتأمل؟

ايه أول حاجة بتيجى فى بالكم أما أقول تأمل؟

يمكن أغلب الناس بييجى فى بالها صورة واحد سرحان مثلاً ، طيب الموضوع ده له فايدة؟
الموضوع ده قصة كبيرة جداً وله أهمية كبيرة وده اللى عايزة أحكى عنه النهاردة.
فى البداية أنا هعترف أنى بمارس التأمل من أيام ما كنت فى ثانوى يعنى من 9 سنين كدة !!
بس من باب الصدفة لا أكثر أنى عمرى ما إتكلمت مع حد عن الموضوع ده أو قلت إنى بعمل كدة ولا حتى اتكلمت عن فوايد التأمل ولا بعمله إزاى!!
لكن أما بدأت المدونة حاولت أفكر فى كل حاجة ممكن أشاركها مع الناس تفيدهم وأعرف رأيهم فيها وأستفيد منهم كمان ، فعلشان كدة لما فكرت فى عاداتى اللى بعملها من وقت للتانى جه فى بالى التأمل وهو من العادات اللى مش بتكلف الإنسان أى حاجة خالص لكن بتتحكم فى نفسية الإنسان ليوم كامل ، يعنى مثلاً لو تأملت الصبح أول ما بصحى من النوم بيفضل تأثير الموضوع لنهاية اليوم

يعنى إيه تأمل؟
أنا مش بعرف أعرف الحاجة إلا من منظورى الشخصى فكل الكلام اللى هقوله فى الموضوع ده نتيجة تجربتى الشخصية بس .
التأمل هو حالة فريدة بيدخلها الإنسان بإرادته بيحول إنتباهه تماماً لشئ من إيجابى من نسج خياله وبينفصل عن الواقع المحيط بيه ذهنياً وجسدياً لفترة قصيرة و لازم يكون فى شروط معينة عشان يتم الموضوع بشكل صحيح.

إزاى ممكن أمارس التأمل؟
الموضوع بسيط جداً وممكن تنفيذه فى البيت لأنى مش هحتاج غير حاجة واحدة بس
مش هتصدقونى إيه هى؟
خيال جامح.
أيوه بالضبط أنا مش محتاجة حاجة غير خيال بس ، فى البداية يجب الجلوس بوضعية القرفصاء أو كما تسمى ( زهرة اللوتس ) زى اللى فى الصورة كدة وأغمض عينى و لازم مفكرش فى أى حاجة خالص نهائى ، مجرد إسترخاء
مع أخذ شهيق و زفير عميق ، ويفضل أكون لوحدى فى البيت لتوفير الهدوء
وبعدين؟
لازم أتخيل الطاقة السلبية بلون معين مش بحبه ( اختاروا لون مش بتحبوه ) و الطاقة الإيجابية بلون تانى بحبه ( أختاروا اللون اللى بتحبوه ) ومش محتاجة أقول انا أخترت لون ايه يمثل الطاقة الإيجابية طبعا D: !!
بعد ما بجلس القرفصاء وبغمض عينى بتخيل ( فى دماغى بس ) أن هواء الشهيق اللى بتنفسه بلون الطاقة الإيجابية وليكن ( أزرق ) وهواء الزفير اللى بخرجه بلون الطاقة السلبية وليكن ( أحمر )
أفضل أتخيل لمدة دقيقة كاملة على الأقل أنى بتنفس شهيق أزرق و أتخيله أوى أنه هوا نقى وجميل وإيجابى وبخرج زفير ( من الفم ) لونه أحمر وبخرج معاه مشاكل وضغوط وأفكار سلبية و يفضل لو أنا قريبة من شباك أو قاعدة جنب شباك أتخيل أن هواء الزفير بيخرج منه بعيد عن البيت تماماً كإنه ماشى فى مسار ناحية الشباك عشان يخرج بره.
و بعد الدقيقة ما تخلص أتخيل أن جسمى كله بلا إستثناء أتملى من لون الطاقة الإيجابية و بقا كله لونه أزرق تماماً و أتخيل العمود الفقرى وهو بيتحول للون الطاقة الإيجابية اللى أختارته.
و لكن أحذر !!!
تشتت الإنتباه هنا ممنوع تماماً وحتى ممنوع أفتح عينى طول مدة التمرين ولازم أفضل مغمضة.
علشان كدة بقول أن لازم يكون فى خيال جامح لأن فى ناس طبعاً هتفتكرنى مجنونة وتقول إزاى أتخيل الكلام ده؟!

و بعد كدة ابدأ أتخيل صورة إيجابية عن نفسى ، أنا شكلى كذا و لابسة كذا وشعرى شكله كذا . أتخيل كل حاجة عن الصورة اللى نفسى أكون عليها
حتى أتخيل المكان اللى انا فيه مع إستمرار الشهيق والزفير بشكل متوازن وببطئ.
فى البداية ممكن أزهق بسرعة أو أحس بالملل وأن ده كله كلام فاضى و أقوم بسرعة لكن مع الوقت هحس بثبات وقلة تشتيت و سلام نفسى وصفاء ذهن كبيرين

نصائح عن ممارسة التأمل :

1- يستحسن إرتداء ملابس واسعة ومريحة
2- يفضل تعطير المكان بعود بخور ( إختيارى )
3- ( للبنات ) بلا ش يكون شعرى مشدود زيادة عن اللزوم
4- دى حاجة بردو إختيارية لكن أنا بحب أعملها ، بسمع موسيقى خاصة بالتأمل من ابلكيشن عندى على الموبايل إسمه Meditation Music و دى صورته

أول ما تحملوا الأبلكيشن هتلاقوا شكله كدة من جوه

هتلاقوا أسماء زى : جنة ، صباح رائق ، عزف رقيق للبيانو ، أمطار ، إلهام ، غابة خريفية ، إسترخاء على البحر و هكذا
كل بند من دول له أصوات معينة وممكن أضيف أصوات عجبتنى مثلا فى صوت البحر على صوت شروق الشمس أو أخلط الأصوات ببعضها على حسب ذوقى.
الأبلكيشن ده ممتاز حقيقى بيساعد جدا الإنسان على دخول عالمه الخاص ، بس هو مش أساسى يعنى اللى يحب يستخدمه بس وعايز يعرف تفصيل أكتر يبعتلى كومنت هنا على المدونة ونتكلم عنه بالتفصيل
و الحقيقة أنا جربت أستخدم أكتر من أبلكيشن بس ده أفضلهم

5- و دى أهم نقطة بقا على الإطلاق أنى مشغلش نفسى أبدا إذا كنت بطبق القواعد دى كلها صح ولا لأ ، لأنى زى ما قلت فى الأول بحكى عن تجربتى الشخصية لكن التأمل فى حد ذاته ملوش قواعد
ممكن أقعد فى أى وضعية أو فى أى مكان فى البيت حسب راحتى النفسية.

فوائد التأمل :
 مع الوقت هلاقى ذهنى صافى و هيكون عندى حكمة وتفكير فى الأمور على مهل أكتر وتعامل أحسن بكتييير مع المواقف السلبية فى الحياه والتعامل مع الناس.
و أفتكر دايماً أن التأمل مش هيلغى السلبيات اللى فى حياتك لكن هيخليك تتعامل معاها بشكل أحسن