بمناسبة أن وزارة الشباب و الرياضة فتحت باب الحجز لرحلة الأقصر و أسوان تانى
فحبيت أتكلم عن أيامى فى الأقصر و أسوان إزاى قضيتها؟
و ايه هو برنامج الرحلة؟
كنت كتبت قبل كدة موضوع عن إتعلمت ايه من رحلة الأقصر و أسوان لكن المرة دى هتكلم عن البرنامج اليومى الرائع للرحلة
أولاً أنا سافرت يوم 22 فبراير 2019 و السفر كان بالليل
كنت فى محطة القطارات الساعة 9 و القطار قام الساعة 11 بالضبط
فى البداية أول ما توصلوا لمحطة القطارات بتسألوا عن الرصيف المتجه للصعيد و بتدوروا فى المحطة عن مشرف الرحلة اللى تبع وزارة الشباب و بتفضلوا معاه عشان تركبوا مع الرحلة فى نفس القطار و محدش يتوه
بعد ما تركبوا القطار بترتبوا شنطكم فى المكان المخصص ليها
هتحتاجوا و انتم فى القطار النظارة السوداء القماش اللى بتساعد على النوم لأن إطفاء النور فى القطار ممنوع و ده لقواعد السلامة و خصوصاً أن السفر بالليل
و هتحتاجوا مخدة الرقبة الهوائية لأنكم بطبيعة الحال هتناموا و تقوموا كتير و عشان تكون الرحلة مريحة
بعد كدة القطار هيتحرك بهدوء الأول لحد الفيوم و بعدين بياخد سرعته الطبيعية و الرحلة بتكون ممتعة جداً فعلاً
قطار وزارة الشباب نظيف و مريح فمفيش مشكلة فى النقطة دى
بعد شوية هيمر رجل بيبيع أكل و مشروبات لو حد محتاج يشترى منه
اليوم الأول
هتوصلوا الأقصر تانى يوم حوالى الساعة 8 و نص أو 9 صباحاً و أول ما بتخرجوا من القطار بتلاقوا اتوبيسات وزارة الشباب مستنياكم قدام المحطة و هى اللى هتنقلكم طوال الرحلة من و إلى أى مكان
 |
| من داخل القطار وقت الشروق قبل وصول الأقصر بنص ساعة |
المدينة الشبابية حوالى 4 أدوار و مُجهزة زى فنادق ال 5 نجوم بالضبط و مريحة و نظيفة جدا جدا
كل مجموعة بتسكن مع بعضها فى الغرفة بحد أقصى 4 أفراد فى الغرفة الواحدة و كل غرفة ليها حمام خاص بها و ثلاجة و تليفزيون (مش هتحتاجوا تفتحوا التليفزيون لحظة)
 | |
|
 |
| حديقة المدينة الشبابية |
وبالنسبة لإستلام الوجبات هتاخدوا كوبونات مكتوب فيها إفطار اليوم الأول - إفطار اليوم الثانى و هكذا... و نفس الطريقة للغدا و العشا عشان تستلموا الوجبات دى حافظوا على الكوبون كويس.
