The Polaris Talk Blog

الثلاثاء، 16 مارس 2021

شاهد محطة الفضاء الدولية بالعين المجردة!

Hala مارس 16, 2021 0 Comments

وفرصة ممتازة النهاردة لمشاهدة محطة الفضاء الدولية بلمعان واضح جداً أقصاه 3.6- .. وارتفاع متوسط في سماء القاهرة.

ووقتها مناسب جداً.. بعد الغروب

تعالوا نرصد أكبر قمر صناعي - محطة الفضاء الدولية ISS من مصر كلها في تمام الساعة 6:49 مساءاً بتوقيت القاهرة

النهاردة الثلاثاء 16 مارس 2021 هنلاقي نقطة لامعة كأنها نجمة بتتحرك من الجنوب إلى الشرق بارتفاع متوسط في السماء أقصاه 32 درجة فوق الأفق - على مدى حوالي 5 دقائق

محطة الفضاء الدولية عبارة عن معمل علمي في الفضاء على إرتفاع حوالي 400 كم من سطح الأرض بتعمل لفة حول الأرض كل حوالي ساعة ونص يعني حوالي 15 لفة في اليوم - عشان كدة بتعدي علينا كتير بس احنا بننشر المرات الأسهل والأوضح للرصد.
مين هيستنى رصد المحطة؟

الاثنين، 15 مارس 2021

أنا على راديو البداية!

Hala Loly مارس 15, 2021 2 Comments

أنا أولًا بشكر كل حد تابع المدونة دى من بدايتها و تابع تغيير اسمها مع الوقت و تطور كتابتى فيها. بحس أنى كبرت معاكم و بتشجيعكم ليا هكون أفضل و أفضل
إن شاء الله هكون بكرة موجودة فى راديو البداية و هقدم أول حلقة ليا فى برنامج برانا من إعدادى و تقديمى
و فى نهاية كل حلقة هقول سؤال و اللى هيجاوب عليه صح هذيع اسمه فى الحلقة اللى بعدها.
يمكن يكون اسم البرنامج مش مألوف و مش مفهوم بس ده القصد منه ؛ أنه يكون مشوق
و أنا واثقة أنه هيعجبكم جداً
لو عايزين تسمعونى ادخلو على صفحة راديو البداية على الفيس بوك و اكتبوا #برانا
هتلاقوا كل الحلقات متسجلة ، ولو عايزين تسمعوا الحلقة لايف فهى هتكون كل يوم ثلاثاء الساعة 4
مستنياكم و مستنية رأيكم ...
لينك صفحة الراديو على الفيس بوك : من هنا

الأربعاء، 13 يناير 2021

النبات يحب و يتألم و يقرأ أفكار البشر!

Hala يناير 13, 2021 2 Comments

النهاردة خلصت قراءة الكتاب الأول فى سنة 2021 و طبعًا لازم أكتب رأيي فيه زى ما دايمًا بعمل عشان لو حابين تقرأوه
الكتاب اسمه ( النبات يحب و يتألم و يقرأ أفكار البشر) تأليف الكاتب / راجى عنايت.
من أمتع الكتب اللى ممكن أى حد يقرأها و خصوصًا لو مهتمين بالنباتات بشكل عام مش علم النباتات كعلم.
فى الكتاب ده الكاتب استعرض مجموعة تجارب حصلت بالصدفة و لكنها أدت لإكتشافات مذهلة و كانت نتايجها أن النباتات بتحب و بتتألم و بتفرح و بتحزن و بتقرأ أفكار البشرو كمان غير كل ده بتستجيب للتشجيع و المدح جدًا.
ازاى كل ده بيحصل؟ و العلماء أكتشفوا إزاى أصلاً الموضوع الغريب ده؟ الإجابة فى الكتاب الجميل ده
أحسن ما فى الكتاب أنه متقسم فصول حسب الحلات الغريبة اللى تمت فيها التجارب على النباتات و كمان الكتاب صغير ممكن يخلص فى يومين فقط و مناسب لكل الأعمار
الغريب جدًا أن الكتاب ده قديم ، يعنى الطبعة الأولى كانت سنة 1980 و الطبعة السادسة و الأخيرة كانت سنة 1995
و ده بيدل على أن المعجزات اللى هتقرأوها فى الكتاب أكيد اتطورت و أصبحت أكثر غرابة حتى
لينك تحميل الكتاب PDF : من هنا

الجمعة، 9 أكتوبر 2020

بردية عطر السوسن!

