علاقة شاكرا الجذر بأصحاب عنصر الهواء!

 

لو أنت درست العلوم الروحية أو قرأت عنها بشكل عام ، أو درست العلاج بالطاقة سواء البرانا أو الريكى ، فأنت بالتأكيد هتفهم معنى كلمة شاكرات ، لو أنت مش عارف يعنى ايه شاكرات اضغط هنا عشان تعرف أكتر
بشكل مختصر الشاكرات هم مراكز الطاقة الرئيسية اللى موجودة فى جسم الإنسان ، الشاكرات الرئيسية عددهم 7 و موجودين فى أماكن مختلفة.

شاكرا الجذر ... لونها أحمر و موجودة فى أسفل نقطة فى العمود الفقرى عند فتحة الشرج
شاكرا العجز.... لونها برتقالى و موجودة أسفل سرة البطن ب 5 سم
شاكرا الضفيرة الشمسية.... لونها أصفر و موجودة أسفل القفص الصدرى فى المنتصف
شاكرا القلب.... لونها أخضر و وردى و موجودة وراء القفص الصدرى
شاكرا الحنجرة.... ولونها أزرق و موجودة فى الحنجرة
شاكرا العين الثالثة.... و لونها أزرق سماوى و موجودة بين الحاجبين بالضبط
شاكرا التاج .... لونها بنفسجى و أبيض و موجودة فى أعلى الرأس فى المنتصف

 

بدون كلام كتير عن الشاكرات لأنى خصصت ليها مقال لوحدها و عشان مطولش عليكم ... احنا عارفين أن كل شاكرا مسؤولة عن حاجة فى جسم الإنسان ، فى اللى مسؤولة عن الأمن الداخلى و مركز التحكم فى الأنا و اللى مسؤولة عن التنوير و الروحانيات عند الإنسان و فيه اللى رمز الحكمة و هكذا...

لكن النهاردة موضوعنا مش على الشاكرات بشكل عام و لكن عن حاجة مميزة جدًا محدش كتير يعرفها
و هى : ايه علاقة شاكرا الجذر بالتحديد بأصحاب عنصر الهواء؟ و مين هم اصلا اصحاب عنصر الهواء؟

علم الأيورفيدا و اللى بيعتبر أقدم نظام طبى فى العالم و اللى نشأ فى الهند من حوالى 5000 آلاف سنة ، فلسفته الرئيسية بتقول أن عناصر الكون الخمسة اللى هم ( الأرض و الماء و النار و الهواء و الإيثير ) زى ما هم موجودين فى الكون كله و خصوصًا فى كوكب الأرض ، كمان هم موجودين فى جسمنا كلنا و لكن بنسب متفاوتة
فممكن نلاقى أن فى أشخاص العناصر الغالبة على جسمهم هى النار و فى ناس تانية الأرض و فى ناس الهواء و هكذا....

طيب نعرف منين العناصر الغالبة على جسمنا؟
فى أختبار مكون من مجموعة اسئلة بسيطة جدا بنعرف من خلالها أحنا ننتمى اساسا لأى عنصر (طبق الإختبار على نفسك من هنا) ( و لاحظ هنا أنى بقول أساسا لأى عنصر) لكن ده مش معناه أن باقى العناصر مش موجودة فى جسمى
و لكن بيكون فى عناصر هى الغالبة على الجسم و هى بتشكل المكون الرئيسى فى جسمنا

تعالوا نتكلم بالتفصيل أكتر عن أصحاب عنصر الهواء و علاقتهم بشاكرا الجذر
بعد ما الشخص يعمل اختبار الأيورفيدا ، لو لقى أن العناصر الغالبة فى جسمه هى عنصر الهواء فده معناه أنه له مجموعة من الصفات الجسدية أو العقلية أو الإتنين مع بعض بتكون شبيهة لعنصر الهواء
ازاى؟
اصحاب عنصر الهواء بيتميزوا بـ :
- جسم نحيف جدا فى الغالب
- أطراف باردة دايما فى الصيف أو الشتاء
- شعر خفيف و هايش أغلب الوقت
- حركة عينيهم مش ثابتة فى مكان واحد على طول بتتحرك كأنهم بيدوروا على حاجة
- جلد رقيق جدا و غالبا العروق ظاهرة فيه
- اسنان مش مرتبة
- جسمهم فى حركة دائمة و نادرا ما بيحبوا يقعدوا أو يثبتوا فى مكان واحد ( مفرطى الطاقة)

- شهية غير منتظمة للطعام (أوقات بياكلوا كتير جدا و أوقات مفيش شهية اطلاقا)

اما من الناحية العقلية بيتميزوا بـ :
- سرعة بديهة
- ذاكرة ضعيفة جدا و لكن بيتعلموا بسرعة
- أحلام بها حركة كبيرة و قفز و هروب و نط
- قلق و توتر شديد فى المواقف الضاغطة
- أرق مستمر و نوم خفيف جدا

الناس دى هم أصحاب عنصر الهواء و الإيثير مع بعض و علم اليورفيدا بيطلق عليهم (فاتا دوشا) أو فئة فاتا.