 |
| إفطار أول يوم كان فى الغرفة وسط الأصدقاء |
 |
| كوبونات إستلام الوجبات |
بعد ما بتفطروا بترتاحوا شوية فى غرفكم و بتبدأوا تتعرفوا على زمايلكم فى الغرفة و اللى أنتو بتكونوا مختارينهم من الأساس من خلال تعارفكم فى القطار
فحاولوا تختاروا أشخاص تشبهكم أو مرتاحين فى التعامل معاهم
بالنسبة لى الرهبة بتاعة السفر راحت أول ما قعدت مع البنات و فطرنا سوا و إتعرفنا على بعض
بعد فترة بتنزلوا تستلموا وجبة الغذاء و بتكون فى المطعم نفسه
حوالى الساعة 6 أو 7 حسب ما المشرف يقرر ممكن تناموا أو تهزروا أو أى حاجة و بعدين تجهزوا نفسكم لأول خروجة و المشرف بيقولكم تتجمعوا قدام الباص فى وقت معين (بيعلن عنه فى مايكروفون الريسبشن)
بتركبوا الباص و بتروحوا معبد الكرنك بيكون بعد الغرب عشان تحضروا عرض الصوت و الضوء و ده عرض مميز جداً بتكون الدنيا ليل تماماً و بتيم توجيه الضوء على كل تمثال فى المعبد و بتسمعوا صوت جهورى كأن التمثال بيتكلم
 |
| قبل عرض الصوت و الضوء بلحظات |
 |
| أثناء عرض الصوت و الضوء |
بعد كدة بتتوجهوا لمسرح داخل المعبد نفسه قدام بحيرة آمون المقدسة و بتسمعوا عرض كامل لقصة المعبد من الصوت و الضوء
 |
| مسرح المعبد من أمام بحيرة آمون |
فى النهاية بتتوجهوا للباص تانى و بترجعوا المدينة الشبابية ، كان فى محاضرة تثقيفية و توعوية للشباب فى وقت رحلتى أنا فأتجهنا لمسرح المدينة و ألقى الدكتور (سمير غنيم) محاضرة ممتازة إستفدنا منها كتير
بعد كدة بتستلموا وجبة العشاء و بتناموا
اليوم الثانى
لازم تدربوا نفسكم على الإستيقاظ بدرى لأن الإفطار من الوقت ده هيكون الساعة 7 صباحاً بالضبط
 |
| إفطار أول يوم و ده مثال أن شكل الفطار بيكون كدة |
هتنزلوا تفطروا فى المطعم و مجهزين نفسكم لأنكم هتخرجوا من المطعم على الأتوبيس على طول مفيش طلوع للغرف تانى دلوقتى
هتتجهوا لمعبد الكرنك تانى بس بما أن الوقت صباحاً فمفيش عرض صوت و ضوء و هتشوفوا كل الآثار فى وضوح النهار و هيكون معاكم مرشد سياحى هيعرفكم على كل حاجة و يشرح الآثار دى و لازم تكونوا معاه فى الأول و هو بيشرح و بعد كدة هيترك لكم باقى الوقت كله جولة حرة مع صحابكم تتفرجوا على كل حاجة تانى
 |
| معبد الكرنك و طريق الكباش |
 |
| أعمدة معبد الكرنك |
 |
| أعمدة معبد الكرنك |
 |
| طريق الكباش |
 |
| سقف جزء من معبد الكرنك ما زال محتفظ بألوانه |
 |
| معبد الكرنك من الداخل |
أنصحكم بلاش ملابس تقلية جداً لأن المنطقة صحراوية بطبيعة الحال حتى فى الشتاء بيكون الجو معتدل جداً مش بارد
و المشرف هينبه عليكم تتجمعوا عند الباص فى المكان المحدد علشان تتجهوا لتانى مكان و هو معبد الأقصر
 |
| معبد الأقصر |
 |
| معبد الأقصر |
بعد ما تتجمعوا فى الأتوبيسات فى المعاد المحدد بترجعوا المدينة الشبابية و تتناولوا وجبة الغذاء فى المطعم و بيكون فى وقت راحة فى الغرفة لحد بالليل بتنزلوا فى المدينة نفسها جولة حرة من غير أى إلتزام ببرنامج محدد
 |
| مثال لوجبة الغذاء |