Hala Loly أكتوبر 09, 2020 2 Comments

هل تعلم أن أجدادنا القدماء المصريين إهتموا بتصنيع العطور كثيراً و ولوه عناية خاصة؟إذا لم تقرأ الموضوع السابق عن العطور فى مصر القديمة فقد فاتك الكثير عن طرق تحضير العطور و بيعها و إستخدامها فى مصر القديمة أما إذا كنت قد قرأته ، فإليك وصفة طريفة للغاية لصناعة و تحضير زيت السوسن و التى قد نُقلت بالتفصيل من إحدى البرديات!
و من الجدير بالذكر أن زيت السوسن كان يتعطر به نساء الطبقة العُليا و قد كان باهظ الثمن لأن تحضيره يستلزم الكثير من الوقت و الجهد.

الوصفة
1- اخلط 9 ارطال و خمس أوقيات من الزيت و 5 أرطال و ثلاث أوقيات من الوج و 5 أوقيات مر فى النبيذ المُعطر.

2- قم بغلى المكونات معاً ثم قم بتصفية الخليط . اهرس 3 ارطال و 16 اوقية من الهيل (الحبهان) و لينها بماء المطر و اضفها للزيت.

3- اترك الخليط كله حتى يلين و يطرى ثم صفيه جيداً.

4- خذ ألف زهرة سوسن جديدة و انزع اوراقها و ضعها فى وعاء عريض مسطح ثم صب فوقها 3 رطل و نصف من الزيت.

5- ادهن يديك بالعسل و قلب بيديك محتويات الإناء ثم احفظ الإناء لمدة 24 ساعة ثم صفى المحتويات.

6- استخلص من الناتج من الزيت الطافى فوق الماء بالكشط مع التأكيد على عدم وجود أى مياه مختلطة بها.

7- خذ اناء نظيف و ادهنه من الداخل بالعسل ثم صب الزيت المكشوط فيه و رش عليه قليلاً من الملح مع إزالة ما يتجمع من الشوائب أولاً بأول.

8- احفظ هذة الكمية الأولى من الزيت على حدى (أول قطفة).

9- بالنسبة لباقى الزهور المتبقية فى المَنخُل خذها بعد ذلك و أضف إليها 3 و نصف رطل من الزيت المتبقى مع ربع أوقية من الهيل المطحون.

10- قلب باليد ثم اترك الخليط فترة من الوقت ثم قم بتصفيته . قلب الناتج مع الملح وأزل الشوائب المتجمدة أولاً بأول و ضع هذة الكمية جانباً هى الأخرى (القطفة الثانية).

11- صب ما تبقى لديك من الزيت على الزهور و كرر العملية بإستخدام الهيل و الملح. احفظ هذة الكمية أيضاً (القطفة الثالثة).

12- خذ ألف زهرة سوسن جديدة و انزع أوراقها و صب عليها زيت أول قطفة و أعد عملية إضافة الهيل و الملح كما شرحنا ، و يمكن تكرار العملية بإستخدام زهور السوسن الجديدة و بقدر ما تكرر العملية بقدر ما يكون العطر الناتج قوياً و أول قطفة هى دائماً أطيب القطف رائحة.

13- عندما تصل بالعطر إلى القوة المطلوبة خذ 9 اوقيات من أجود أنواع المر أو ربع أوقية من الزعفران و 9 و 3/8 من القرفة أو كميتين متساويتين من الزعفران و القرفة
ثم أهرس هذة الكمية كلها ثم ضعها فى إناء به ماء و صب فوقها كمية من زيت السوسن المعطر و اتركها لفترة.

14- اكشط الزيت المتجمع على السطح ثم عبئه فى برطمانات صغيرة مدهونة من الداخل بالصمغ أو المرو الزعفران و العسل بعد تخفيف الدهاء بالماء.

15- كرر هذة الخطوات جميعاً فى القطفتين الثانية و الثالثة.

ملحوظة: يعتبر كل من الصمغ و الراتنج من المواد المثبتة للمكونات الأخرى.

