الموضوع ده كان المفروض ينزل المدونة فى اليوم الأول من يناير لكنه إتأخر كتير و ده بسبب بعض المشغوليات الشخصية عندى لكن الحمد لله أنا قررت أنه مينفعش يتأخر أكتر من كدة وإحنا لسة فى بداية السنة فأتمنى الموضوع ده يعجبكم و تجربوا تبدأوا بالخطوات دى
و طبعاً أى حد حابب يضيف أى حاجة يتفضل يضيفها بالتعليقات وأنا هكون سعيدة جداً بيها
1- نظمى غرفتك
- تنظيم الغرفة من الحاجات اللى بتاخد وقت طويل وصبر وخصوصاً لو إنتى مش من الناس اللى بتهتم بالتنظيم عموماً
إبدأى الأول بتنظيم دولاب ملابسك وإحتفظى بس بالملابس اللى هتستخدميها وأى قطعة ملابس مش مُستخدمة ، يفضل التبرع بيها لشخص تانى محتاجها .
أما عن المكتب ، نظمى أدراج مكتبك و خصصى كل درج لشئ معين
يعنى مثلاً درج للأكسسورات والميك آب لو بتستخدميه ، ودرج تانى للأوراق والمقلمة والأقلام اللى بتستخدميها سواء فى الشغل أو المدرسة أو الجامعة و درج تالت للكتب أو حسب ما تحبى ترتبى.
مع ضرورة تنظيف الأدراج بإستمرار و تنظيف كل المقتنيات اللى فيه على حدى ، لإن ببساطة المكان النظيف المرتب الهادئ بيساعد أكتر على التركيز والتفكير الجيد و بيعطى طاقة إيجابية للمكان
لو تحبى تقرأى أكتر عن كيفية جعل المكان إيجابى إقرأى الموضوع ده : إضغطى هنا
2- تطوعى
- فى كل مدينة أو محافظة أياً كانت بلدك هتلاقى جمعيات خيرية كتير جداً بتهدف لمساعدة المحتاجين بمختلف الطرق ، يعنى مثلاً هتلاقى ناس محتاجة فلوس علشان تكمل بس الشهر أكل وشرب و ناس محتاجة توصل مياه نظيفة لبيتها وهكذا .
و كلهم بيلجأوا للجمعيات الخيرية لمساعدتهم وبيعتمدوا عليها بشكل أساسى تقريباً ، فلو إنتى قررتى السنة دى تاخدى جزء من وقتك تتطوعى فيه فى أى نشاط شبابى يهدف لعمل الخير ، هتحسى إحساس بالإمتنان للنعم الكتيرة اللى ربنا منحها ليكى وهتقربى أكتر من حياه الناس البسيطة
ولو إنتى مش لاقية وقت تتطوعى فى أى جمعية خيرية بسبب مشاغل المذاكرة أو الشغل فممكن تدورى على طريقة ترسلى ليهم المال بطريقة سريعة أو تتواصلى معاهم وتشوفى أنسب طريقة ليكى ولوقتك للمساعدة
ملحوظة صغيرة : خصصى يوم فى الشهر أعملى فيه سندوتشات من البيت فيها مكونات مغذية والناس محتاجاها فعلا و غلفيها بطريقة نظيفة ومُعتنى بيها وإعطيها لأى محتاج فى الشارع ، الطريقة دى سريعة وسهلة ومش محتاجة مجهود كبير فى تأثيرها كبير جداً عليكى وعلى الناس المحتاجة
3- ادخرى المال
- جربى تحددى لنفسك ميزانية شخصية تمشى عليها ، صدقينى الموضوع يشمل كل البنات حتى لو إنتى بتاخدى مصروف من عيلتك ، إدخرى جزء من مصروفك أو مرتبك لو إنتى بتشتغلى ، وليكن الثلث .
و كونى صارمة مع نفسك إن الجزء ده من المال مش هتصرفيه أبداً غير وقت الحاجة ولو الحاجة دى تستاهل ، اما ييجى اليوم اللى هتصرفى فيه المال ده فى حاجة مفيدة أو مهمة هتحسى بقيمة الإدخار و ده هيشجعك إنك تخلى الإدخار عادة مهمة عندك.
4- جرب الطعام الصحى
خلى عندك النية أن السنة دى هتضبطى جسمك بالطريقة اللى نفسك فيها ، جربى الطعام الصحى وخليكى حريصة على طهى الطعام فى المنزل عموماً أكثر من طعام الشارع والوجبات السريعة
قللى كل المواد المصنعة فى طعامك و إتجهى أكثر للخضروات والسلطات بأنواعها
مثلاً : الطعام المشوى أفضل من المقلى و الأسماك أفضل من اللحوم ، ده غير أن لازم لو مش بتشربى ماية كتير تكثرى من شربها فى الصيف والشتاء لأنها من أهم عوامل حيوية الجسم
إعرفى وصفات صحية أكتر من النت حسب ذوقك وإبتكرى ..