بتتجولوا فى السوق السياحى و هو بالمناسبة قدام معبد الأقصر بالضبط و دى فرصة كويسة هتشوفوا معبد الأقصر تانى بالليل بس من الخارج و هو منور بيكون المنظر رائع
السوق السياحى كله هدايا تذكارية زى التماثيل و الملابس المنقوشة بالهيروغليفية و عطارة و مشغولات يدوية رائعة جداً
بعد الجولة ما تخلص بترجعوا المدينة الشبابية لتناول العشاء و النوم
 |
| بوابة السوق السياحى |
 |
| السوق السياحى من الداخل |
اليوم الثالث
بعد الإفطار بنفس النظام بالضبط و نفس الوقت بتتجمعوا تانى فى الأتوبيسات و تستعدوا للتوجه إلى معبد حتشبسوت فى منطقة القرنة
 |
| معبد حتشبسوت |
بالنسبة لزيارة معبد حتشبسوت فأنصحكم تلبسوا أخف ملابس لأن المعبد فى الصحراء تماماً على عكس معبد الكرنك و الأقصر فى وسط المدينة
الجو بيكون هناك حار جداً مع العلم إنى كنت هناك فى وقت المفروض شتاء أصلاً و لازم يكون معاكم شمسية أساسى
المعبد جميل جداً و كله تماثيل لحورس و حتشبسوت و بالداخل فيه حجرة عليها نقوش ملونة
بعد زيارة المعبد هتتجمعوا فى الأتوبيسات تانى
فى رحلتنا كنا المفروض نتجه بعد كدة لمعبد هابو بس إحنا طلبنا من المشرف أننا نزور وادى الملوك كمان قبله
و بالرغم أن وادى الملوك مش من برنامج الرحلة إلا أن المشرف وافق و قلل من وقت زيارة معبد حتشبسوت علشان زيارة وادى الملوك و كان متفهم جداً و ساعدنا كتير
 |
| الطريق بين معبد حتشبسوت و وادى الملوك |
 |
| تذاكر دخول وادى الملوك |
 |
| مقبرة الملك رمسيس الثالث من الداخل |
زرنا وادى الملوك و دخلنا 3 مقابر ملكية من ضمنهم مقبرة الملك رمسيس الثالث
فى وادى الملوك و معبد حتشبسوت فى طفطف بينقلكم من بوابة الدخول للمكان بالداخل لأن المسافة كبيرة و كلها فى الصحراء تماماً و صعب المشى كل المسافة دى
بعد وادى الملوك الأتوبيسات بتتجه لمعبد هابو و ده معبد جنائزى نقوشه رائعة جداً
 |
| معبد هابو الجنائزى |
بعد معبد هابو بتتجهوا بالأتوبيسات لحد نهر النيل و بتركبوا مراكب بتروحوا جزيرة الموز
جزيرة الموز موجودة فى وسط النيل و بتتسمى كدة لأن كلها أشجار موز و فى هناك أقفاص كبيرة فيها قرود و قفص فيه تمساح
المكان رائع جداً لأن بعد حر اليوم و إرهاقه بتقعدوا فى مكان هاوى على النيل و بتاكلوا موز و المكان يهدى الأعصاب.
 |
| جزيرة الموز |
فى النهاية بتتجهوا للمدينة الشبابية للغذاء و بتنزلوا تانى للمدينة بالليل
قبل الجولة الحرة فى السوق فى اليوم ده كان من حظنا أن اليوم ده موافق إحتفال مهرجان السينما الأفريقى أو حاجة زى كدة مش متذكرة الإسم بالضبط ، فدخلنا سينما مجاناً كانت بتعرض فيلم اسمه (على الحدود) و هو فيلم سنغالى و كان فى شخصيات كبيرة حاضرة فى مجال صناعة السينما.
بعد كدة بتروحوا الجولة الحرة بتاعة السوق السياحى زى اليوم اللى فات بالضبط بترجعوا و بيكون فى (حفل سمر) فى تراس المدينة الشبابية بتتعشوا هناك و بيكون فى عزف جميل و بتضحكوا مع أصدقائكم و فى نهاية الحفلة و قبل النوم بتجهزوا شنطكم لأن تانى يوم الصبح بتسافروا بنفس الأتوبيسات لأسوان.