السبت، 5 سبتمبر 2020

لماذا سُمى نبى الله محمد بإبن الذبيحين؟

Hala سبتمبر 05, 2020 0 Comments

كُلنا نعرف أن سيدنا محمد صلى الله عليه و سلم هو من نسل إسماعيل عليه السلام ، و يُعتبر سيدنا إسماعيل هو الذبيح الأول بحسب القصة الشهيرة أن سيدنا إبراهيم والد إسماعيل رأى فى المنام أنه يذبح ولده و كان من عادة الأنبياء أن ينفذوا أوامر الله التى جاءت فى منامهم و عندما هم بذبح ابنه و كاد قلبه ان ينفطر ، فداه الله بكبش عظيم نظراً لصبر إبراهيم عليه السلام على البلاء.

هذا هو الذبيح الأول و لكن من هو الذبيح الثانى؟ هل تعلم أن الذبيح الثانى ترتبط قصته بماء زمزم؟

إليكم القصة..

فى قديم الزمان عندما ترك نبى الله إبراهيم زوجته هاجر و ولده إسماعيل فى الوادى المقفر الذى لا زرع فيه ولا ماء
لم تخف السيدة هاجر لأنها علمت أن الله معها و أنه لن يضيعهما ابداً و هو توكل عظيم على الله و إيمان قوى به عز و جل.
هذا الإعتماد على الله أدى إلى أن السيدة هاجر و ابنها اصبحوا من سادة الوادى
و عندما انفجرت ماء زمزم أتت القبائل من كل حدب و صوب و هم يعرفون أن هذا الوادى مقفر ، فإستأذنوا أن يقيموا فى هذا المكان و أذنت لهم السيدة هاجر و تزوج منهم سيدنا إسماعيل بعد ذلك و بدأت حياه العرب هناك.
و بعد ذلك تعاقبت الأزمنة و دُفنت ماء زمزم تحت رمال الصحراء و لم يعد لها وجود
فرأى عبد المطلب ( سيد قريش) فى منامه ثلاث مرات أن هناك من يأمره بحفر بئر زمزم ، و لكن عبد المطلب لم يكن يعرف مكان البئر ، حتى جاءه المنام فى المرة الرابعة من الله عن مكان بئر زمزم ، فذهب و حفر مكان ما رأى فى المنام و إذ فجأة ينبثق ماء زمزم و يخرج ، فكبر نظراً لما رأى من الماء.
و عندما عرف أهل قريش بأمر ماء زمزم ، أتوا إلى عبد المطلب و طلبوا منه أن يشاركوه فى استخدام البئر و لكنه رفض و قال أنه من رأى الرؤية و من حفر البئر لذلك هو المسؤول عنها ، فغضب أهل قريش و أغلظوا عليه.
و لما كان أهل قريش عددهم كبير و لم يكن لعبد المطلب سوى ولد واحد و هو الحارثة بن عبد المطلب فغلبوه
فى هذا الوقت أختصم أهل قريش فى من يتولى و يرعى ماء زمزم ، و قرروا أن يذهبوا إلى كاهنة تعيش فى الشمال ليحتكموا عندها ،فنذر عبد المطلب نذراً إلى الله أنه إذا حكم ماء زمزم و رُزق بعشرة أولاد سيذبح أحدهم قربان إلى الله و شكراً له.

كان الطريق طويلاً ملئ بالصحارى و الحر شديداً ، و لما نفذ منهم الماء فى الطريق ، طلبوا من القبائل المجاورة أن يعطوهم بعض الماء فرفضوا أن يعطوهم خشية أن ينفذ الماء منهم و قالوا أنهم أحوج إلى الماء منهم ، فلما أحسوا بدنو أجلهم من شدة العطش سألوا عبد المطلب عن ما الذى عليهم فعله لأنه سيدهم
فقال لهم أن يحفر كل فرد منهم قبره و لينم بجانبه حتى إذا مات يتم دفنه و أن الأغلبية ستموت و من يبقى فى النهاية سيضيع ، و ضياع واحد خير من ضياع الجماعة كلها
فنفذوا أوامره و لكنه قال هذا ليس رأى و أمرهم أن يبحثوا عن الماء بدلاً من الموت بهذة الطريقة
فلما قامت ناقته ، انبعث الماء فجأة من تحت خفها ، فكبر الناس و هللوا و عاشوا ، و عرف الناس أن هذة أيه من الله إلى عبد المطلب أنه هو المكلف برعاية ماء زمزم.
بعد ذلك توافرت أبناء عبد المطلب و كثروا حتى أصبح لديه عشرة من الأبناء ، فأراد أن يفى بنذره
لذلك قام بقرعة على ابناءه و وقع الإختيار على أحبهم إلى قلبه و هو عبد الله ، فحار عبد المطلب فى أمره و كرر القرعة ثلاث مرات و كان الإختيار يقع على عبد الله فى كل مرة.
فقيل له أن أن يجرى القرعة بين ابنه عبد الله و بين مائه من الإبل ، فوقعت القرعة مرة أخرى على عبد الله حتى افتداه ابوه فى النهاية بذبح مائه من الإبل.
لذلك سُمى النبى صلى الله عليه و سلم بإبن الذبيحين.

