 |
| صورة من معبد الكرنك قبل بداية عرض الصوت والضوء بلحظات |
بالنسبة لرحلة الأقصر و أسوان التابعة لوزارة الشباب والرياضة فهى جميلة جداً جداً
دى أول رحلة أطلعها فى حياتى و كنت قلقانة أنها تكون وحشة بس الحمد لله يعنى
الرحلة من سن ١٨ ل ٣٥ سنة
أما عن تفاصيل الإشتراك فى الرحلة و نظامها
فأولاً أنت هتملى إستمارة أونلاين ( اضغط هنا ) ، الإستمارة عبارة عن فراغات بتملاها ، أولا بتختار أن القطار يكون شباب و رياضة وخانة الرحلة إلى : هتختار الأقصر و أسوان
بعدها بتكتب إسمك كاملاً و الرقم القومى اللى هو رقم البطاقة و المحافظة ، بالنسبة للفترة فأنت مش بتختارها خالص لإن الفترة بتتكتب تلقائياً عند أول معاد فاضى و متاح التسجيل فيه
يعنى مثلاً أنا كنت هروح فى الفوج بتاع 18 يناير و لقيته اتملى و اتكتبلى تلقائياً الفوج بتاع 22 فبراير فبيكون حسب الفاضى
و أخيراً الخانة بتاعة الجهة المرشح منها ممكن تكتب فيها خريج أو طالب جامعة أو أياً كان
بعد التسجيل و هيكتبك تم التسجيل بنجاح بتتوجه لأقرب مركز شباب فى الحى بتاعك و بتسأل عن مكان الدفع للرحلة و الموظف بيتأكد أولاً أنك سجلت إلكترونياً مسبقاً
يعنى لازم تسجل إلكترونياً الأول و بعد كدة أما يتأكد بتعطى له فلوس الرحلة ( ٦٠٠ جنيه مصري ) و صورة بطاقة تكون مجهزها معاك و بس كدة
هيقولك أنت فى القطار كذا اللى هيغادر الساعة كذا و هيقولك رقم عربة القطار و رقم الكرسى و بس خلاص
يوم الرحلة بتلتزم أنك تكون فى المحطة قبل معاد المغادرة اللى المشرف هيقول عليه بساعة عشان هتلاقى ناس كتير رايحة وكل واحد عايز يعرف مكانه طبعاً
اليوم الأول ( الأقصر) :
1- هتوصلوا الصبح الساعة 8 مثلاً أو على حسب كل رحلة لأن السفر بيكون بالليل علشان محدش يضيع يوم فى القطار
2- هتوجهوا للمدينة الشبابية فى الأقصر و هتسكنوا فى الغرف عادى جداً و بعد كدة هتستلموا وجبة الإفطار و هيكون فى راحة 3 ساعات أو اكتر من السفر
3- بعد كدة المشرف هينادى لازم تتوجهوا للباص فى الميعاد المحدد علشان هتروحوا أول مكان وهو عرض الصوت والضوء فى معبد الكرنك و ده بيكون بالليل علشان مؤثرات الصوت والضوء
4- بعد العرض هترجعوا المدينة الشبابية تانى و هتاخدوا محاضرة تنمية بشرية ( ده اللى حصل فى الفوج بتاعى معرفش فى تغييرات ولا لأ )
5- بعد كدة هتناموا واليوم يخلص
اليوم التانى ( الأقصر ) :
1- هتروحوا معبد الكرنك تانى و هيكون معاكى مرشد سياحى علشان يشرح الآثار والمسلات ، يفضل أنكم تسمعوه كويس لأنه بيشرح كويس و بعدها بيعطيكم فرصة للتجوال فى المعبد مع صحابكم و التقاط صور
2- بعد كدة هتتجمعوا للباص فى المعاد المحدد و هتروحوا معبد الأقصر و ده معبد تانى جميل جداً موجود فى وسط المدينة نفسها و بردو معاكم المرشد هيشرح و هتتصوروا زى الكرنك بالضبط
3- بعد كدة هتتوجهوا للباص تانى و هتروحوا للمدينة الشبابية هيقولولكم على معاد الغذاء ، هتتغدوا و بعدها فى راحة ساعتين تقريباً
4- بعد ساعتين الراحة هتركبوا الباص و تنزلوا جولة حرة فى المدينة تتمشوا و اللى عايز يشترى أى حاجة يشتري و هيقولولكم هتتجمعوا فى المكان الفلانى فى أخر الجولة عشان تروحوا المدينة الشبابية تاخدوا وجبة العشاء و تناموا
اليوم الثالث ( الأقصر ) :
1-هتصحوا الصبح هتاخدوا وجبة الإفطار و هتروحوا معبد حتشبسوت بالباص كالعادة و هناك هتلاقوا بازار فى أول المعبد ، الناس بتبيع حاجات زى اللى فى السوق السياحى بتاع الجولة الحرة بالضبط.