اليوم الرابع
المسافة بين الأقصر و أسوان حوالى 3 ساعات ، بعد ما توصلوا أسوان بتسكنوا فى المدينة الشبابية هناك بنفس الطريقة بس المشكلة أن مفيش هناك أسانسير فبيكون فى معاناه شوية فى انكو تطلعوا الشنط للغرف
كمان الحمام فى أسوان بيكون خارج الغرف
بعد ما تسكنوا فى الغرف بتنزلوا مطعم المدينة بردو و بتتناولوا وجبة الغذاء و بعد كدة وقت الراحة لحد بالليل
بالليل بتتجهوا لمتحف النيل
 |
| متحف النيل |
 |
| شعار متحف النيل |
متحف النيل من الأماكن الجميلة جداً و بيحكى عن مدى إرتباط مصر بالقارة السوداء
جوه المتحف هتلاقوا شاشات عرض فيها صوت ماية النيل و الحيوانات اللى بتعيش على ضفاف النيل و تماثيل بالحجم الطبيعى لفيل و تمساح و ديك
هتحسوا أنكم فى رحلة للبرية
المتحف كمان فى لوحات جميلة جداً مرسومة بالزيت لفنانين و فيه حوض سمك كبير جداً و فيه سلاحف مائية كمان
و بره المتحف هتلاقوا شعار ضخم جداً لدول حوض النيل
 |
| دى أكتر لوحة لفتت نظرى |
 |
| حوض السمك داخل المتحف |
فى نهاية اليوم هتتناولوا العشاء أما ترجعوا و تناموا
المدينة الشبابية فى أسوان بتطل على ستاد كرة قدم ضخم و حوله تراك للجرى ، فممكن اللى حابب يلعب رياضة فى أوقات الفراغ يسأل على بوابة دخول الستاد عن مواعيد إستخدام التراك
اليوم الخامس
بعد الإفطار بنفس الطريقة و النظام بتتجهوا لمعبد فيلة (يُنطق فيلة كأنكم بتقولوا أنثى الفيل و ليس فيلّة و ده خطأ شائع)
معبد فيلة هو أصلاً جزيرة فى وسط النيل و تسمى جزيرة فيلة و فيها مجموعة معابدهتركبوا المركب و هتكون معاكم مشرفة هتشرح المعبد هناك عامل ازاى و هتشرح المناظر كلها و خصوصاً الموجودة فى معبد إيزيس
 |
| نحت يبين إيزيس و حورس |
 |
صورة لجزيرة فيلة من المركب |
هترجعوا المدينة الشبابية لتناول الغذاء و ترتاحوا شوية
على الساعة 6 بالليل بتتوجهوا لمتحف النوبة و ده متحف التصوير فيه بحوالى 20 جنيه
 |
| متحف النوبة من الخارج |
المتحف فيه مومياوات و آثار زى أدوات التجميل اللى استعملتها النساء فى الوقت ده و إكسسوارات و ملابس و تماثيل كتير جداً و كل ما يخص حضارة كوش
و كمان فى لوحات كبيرة مطبوعة بتحكى عن التاريخ ده للى عايز يفهم أكتر
بعد كدة بتروحوا جولة حرة فى مدينة أسوان و السوق هناك مشهور جداً بالعطارة ، أنصحكم بشراء العطارة من هناك لأنها مزروعة أصلاً هناك و بتكون طازجة جداً و السوق كمان مشهور بالأسماك المخللة و فى ناس بتشترى أسماك مُعلبة بتتعبأ بشكل نظيف و مُحكم عشان ميحصلش مشاكل أثناء الرجوع و السفر
بس قارنوا بين جودة المنتجات و الأسعار لأن المحلات هناك كتير جداً
فى نهاية الجولة بترجعوا المدينة الشبابية تانى لتناول العشاء و النوم و بكدة يكون اليوم الخامس خلص
اليوم السادس
بعد الإفطار بتتوجهوا للقرية النوبية و بردو بتروحوا بالمراكب و هتشوفوا بيت الفنان محمد منير من المركب
النوبة جميلة و كلها بتطل على النيل لأن النيل مٌقدس عندهم و طبعاً القرية كلها شجر و بيوت ملونة و بتطل على مناظر جميلة جداً بين الصحراء و النيل و الماية