الأربعاء، 26 أغسطس 2020

تطبيقات الموبايل اللى بستخدمها 2020

Hala أغسطس 26, 2020 5 Comments

دى بعض التطبيقات اللى بستخدمها فى موبايلى و شرح كل واحد منهم بيعمل ايه بالضبط

tumblr

تمبلر بالنسبة لى من أفضل تطبيقات الصور اللى دايماً بستخدمه ، لو حابين تدوروا على صور و فيديوهات مميزة هتلاقوها فى تمبلر ، و الميزة اللى فيه أن جودة الصور أعلى كتير من انستجرام و بنترست ، و المستخدمين بيعملوا عليه مدونات صغيرة زى انستجرام.

snapchat

تطبيق سناب شات عبارة عن كاميرا فيها أكتر من فلتر بأشكال كتير و إضاءات مختلفة ، الميزة فيه اللى بحبها اوى أنه مهما كانت الصور قديمة بتفضل موجودة طالما عملت حساب على سناب شات يعنى هتلاقى كل الصور بتاعتك علي حسابك فى سناب شات حتى لو مسحت الصور دى من موبايلك ، و ممكن تسترجعها فى أى وقت لموبايلك لأنها محفوظة.

whatsapp

طبعاً التطبيق الأشهر للمحادثات .. مفيش كلام أقوله عن واتساب كلنا عارفين ايه هو.
تمارين للسيدات

الحقيقة ده مش تطبيق واحد و لكنه مجموعة تطبيقات مع بعض ، ممكن تنزل أى واحد فيهم
يعنى مثلاً تطبيق بيعلم المستخدم تمارين الضغط ، تمارين إطالة و هكذا... لكن تطبيق تمارين السيدات شامل كل أنواع التمارين عشان كدة هو الأفضل بالنسبة لى .. و طبعاً فيه نسخة للرجال.
هو مقسم من جوه لأكتر من منطقة فى الجسم و كل منطقة ليها تمارين مخصصة لتنحيفها أو ممكن تختار أكتر من تمرين أو تعمل تمرين خاص بيك
يعنى على سبيل المثال حد عايز تمارين البطن و الذراع ، فبدل ما يضغط فى كل مرة على قسم معين من التمارين ، ممكن يجمع تمارين البطن و الذراع مع بعض و يحطلهم عنوان جديد بإسمه (تمارين فلان) اللى بتحتوى على التمارين المطلوبة.
كمان التطبيق فى ميزة و هى أنك بتكتب وزنك و طولك و بيحددلك كم المياه اللى لازم تشربها كل يوم و بيفكرك كل شوية بمواعيد الشرب للناس اللى بتنسى تشرب مياه.
Penup

من أجمل تطبيقات رسم السكتشات السريعة ، اللى بحبه فيه إمكانية تبديل فرش الرسم بألوانها و أحجامها و خطوطها و دمج الألوان، كمان التطبيق فى سكتشات للتلوين و هتلاقى مجتمع من الناس بيشاركوا رسوماتهم و تلوينهم.
تأمل
أنا إتكلمت كتير قبل كدة عن التأمل و فوائد التأمل للروح و العقل و الجسم و هتلاقوا الموضوع اضغط هنا
التطبيق ده فيه أصوات طبيعية زى المطر و الرياح و صوت أجراس معابد آسيوية و نهر و عزف و حاجات تانية كتير و كلها بتساعد على التأمل و الإسترخاء و التركيز
تقدر تختار الصوت الأنسب ليك للتأمل أو تدمج أكتر من صوت مع بعض حسب الرغبة ، و بتضبط التايمر على المدة المطلوبة للتأمل.
instagram