2- هتركبوا طفطف لحد المعبد من جوه لأن المسافة بين البوابة بتاعة الدخول لحد المعبد نفسه مشى كتير و فى الشمس فبتركبوا الطفطف
3- بعد معبد حتشبسوت هتتجمعوا فى الباص و هتروحوا معبد هابو ( رمسيس الثالث ) هتعرفوا طبعاً أصل التسمية وكل المعلومات من المرشد السياحى.
4- بعد المعبد هتروحوا جزيرة الموز و دى جزيرة جميلة كلها نباتات و أشجار موز و هتاكلوا هناك موز و هتلاقوا المكان فيه تماسيح و قرود بيربوها و بيبيعوا عصير قصب و كدة
ملحوظة : جزيرة الموز كلها جزيرة فى النيل فالباص هيقف فى مكان معين و بعدها بتركبوا مراكب للجزيرة و نفس طريقة العودة بالمراكب للبر و بعدها تركبوا الباص تروحوا.
5- اول ما توصلوا هتتغدوا و هيكون فى راحة بردو ساعتين تقريباً و بعدها هتركبوا الباص و هتنزلوا جولة حرة زى اليوم اللى قبله و بعد ما الوقت المقرر ليكم يخلص هتروحوا بالباص للمدينة الشبابية هتحضروا شنطكم و تستلموا وجبة العشاء و تستعدوا عشان تانى يوم هتروحوا أسوان
6- بالليل أخر يوم فى الأقصر بيكون فى حفلة سمر جميلة أحضروها بتتعشوا مع صحابكم و بتسمعوا موسيقى و أغانى و كدة يعنى و بتكون فى بلكونة المدينة الشبابية على الهواء كدة فالموضوع منعش بصراحة
ملحوظات مهمة :
١- صحابكم اللى هيشتركوا معاكم فى غرفة السكن هتختاروا بعضكم فى القطار و إنتم رايحين فأختاروا ناس شبهكم عشان هما دول اللى هيفضلوا معاكم فى الأوضة
٢- إستلام وجبات الإفطار و الغذاء و العشاء بيكون بكوبونات بتستلموها أول ما توصلوا الأقصر و كل كوبون فيه اسم الوجبة واليوم فأنت بتقطع كوبون الوجبة وتستلم بيه فحافظوا عليه كويس + الأكل لذيذ جدا الثلاث وجبات هتحبوه جدا
٣- أهم حاجة تلتزموا بالمواعيد اللى المشرف هيقولها يعنى لو قال هنتجمع فى الساعة 7 يبقى 7 بالدقيقة تكون فى المكان اللى قال عليه عشان ممكن الباص يفوتك أو أى مشكلة تحصل فبلاش
٤- الناس اللى نفسها تروح وادى الملوك فى الأقصر و هو مش فى برنامج الرحلة لأنه مكلف شوية ، فلو فى إجماع من شباب الرحلة أنكم عايزين تزوروه قولوا للمشرف بتاعكم و هو هيقطع وقت من معبد فيهم أو من أى مزار فى الرحلة و هيوفروا لزيارة وادى الملوك لكن مش هيعطيكم وقت زيادة يعنى لازم تعرفوا أن الوقت ده هيكون متاخد من حاجة تانية و طبعاً القرار ليكم و للمشرف
٥- إذا المشرف قالكم ممنوع التصوير فى المكان كذا و متاح فى المكان كذا فياريت تلتزموا بكدة منعا للإحراج لأن فى أماكن التصوير فيها بتذكرة
٦- وجبة الغذاء و الإفطار بتكون في المطعم اما العشاء فبتستلموه في شنطة ووقت الاكل عموما مع الصحاب بيكون احلى وقت
٧- اما تشتروا حاجة اسألوا عن سعرها في اكتر من مكان في السوق عشان في ناس بتبيع الحاجة غالية جدا
اليوم الرابع ( الأول فى أسوان ) :