و هنا لازم تسمعوا كلام المرشدة لأنها هتنبه على أنكم ترسموا حنة فى المكان اللى فيه البيت بتاع الراجل المُضيف فقط و أى رسم فى أى منطقة تانية هتحذركم منه لأنها بتكون مغشوشة و فيها مواد كيماوية
و بالفعل اللى مسمعش كلامها من البنات بشرتهم التهبت جامد فخدوا كل التحذيرات فى الإعتبار
بعد القرية النوبية هتتوجهوا بالمركب بردو لجزيرة النباتاتو دى جزيرة رائعة و أكتر مكان عجبنى شخصياً فى أسوان لأنها معمل و متحف طبيعى لكل النباتات النادرة فى العالم كله
أيام الحروب فى الدول الأخرى كانوا بيحتفظوا بشتلات النبات فى المكان ده عشان يستردوها تانى بعد كدة منعاً للإبادة التامة
فى هناك أنواع زهور غريبة و جميلة جداً و أشجار ضخمة و مًعمرة
و داخل الحديقة فى متحف صغير بيضم أوراق نباتات مًختلفة و بيانات تحت كل نوع و الإسم العلمى و هكذا
لو حد زار المكان و هو بيدرس النباتات فى كلية العلوم هيستفاد جداً جداً
هتتوجهوا بعد كدة للمدينة الشبابية لتناول الغذاء و بعد كدة هتنزلوا تانى جولة حرة فى السوق زى اليوم السابق بالضبط
اليوم السابع
بتتوجهوا بعد الإفطار للسد العالىالمكان رائع بمعنى الكلمة و بمجرد ما تستعيد طريقة بناء السد هتحس بفخر شديد و هيكون فى مرشدة بردو هتشرح تاريخ السد العالى كله
 |
| السد العالى جنب السد العالى فى رمز الصداقة و ده بيتكلم عن الصداقة و العلاقات بين مصر و روسيا و المكان بردو على النهر و جميل جداً |
 |
| رمز الصداقة |
بعد كدة بترجعوا المدينة الشبابية و بتتناولوا وجبة الغذاء و بترتاحوا شوية و بعد كدة بتنزلوا جولة حرة فى أسوان تانى زى اليوم السابق بالضبط نفس المكان
و بترجعوا بتتناولوا وجبة العشاء و بتروحوا فى جولة حرة أخيرة للسوق
أما بترجعوا بالليل بتجهزوا شنط السفر إستعداداً للمغادرة تانى يوم
الصبح بتحطوا الشنط بتاعتكم فى الأتوبيسات و بتتجهوا للمطعم تتناولوا وجبة الإفطار و بتاخدوا وجبة المغادرة معاكم
الإتوبيسات بتاخدكم لمحطة القطارات و بتركبوا القطار حوالى 4 العصر و بتوصلوا محطة مصر تانى يوم الصبح الساعة 8 أو 9
و بكدة تنتهى الرحلة.
ملحوظات مهمة :
1- أولاً احرصوا زى ما قولت على وجود نظارة القماش الخاصة بالنوم ووسادة للرقبة طول رحلة القطار و ممكن كمان تاخدوا معاكم بطانية خفيفة صغيرة للفرد الواحد فى القطار
2- لازم يكون معاكم شمسية يوم زيارة معبد حتشبسوت و زجاجات ماية لأنه فى الصحراء تماماً و الشمس هناك صعبة.
3- الملابس اللى هتخدوها معاكم عموماً متكونش ثقيلة جداً ولا خفيفة جداً يعنى معتدلة أحسن حاجة
4- قارنوا أسعار كل المحلات فى كل الأماكن قبل الشراء علشان فى ناس بتزود السعر بشكل مبالغ فيه و خصوصاً فى النوبة
5- وجبات الإفطار و العشاء فى الأقصر و أسوان كتيرة جداً للفرد الواحد فأنصحكم أى أكل يتبقى منكم حضروه بشكل كويس و أعطوه لأى محتاج خلال الجولات الحرة.
حاجه روعه جدا 👏👏
ردحذفتسلم يارب
حذفإن شاء الله تروحها و قريب اوي 💙
باذن الله شكرا جدا ليكي
حذفالعفو ^_^
حذف