موقع التواصل المعروف إنستجرام بردو لا داعى للكلام عنه
shazam

التطبيق ده عرفته من احد الأصدقاء اما كنت بلعب لعبة معينة و فى خلفية موسيقية عجبتنى اوى و مش عارفة اسمها خالص و مش عارفة أعرف ازاى
كتير بنسمع أغانى فى الشارع أو فى أى مكان و مش بنبقى عارفين اسمها و مش عارفين نقدر نسمعها تانى ازاى ، التطبيق ده بيساعدك على كدة
فى الأول بتعمل حساب على shazam و بعد كدة بيشتغل زى مسجل صوتى تدوس عليه اول ما تيجي أغنية انت عايز تعرف اسمها
و فوراً التطبيق هيتعرف على الأغنية و يكتبلك اسمها و اسم المغنى
و فكرة أنك تعمل اكونت قبل الإستخدام بيضمنلك حفظ كل الاغنيات السابقة اللى اتعرف عليها البرنامج عشان تعرف ترجعلها تانى

star truker

واحد من أجمل تطبيقات علم الفلك بالنسبة لى هو star truker ، التطبيق أول ما بينزل على موبايلك بيبقى اسمه star map
فى البداية بتشغل خاصية ال gps على موبايلك ، و بعد تحديد مكانك تقدر توجه الموبايل للسما ( يفضل بالليل ) و بيترسم قدامك على الموبايل كل النجوم اللى موجودة قدامك فى السما فى اللحظة دى
و طبعاً الشكل على الموبايل بيتغير كل ما تتحرك من مكان للتانى لأنه بيعرضلك السما كاملة
تقدر تعرف أماكن كل النجوم و الكواكب ، و فى خاصية بحث لو بتدور على اسم نجم معين هيظهرلك تليسكوب يوجهك تحرك موبايلك ناحية أنهى منطقة للسما
لازم تشغل ال gps عشان طبعاً موقع النجوم بيختلف من منطقة للتانية
لو حابين تتأكدوا أن التطبيق شغال صح اتبعوا القمر لأنه أوضح علامة طبعاً فى السما و هيظهر موقعه فوراً على الموبايل.

Duckburg Radio
الراديو المحبب إلى قلبى و اللى صاحبه اختارله اسم مميز جداً جداً ( راديو مدينة البط)
الراديو طبعاً اسمه بيضحك جداً بس حقيقى هو جميل و بيعرض كل الأغانى النادرة و التسجيلات القديمة و المتنوعة جداً جداً
يعنى مثلاً موسيقى شرقية و فلكلور صينى و أم كلثوم و موسيقى ميتال و روك و بوب و كلاسيك
أجمل ما فى الراديو أنك ممكن تحدد أنواع معينة بس من الأغانى و تلغى أنواع أنت مش عايزها
يعى مثلاً أنا مش بحب الروك ولا الميتال و بسمع كلاسيكى و فلكلور و شرقى و هكذا بتحدد اللى أنت عايزة و بيفضل شغال ورا بعض ميكسات مذهلة حقيقى
و علشان أنا بحب الراديو ده جداً بعتت لهم على صفحتهم على انستجرام شعار الراديو مع بطتى اللعبة ! ايوه انا عندى بطة طبعاً !

الحوار
تطبيق الحوار تطبيق إسلامى شامل و ممتاز ، فيه تحديد اتجاه القبلة و القرآن صوت و قراءة و مقالات إسلامية كتير متنوعة و بطاقات معايدة لرمضان و الأعياد و أدعية كتير و أحكام شرعية.
BlueBird

ده تطبيق لتعلم اللغات ، و فيه أكتر من 160 لغة ، بيعلم النطق و أساسيات اللغة على 3 مراحل .. مبتدئ ، متوسط ، متقدم
و كنت كتبت موضوع قريب جداً عن إزاى نمين مهارات اللغة الإنجليزية عندى و نصائح لإتقان اللغة هتلاقوه اضغط هنا
Pinterest

تطبيق الصور الأشهر على الإطلاق طبعاً و اللى بنغرق فيه زى البحر من كتر الصور و الأفكار اللانهائية اللى فيه ، مفيد لو حد عايز يقرأ عن أى حاجة ، و غالباً البحث الأفضل فيه بالإنجليزى.
المدونات بتستخدم بينترست فى نشر موضوعاتهم فى أماكن كتير و للوصول لعدد أكبر من الناس
و فى الأول و فى الآخر لا غنى عن بينترست.

PicsArt

من التطبيقات المعروفة لتعديل الصور و تجميعها و اضافة فلاتر و اخفاء عيوب الصور و اضافة إطارات ليها.