5- اكتشف موهبتك
فى أغلب الوقت أما اسأل حد هوايتك إيه يقولى مش عارف!!
موضوع أن الإنسان يكتشف هوايته دى حاجة بتاخد وقت لأن لو إنتى لسة متعرفيش هوايتك يبقى لازم تجربى تعملى أكتر من حاجة وتشوفى إيه أكتر حاجة حبتيها و أبدعتى فيها
إيه الحاجة اللى ممكن تاخد وقت فراغك كله وإنتى مبسوطة من غير ما تشعرى بالملل و دى هتكون هوايتك
جربى : الطهى ، الرسم ، القراءة ، الكتابة ، المشغولات اليدوية كالتطريز ، تعلم الجرافيك والفوتوشوب ، تعلم لغات
دى أمثلة بسيطة جداً لكن أكيد هتلاقى نفسك فى حاجة منهم
6- تأملى
التأمل من العادات الرائعة اللى ممكن أى حد يبدأ بيها يومه و بتعطيه طاقة إيجابية جداً و كنت إتكلمت قبل كدة عن ايه هو التأمل وفوايده بالتفصيل ، لقراءة الموضوع بالتفصيل : اضغطى هنا
7- انظرى للأماكن نظرة مختلفة
الموضوع ده بالذات ملوش علاقة بالسنة الجديدة ولا اى سنة لكن هى عادة جميلة جداً لو إتعودنا عليها هتغير أى شئ سلبى بداخلنا لإيجابية ، لما تكونى ماشية فى الشارع أو رايحة مكان معين ، أكيد هتلاقى فى طريقك حاجات كويسة وحاجاة سيئة يعنى ممكن تلاقى جنينة فيها أزهار وشجر وممكن تلاقى حد بيرمى ذبالة فى الشارع
مهمتك هنا إنك تنظرى لللأماكن نظرة إيجابية ، إبتسمى للحاجات الجميلة اللى بتشوفيها و فكرى فيها على إنها منة من ربنا للبشر والكون سواء كانت الحاجة دى السماء أو زهور أو شجرة أو حتى لو شوفتى ناس مبتسمة فى الشارع أو طفلة فرحانة
كل الحاجات الإيجابية دى هتغمرك بشعور إيجابى وبالسلام النفسى جداً
طبعاً ده مينفيش وجود أشياء سلبية كتير ، لكن حتى الحاجت السلبية تعاملى معاها بإيجابية
لو حد تعرفيه ألقى ذبالة فى الشارع إنصحيه بهدوء أو لو شوفتى أى منظر مش لطيف إدعى ربنا للشخص ده بالهداية و لازم يكون جواكى قناعة تامة إن فى أمل دايماً إن كل حاجة تتغير للأحسن بالنصيحة والدعاء والعمل.
8- بدلى من عاداتك السيئة
- مفيش إنسان كامل على وجه الأرض و دى حقيقة لازم كلنا نكون معترفين بيها ، لكن الأهم من كدة أننا ناخد خطوة إيجابية تجاه كل شئ سلبى زى ما قلت قبل كدة .
يعنى مثلاً تعرفى أن أى عادة محتاجة تكتسبيها ابدأى مارسيها 21 يوم فقط وهتلاقيها أصبحت عادة عندك!!
احضرى نوتة صغيرة و إكتبى فيها قائمة بإيجابياتك و قائمة تانية بسلبياتك و فكرى إنتى ليه إكتسبتى عادة سيئة ومن مين وإزاى تغيريها؟! إزاى تكونى أحسن؟
المحاولة نفسها بتنتج نوع من التفاؤل إنى بدات اشتغل على نفسى وأغير حاجات وحشة فيها بدل ما أوجه لنفسى كلام سلبى ( أنا وحشة ) ( أنا عارفة إنى مش هتغير )
و قائمة إيجابياتك دايماً هتشجعك إنك تتقدمى للأمام لأن بطبيعة الحال إنتى عندك صفات جميلة وبتميزك عن غيرك
9- اقرأى
- القراءة رغم إنها هواية إختيارية لكن لها أهمية كبيرة جداً
و قصدى بالقراءة هنا هى قراءة منوعة بين الكتب المفيدة والحقائق العلمية و روايات يكون لها هدف وبتناقش مشكلة إجتماعية مثلاً
لكن إذا وجهنا قرائتنا لنوع واحد فقط من الكتب أو الروايات ، ساعتها القراءة مش هيكون لها فايدة و مش هتعطينى شئ جديد
مثلاً : أنا عن نفسى عندى روايات فيها معلومات طبية حقيقية هايلة رغم إنى مش طبيبة لكنى بستفاد معلومات عامة فى هيئة رواية لطيفة ، عندى كتب عن التاريخ الفرعونى وكتب عن علم الفلك وقياس النجوم ، وروايات بتحكى مشكلات إجتماعية و كتب فلسفية.
