بما أن الناس بدأت الأجازة خلاص و كمان فى نتايج ظهرت
حبيت أتكلم عن المستقبل اللى أغلب الطلاب بيفكروا فيه لنفسهم
دايماً أنا مؤمنة أن النجاح فى الحياه مش متوقف على نتيجة الثانوية العامة زى ما أغلب الناس بتفكر
يعنى ممكن كتير مننا سمع أن الطلاب و أهالى اطلاب مرعوبين بسبب أن النتيجة دى متوقف عليها حياه كاملة !!
فحبيت النهاردة أتكلم فى الموضوع ده من قبل ما نتيجة الثانوية العامة تظهر حتى
مبدأياً كدة نتيجة الثانوية العامة مش بتحدد مسارك فى الحياه نهائى !! هى بس بتحدد الكلية اللى هتدخلها حسب التنسيق ، و مش معنى إنك جبت نتيجة قليلة أن خلاص كدة الحياه خلصت ، ولا إنك جبت نتيجة عالية يبقى أنت كدة أنجزت اللى عليك
من المهم أن أى طالب يحط فى باله دايماً بديل لحلمه علشان لو متحققش ، ولازم ياخد الموضوع ببساطة لأن كل حلم بينتهى بيبتدى معاه حلم جديد و ممكن يكون أحسن 100 مرة من القديم
مثال بسيط ليا : و أنا طفلة كان طموحى و حلمى إنى أكون عالمة فضاء ، بعد ما كبرت شوية لقيت أن الفيزياء و الرياضيات مش متقبلاهم بالمرة و طبعاً الحلم ده أساسه الفيزياء و الرياضيات!
حولت حلمى لشئ أقرب و هو الترجمة و لأن مجموعى فى الثانوية العامة لم يؤهلنى لكلية الألسن أخترت كلية الآداب و أخترت قسم علم النفس للدراسة
و بعد سنوات الكلية ما خلصت حسيت أن علم النفس بردو مش طريقى!!
إشتغلت مع والدى و والدتى فى مصنعهم لملابس الأطفال و حالياً ده الشئ اللى أنا مستمرة فيه بدون إحباط و لايأس
رغم أن كتير من الناس قالولى كملى فى دراسة علم النفس و حاولى تحبيه و حضرى دراسات عليا
و هنا أحب أقول أن ده أكبر خطأ إنى أضيع وقتى فى شئ مش لاقية نفسى فيه لمجرد لقب دكتورة ، لأنى أنا اللى ممكن أعمل اللقب مش هو اللى يعملنى !
إيه الحاجات اللى ممكن أعملها لو مجبتش مجموع الكلية اللى أنا عايزها؟
- حالياً الشغل الكويس مش محتاج شهادة على أد ما هو محتاج تدريب و مجهود ، أهم نقطتين لازم تكون متمكن منهم : اللغات و الكمبيوتر.
و لما بقول هنا لغات أقصد أن الواحد يتعلم لغة بجد و يكون مثابر للنهاية ، يتعلمها من الألف للياء سواء أونلاين من النت أو من خلال مكان بيعلم اللغة دى لأن حالياً النت اصبح فيه كل حاجة بالمعنى الحرفى للكلمة و ده هيوفر مبلغ كبير جدا ووقت ضايع فى المواصلات و الذهاب و الرجوع لأماكن التعلم .
أما بالنسبة للكمبيوتر ، فالكمبيوتر النهاردة لا غنى عنه فى كل المجالات ، يعنى مثلاً ممكن تختار حاجة معينة فى الكومبيوتر تتعلمها و تتقنها و ده بدوره هيخليك تتقن اللغة الإنجليزية أكتر
حاجات زى إيه أتعلمها ؟
فى برامج كتير ممتعة و الشغل فيها مطلوب زى الفوتوشوب و الإليستريتور و فى برامج الحسابات اللى المتاجر و الشركات بتستخدمها ، و فيه البرمجة طبعاً
و علشان تتقن حاجة من الحاجات دى ما عليك إلا أنك تبحث فى مجالات شغلها على النت و تتعلمها من اليوتيوب مثلاً ، و أرجع دايماً و أقول أن ممارسة البرامج دى بإستمرار و التجربة و الخطأ هم أساس النجاح .. يعنى الموضوع ده كمان محتاج صبر و مثابرة بس النتايج بتكون عظيمة جداً لو المتعلم حط فى دماغه أنه ينجح مهما كان
إيه تانى ممكن نعمله؟
- ممكن عدم تحقيق حلمك فى كلية معينة يكون خير ليك علشان تبدأ مشروعك الخاص!
و كلمة مشروع هنا مش مقصود بيها مشروع ضخم أو محتاج رأس مال كبير لكن المقصود أنه يبدأ بشئ بسيط لكن مميز ولازم يكون مميز علشان يتعرف و ينجح ، و من نجاح لنجاح المشروع هيكبر بشكل تلقائى
فى ناس بيكون فى دماغها أفكار لمشاريع جميلة جداً و بيشتغلوا أى شغل مؤقت علشان يبدأوا المشروع بمبلغ بسيط فى البداية
للبنات : ممكن تعملى مشروع مأكولات بيتى كويسة و نظيفة ، و ممكن تتعلمى أى أشغال يدوية أو تتعلمى تصميم و تنفيذ الأزياء !
فى أفكار كتير جداً
للشباب : أى موهبة تتعلمها صح ممكن تحولها لشغل و تكسب منه كويس جداً و خصوصاً لو قرأت عن إزاى تبدأ مشروع صح و تبحث كويس و تعرف أنت عايز ايه و هتكسب إزاى؟
الحياه مليانة أفكار كتير جداً بس عايزة إنسان مثابر و صبور و طموح علشان يوصل لحلمه مهما كان
ليست هناك تعليقات:
إرسال تعليق