الاثنين، 24 أغسطس 2020

إزاى نميت مهارات اللغة الإنجليزية عندى؟ +6 نصائح هامة لإتقان اللغة

Hala أغسطس 24, 2020 6 Comments

النهاردة أنا مش هتكلم معاكم بس عن إزاى اكتسبت مهارات اللغة الإنجليزية و إزاى نميتها ، لكن هتكلم عن قصتى مع اللغة بشكل عام

أولاً و أنا صغيرة فى ابتدائى كنت بحب اللغة الإنجليزية جداً و كنت دايماً بسأل عن معنى أى كلمة تقابلنى فى أى مكان مش بس فى الكتب الدراسية و لكن حتى و أنا ماشية فى الشارع و كنت بكتبها و بترجمها من القاموس أول ما أروح ( مكنش النت مشهور زى دلوقتى)
من هنا بدأت أنمى اللغة بسرعة و بقى عندى حصيلة كلمات كتير فى وقت قليل بالرغم من أنى كنت صغيرة
و طبعاً ده مينفيش أنى مش ممتازة تماماً فى اللغة لأن لحد دلوقتى بعمل نفس الشئ و بكتب الكلمات اللى بتقابلنى و مش عارفة أترجمها و بترجمها فى جوجل

فى إعدادى الوضع إتطور شوية ، كنت بتفرج على مسلسلات أجنبية و كنت ساعات مش بقرأ الترجمة و بعتمد على السمع بس و كنت بفهم و اللى مكنتش بفهمه كنت ببص على الترجمة و أعرفه و أحفظه
و فى الوقت ده كمان كنت بلعب ألعاب أونلاين كتير جداً و كنت بتعلم من المحادثات الصغيرة اللى بتكون بين شخصيات اللعبة

أكيد كلكم فاكرين ألعاب كيك مانيا و دينر داش و كل الحاجات دى كانت مشهورة وقتها جداً و كنت مش بفوت جملة غير أما أقرأها
حتى قصة اللعبة اللى بتكون فى الأول و بنعملها سكيب كنت بقرأها و بستفاد منها

و هكذا مع عشرات الألعاب اللى كنت بلعبها كنت بتعلم و ده ساعدنى جداً فى المدرسة كمان
و أخدت مادة المستوى الرفيع إنجليزي و كنت بقرأ مقالات طويلة جداً و كان بيقف معايا معنى كلمتين بالكتير و كنت بحل الأسئلة كويس و كنت بفهم.

فى مرحلة الجامعة حملت لعبة أونلاين أعتقد أتكلمت عنها فى أكتر من موضوع ، اللعبة دى عالمية و فيها ملايين اللاعبين من كل مكان و أما كونت صداقات معاهم جوا اللعبة أتكلمنا فى كل حاجة بداية من تاريخ اللعبة و الأماكن اللى بنحب نزورها
و تعلم اللعبة نفسها و مع البنات طبعاً بنتكلم عن ستايل الأفتار أو شخصية اللعبة اللى بنلعب بيها و لبسها و المكياج بتاعها و كل حاجة ، لدرجة فى أصدقاء بيتكلموا فى الفلسفة و وجهه نظرهم فى العالم ، يعنى من أصغر الأمور لأكبرها
الموضوع ده مفيد من ناحية الكلام مع ناس من ثقافات مختلفة و من ناحية إكتساب معارف مهمة فى اللغة ، و أكتر حاجة بتعجبنى و بتخلينى فخورة بنفسى أما أصدقائى يعرفوا فى الآخر أنى مصرية و مش بتكلم إنجليزى أصلاً
بقت معتادة على جملة ( Your English is Perfect )

نستفاد من كل ده شوية نصايح هقولكم عليها هتساعدكم جداً :

1- لازم يكون عندك دافع للتعلم ، و ده لأى شئ عموماً مش بس اللغة الإنجليزية .. لأن الدافع للتعلم هو أهم شئ بيخلينا نكمل من غير ما نمل
و دايماً فكر نفسك .. أنا بتعلم اللغة دى ليه؟ هتفيدنى فى ايه فى المستقبل؟

2- خلى معاك نوتة صغيرة أكتب فيها أى كلمات تقابلها مش عارف معناها و دور على معناها