فالتنويع مهم جداً لأنه بيساهم ببناء جزء كبير من الشخصية ورقيها
10- استثمرى فى نفسك !!
- لو رجعنا للنقطة الخاصة بالإدخار فأنا أقصد بالإسثمار فى نفسك يعنى ممكن أحتاج المبلغ اللى أدخرته ده فى أنى اتعلم بيه حاجة مفيدة أو حاجة بحبها من باب إنى بزود معلوماتى فى فرع من فروع الحياه.
التعلم مش مقتصر على المدارس والجامعات نهائياً لكنه مستمر مع الإنسان مدى الحياه بالمعنى الحرفى للكلمة.
حتى لو مادياً مش هقدر أخد كورس فى مجال أو المشوار ومكان الكورس بعيد فعندنا كنز إسمه النت أصبح متوفر فيه كم غير معقول من الكورسات فى شتى المجالات ، أنا لحد اللحظة دى مش ببطل أتعلم لأن فى رأيى ده أهم شئ فى الحياه بعد الدين والأسرة
11- تواصل مع العائلة والأصدقاء
كلنا لينا أصدقاء مقصرين فى حقهم ومش بنسأل عنهم و أنا أولكم ومش هقدر أقول إنى تمام فى النقطة دى ، لأن للأسف اليوم أصبح بينتهى بسرعة ومن كتر الحاجات اللى عايزين نعملها الوقت بيخلص وبننسى نسأل على صحابنا وأهلنا
بس أحسن حاجة إننا نستغل يوم الجمعة و نخصص وقت نكلم أهلنا و أصدقائنا بالتليفون بشكل سريع ، أو حتى نبعتلهم رسالة على وسائل التواصل الإجتماعى
صدقونى الموضوع ده بيفرق جداً معانا ومعاهم لأن فى النهاية مفيش أحسن من أن الناس المقربين لينا يظهروا إهتمامهم ناحيتنا ويسألوا علينا
و بعد فترة أما يصبح موضوع السؤال عليهم ده عادة أسبوعية أو مرتين فى الأسبوع ، هما كمان هيسألوا عليكى و هتنشأ علاقات أسرية وصداقة أكثر مرونة و ود
12- مارسى الرياضة
ممارسة الرياضة عمرها ما كانت مجرد ترف فى الحياه ، بالعكس هى ضرورة ومش مرتبطة بمستوى إجتماعى ولا مادى معين
ممكن تمارس الرياضة فى البيت أو فى الجيم أو حتى لو مفيش وقت للجيم ممكن استبدل مواصلة لمكان قريب بالمشى
ده غير إن فى النت متوفر فيديوهات كتير عن إستخدام أثاث المنزل لممارسة الرياضة بالنسبة للناس اللى مش هتقدر تخرج من البيت بسبب المذاكرة أو السيدات اللى بتراعى أطفالها.
13- اهتمى بملابسك و مظهرك
- إجعلى هدفك السنة دى الإهتمام أكثر بمظهرك سواء فى المنزل أو فى الشارع مع بعض التحفظات طبعاً لموضوع الشارع.
يعنى فى المنزل ممكن تهتمى أكثر بشعرك وبشرتك لأنهم عنوان جمال أى بنت ، ومش لازم أستخدم مستحضرات تجميل كتيرة جداً وغالية جداً علشان أهتم بنفسى.
بالعكس تماماً انا كتبت عن موضوعات هنا للعناية بالشعر والبشرة كلها بسيطة وحتى الوصفات كلها ممكن أحضرها بالبيت بسهولة ومش مكلفة ابداً
اما بالنسبة للشارع فالتحفظ الوحيد اللى أقدر أقوله للمحجبات : فكروا فى طريقة لبسكم وأسلوبه إذا كان يغضب ربنا ولا لأ ، وهل ممكن أخلى لبسى أطول وأوسع؟
فى بنات كتير مدونات عن الموضة و محجبات حجاب شرعى صحيح ، ممكن استلهم منهم أفكار لطريقة أخلى بيها لبسى أفضل ، ويستحسن بشكل عام سواء فى المنزل أو الشارع أقلل الميكب تماماً
صدقوا أو لا تصدقوا : أنا كل اللى بستخدمه زبد الكاكاو و كحل للعين فقط لا غير !!
ليست هناك تعليقات:
إرسال تعليق