1- اما بتوصلوا أسوان بتروحوا المدينة الشبابية هناك بردو و بتسكنوا فى الحجرات بتاعتكم بالبطاقة و مع صحابكم اللى اخترتوهم زى الأقصر بالضبط
2- بعدها بتتغدوا و تقعدوا راحة شوية و بعدها بتتوجهوا بالباص لمتحف النيل ، المتحف ده جميل جداً بيحكى عن نماذج لدول حوض النيل و الزيارة بتكون بالليل
هتسمعوا أصوات حيوانات أفريقية مع صوت ماء كإنك فى أفريقيا بالضبط و المتحف كمان فيه تماثيل لأكتر من خديوى و محمد على و الناس دى بعد الجولة بتروحوا تتعشوا وتناموا
اليوم الخامس ( الثانى فى أسوان ) :
1- بتصحوا الصبح تفطروا كالعادة و بعدها بتتوجهوا لجزيرة النباتات ، بردو الباص بيركن فى مكان و بتروحوا بالمراكب زى ما حصل مع جزيرة الموز فى الأقصر
2- جزيرة النباتات جميلة و مريحة للأعصاب و فيها متحف للنباتات هو مش كبير بس ألقوا عليه نظرة للى مهتم بالنباتات
3- هتتمشوا فى الحديقة الجميلة وهتلاقوا أنواع نباتات نادرة وغريبة و مكتوب لوحة بإسم كل نبات جنبه و عايزة أقول حاجة مهمة ( بلاش يا جماعة حد يمشى يدوس على النبات نفسه لأن دى حاجات لازم نحافظ عليها ) محدش هيقولكم كدة بس تشعروا بالمسؤولية لوحدكم
4- بعد كدة بتركبوا المراكب و بتروحوا القرية النوبية ، القرية حلوة و هتدخلوا بيت حد من أهل المكان بيستقبلكم و بتشربوا عنده شاى ، غالبا هيكون معاكم مرشدة هتقولكم للبنات على المكان اللى ترسموا فيه حنة فبلاش يا بنات حد يرسم حنة فى مكان غير اللى هى هتقول عليه لأنها عارفة الدنيا هناك و عارفة أن الأماكن التانية بيحطوا فيها مادة كاوية بتتعب الجلد فإلتزمن ب كدة
5- هترجعوا المدينة الشبابية هتتغدوا و بعد الراحة كالعادة هتروحوا متحف النوبة ، و المتحف ده فيه تاريخ النوبة بالنسبة لمصر هتلاقوا هياكل عظمية و مقتنيات للناس فى الوقت ده و تماثيل و حاجات زى كدة و هو بصراحة ظريف بردو جدا لكن التصوير فيه ب 20 جنيه فلو عايزين تصوروا ادفعوا التذكرة
6- بعد كدة بتروحوا تتعشوا و تناموا
اليوم السادس ( الثالث فى أسوان )
1- بعد الإفطار بتروحوا السد العالى و رمز الصداقة و معاكم المرشد السياحى بيشرح كل حاجة عن السد العالى و تاريخه و بتتصوروا فى رمز الصداقة
2- بعد كدة بتروحوا معبد فيلا و إسمه فيلا مش فيلة و هو عبارة عن جزيرة بردو بتروحوه بمراكب و المرشد السياحى بيعرفكم على تاريخه و إنقاذه من تحت مياه النيل تم ازاى و امتى و حاجات زى كدة
3- بعدها بترجعوا المدينة الشبابية بتاخدوا فرصة ساعة بتحضروا شنطكم و تستعدوا و تحطوها فى الباص و بتستلموا وجبة المغادرة و تتوجهوا لمحطة القطارات استعدادا للعودة بألف سلامة إن شاء الله
الرحلة جميلة وتستاهل
بتتعرفوا على تاريخ مصر الجميلة ده غير أنكم بتتعرفوا على ناس جديدة وتكتسبوا صداقات و صور و ذكريات جميلة بحق.
ليست هناك تعليقات:
إرسال تعليق