بغض النظر عن أن الأشخاص فاتا لازم يكون ليهم نظام حياه محدد بتقترحه الأيورفيدا من ناحية تنظيم النوم و الغذاء و نوع محدد من الخضروات و الفاكهة افضل ليهم من غيرها و طريقة طهى محددة أفضل لجسمهم من غيرها
إلا اننا مش هنتكلم عن العلاج الأيورفيدى بتاعهم فى المقال ده ، احنا عايزين نعرف ايه علاقتهم بشاكرا الجذر

فى الحقيقة علم الأيورفيدا بيدعم الشاكرات بشكل كبير جدا ، و بيشوف أن كل فئة من الناس سواء اصحاب عنصر الماء و الأرض أو أصحاب عنصر النار و الماء أو أصحاب عنصر الهواء و الإيثير بيكون لكل فئة منهم اضطراب فى شاكرا معينة لأن كل شاكرا من السبعة بتكون مرتبطة بعنصر محدد فلو أنا عندى عنصر من الناحية الأيورفيدية زيادة جدا و عنصر تانى ناقص جدا فده معناه ان الشاكرا صاحبة العنصر الناقص هيكون فيها خلل
لأن الهدف الأساسى للأيورفيدا و للشاكرات هو التوازن.... بمعنى التوازن بين العناصر الخمسة فى الجسم بدون زيادة مفرطة فى عنصر محدد أو نقص مفرط فى عنصر آخر ، و كمان الشاكرات هدفها توازن الطاقة فى كل شاكرا لأن زيادة نشاط شاكرا أو نقصان الطاقة فيها بشكل مفرط بردو له اضراره.

هنا زيادة عنصر الهواء بشكل مفرط فى الجسم بيصحبه خلل فى عنصر الأرض المسؤول عن شاكرا الجذر
عشان كدة لو ترجمنا الكلام بطريقة تانية... هنلاقى أغلب الناس اللى صفاتها الجسدية زى ما ذكرت فوق (نحيفة جدا ... جلد رقيق جدا... إلخ) عندهم أعراض زى عدم إحساسهم بوجودهم المادى و عدم الشعور بالأمان و السلام الداخلى (خلل شاكرا الجذر)

و من ناحية تانية .. لو شخص عنده شاكرا الجذر مغلقة و تلقى علاج بالطاقة سواء برانا أو ريكى ، المعالج هينصحه نفس النصايح اللى خبراء الأيورفيدا بينصحوها للشخص اللى عايز يضبط عناصر جسمه الخمسة
الفرق هنا أن النصايح بتاعة خبير الأيورفيدا هتكون عبارة عن تمارين تأمل و يوجا و نشاطات يومية هتساعده يوازن العناصر الخمسة فى جسمه إلى جانب نظام غذائى محدد من خلال دراسته للأيورفيدا
أما المعالج بالطاقة فبردو هينصحه بتمارين يوجا و تأمل معينة إلى جانب بعض النشاطات اليومية اللى هتساعده يفتح شاكرا الجذر عنده بدون التوصية بنظام غذائى.

بما أنى درست الأيورفيدا فهكتب نبذة بسيطة عن النصايح دى اللى موجهة للشخص :
- بما ان عنصر الهواء و الإيثير عنده طاغى فده معناه أن العناصر التانية (النار و الماء و الأرض) ناقصة بشكل ما ، فى الحالة دى ننصحه بالتواجد قدر الإمكان فى الأماكن اللى فيها مياه جارية متجددة زى التنزه بجانب بحر أو نهر.

- و بما أن عنصر النار عنده قليل هننصحه بتناول التوابل لأنها مسؤولة عن زيادة عنصر النار فى الجسم.

- و بما أن طبيعة عنصر الهواء بارد / جاف ... فده معناه أنه من الأفضل أنه ياكل الأكل المطهى جيدًا مش الأكل النيئ أو الغير مطهى اللى من شأنها أنها تزود عنصر الهواء أكثر ما هو زايد و ده هيزود الخلل!

- كمان فى بعض الفواكهة اللى ممكن تسببله انتفاخ شديد لازم يبعد عنها زى التفاح على سبيل المثال لأن التفاحة الواحدة ربعها هواء اساسا!

- آخر حاجة كمثال مبسط لأن الكلام يطول فى موضوع التغذية : من المفروض أنه يكثر من الخضروات و الفواكهة المزروعة فى باطن الأرض زى البطاطس و الجذر و أى شئ طينى لأنه محتاج يتصل بقوة الأرض أكثر عشان يشعر (بالثبات) و (الإستقرار)

فى الحالة دى النظام الغذائى و روتين النوم و تمارين التأمل و اليوجا مع العلاج بالطاقة من شأنهم تضبيط الجسم كله.
ده الهدف من المقال أساسا ان كل شاكرا مرتبطة بعنصر مرتبط بعلم الأيورفيدا
و نفس الشئ ينطبق على أصحاب عنصر النار و الماء و الأرض و لكن بشاكرات تانية و نظام آخر.