3- أعرف المصطلحات الدارجة للناطقين باللغة دى مش بس الكلمات الأساسية ، لأن اللغة أولاً و أخيراً اياً كانت هى مفتاح التواصل بين الناس ، فطبيعى أنت هتستخدم اللغة بشكل أو بآخر فى قراءة نصوص أو التحدث مع ناس ناطقين باللغة دى.
و من هنا لازم تعرف المصطلحات الدارجة عندهم لسهولة التواصل حتى لو المصطلحات دى لا تحمل معنى حرفى
على سبيل المثال : But your self in my shoes >>> (ضع نفسك مكانى) و ليست ( ضع نفسك فى حذائى!)
مثال آخر : When Pig fly >>> ( مستحيل) و ليست ( عندما يطير الخنزير) يعنى تعبير عن أن الموضوع ده مستحيل زى ما مستحيل أن الخنزير يطير فعلاً و إحنا عندنا بنقول ( فى المشمش)

4- تحدث مع الناطقين باللغة
زى ما أنا عملت بالضبط حاول تلاقى طريقة تتكلم بيها مع الأجانب سواء فى أبلكيشن على الموبايل بتتعلم منها عن طريق التحدث مع الناس أو بأى طريقة تانية و متتكسفش أبداً من الموضوع ده حتى لو إتكلمت غلط
ممكن تقول للى هتتكلم معاه أنك بتتعلم اللغة و عايز تتمرن و هتلاقى الناس بترحب بكدة و بتشجعك و محدش هيتريق لو غلطت فى كلمات ، ولو حد صححلك كلمة أو جملة أتعلم من اخطائك و صدقنى الموضوع ده بيفرق و هتحس أنك أتطورت جداً بعد فترة قصيرة

5- خلى خيالك واسع
الموضوع ده بعيداً عن كل النقط اللى فاتت يعتبر من أكتر الحاجات اللى بعملها و هى الأساس اللى خلانى أتعلم بشكل سريع
دايماً بتخيل موقف فى دماغى أو موضوع أياً كان ايه هو وأنى بحكى الموقف ده لحد أجنبى قابلته بالصدفة فى جنينة مثلاً
طبعاً الكلام مع النفس مفيد سواء لجوه العقل أو بتتكلم فعلياً مع نفسك ( تبدأ تقلق على نفسك لو لقيت حد بيرد عليك هههههههه)
المهم أن الموضوع ده خلانى أتعلم و أتخيل شكل بنت أجنبية بتسمعنى مثلاً ، بل و الموضوع وصل لأنى اتخيلها بتقولى أنها مفهمتش قصدى فى حاجة معينة فأرجع أحكى الجزئية دى بطريقة تانية بالإنجليزى بردو
و ده مفيد فى أنه يخليك تشرح حاجة بالإنجليزى بأكتر من طريقة و فى كل طريقة بتستخدم مفردات مختلفة و لك أن تتخيل كم الكلمات اللى هتتعلمها و تستعملها
و لو حسيت أن فى حاجة عايز تعبر عنها و مش عارف ، عندك صديقك المخلص جوجل تقدر تسأله عن معنى أى كلمة و تكمل الحوار مع صديقك المُتخيل.

6- أدخل على المواقع اللى بتساعدك تتعلم اللغة ، و علشان متنساش الموقع بعد فترة إعمله Pin على شاشتك فى الموبايل بحيث تدخل عليه كل شوية
فى موقع إسمه Grammarly و ده عبارة عن إنك تكتب أى جمل أو حتى مقال صغير أو كبير بالإنجليزى و هو بيبدأ يصححلك الأخطاء يعنى مثلاً لو أنت كاتب Was يحطلك تحتها خط أحمر و يقولك إنها Were و هكذا...
بص على الجملة ايه الخطأ فيها قبل ما تصححها عشان متقعش فى نفس الغلط تانى
طيب نقرأ إنجليزى كتير فين؟
فى موقع ال British council فى حاجة اسمها المجلة و دى مليانة مقالات عن موضوعات عامة و قصيرة خالص
اقرأ فيها من وقت للتانى و لو فى كلمة معرفتهاش ترجمها بمنتهى البساطة
و ممكن تكتب فى النوتة زى ما قولت مجموعة الكلمات اللى بالإنجليزى اللى معرفتهاش قبل كدة و ارجع اسأل نفسك فيها تانى
هل اتعلمتها و بقيت عارفها؟
لو كدة فأنت ماشى على الطريق الصحيح تماماً
لينك موقع Grammarly >>> اضغط هنا
لينك مجلة ال British council >>> اضغط هنا