السلام عليكم و رحمة الله و بركاته
أغلب البنات بيحبوا يحطوا ميك أب و خصوصا فى المناسبات ، و لكن للأسف بيدفعوا مبالغ كبيرة عشان يشتروا ماركة كويسة و أقل ضررًا ببشرتهم
المشكلة هنا أن مفيش ميك أب مش خالى من المواد الكيميائية ( مهما كان ماركة ممتازة و معروفة ) و دى المشكلة اللى بتخلى أغلب البنات و خصوصا اللى بشرتهم حساسة بيعانوا من حبوب فى وشهم
مش بس كدة .. انتشرت مؤخرا كمان مشكلة أن كتير من شركات الميك أب العالمية بتدخل منتجات حيوانية بطريقة مهينة للحيوان ، و بدون أدنى رحمة
هل تعرفى أن الحاجة اللى داخل فيها منتج حيوانى بدون التعامل معاه برحمة ممكن تضر الجسم طاقيًا؟!
غير كدة ده بيعمل أختلال كبير فى التوازن البيئى
عشان كل المشاكل دى جبتلكم النهاردة الحل
بدائل للميكب و مستحضرات التجميل بمكونات بسيطة جدًا و من الطبيعة و سعرها مش عالى
أولاً بدائل كريمات الوجه :
بما أننا بنتكلم عن الميكب و الأيورفيدا فى نفس الوقت ، فأفضل بديل بتنصح به الأيورفيدا من الطبيعة هو زيت الزيتون و زيت جوز الهند و زيت السمسم
بيتم استخدام زيت السمسم فى الخريف و الشتاء و زيت الزيتون فى الربيع و زيت جوز الهند فى الصيف
طيب ليه التقسيمة دى؟
عشان الجسم فى الصيف بينشط فيه عنصر النار جدا ، و بيكون محتاج ملطف للبشرة و مفيش أجمل من زيت جوز الهند كملطف
و على العكس فى الخريف و أول الشتا مثلا بيزيد عنصر الهوا و الإيثير و فى آخر الشتا و بداية الربيع بينشط عنصر الماء و الأرض و هكذا
فكل وقت له نوع الزيت المميز له
ببساطة شديدة هنجيب ازازة الزيت من العطار (حسب فصول السنة زى ما قولنا ) و بناخد منه شوية ندهن به وشنا الصبح مرة و بالليل مرة
و النتيجة؟
الفرق خرافى بعد 5 ايام هتلاقى بشرة شابة تماما و مش هتحتاجى أى كريم مرطب نهائى بعد كدة ، و دى حاجة أنا عملتها و أعتقد ناس كتير علقت على بشرتى
ثانيا مقشر طبيعى :
- نص كوباية زيت جوز هند
- معلقتين عسل كبار
- معلقة كبيرة سكر بنى
- معلقة صغيرة قرفة
- عصير نصف ليمونة
بعد خلط كل المكونات دى ببعض ، بحطهم فى برطمان و اكتب عليه مقشر للوجه و بحطه فى الثلاجة و بستخدمه مرة فى الأسبوع
بسيبه على وشى 20 دقيقة و بعد كدة بغسل وشى بماية دافية
الخليط ده مش مكلف نهائيا و طبيعى تماما ، غير كدة أنه بيستخدم مكونات أيوروفيدية يعنى تم اثبات فعاليتها فى علم الأيورفيدا
ثالثا علاج مشكلة تشققات القدم
- البديل اللأيورفيدى لكريمات القدم الغالية جدا هو استخدام المقشر اللى قلنا عليه ده للقدم بردو و استخدام نفس الزيوت اللى اتكلمنا عنها قبل كدة بنفس ترتيب المواسم
رابعا : تونر للوجه طبيعى
ببساطة شديدة هنجيب من العطار
- بتلات ورد الناشفة دى
- باكيت شاى اخضر
بنفضل كيسين او تلاتة شاى اخضر مع بتلات الورد و نغليهم على النار كويس اوى ، بعد كدة بسيبهم يبردوا و بحطهم فى زجاجة بخاخ و اسيبها فى التلاجة
برش بيها على وشى الصبح عشان بتعطى نضارة و انتعاش للبشرة
خامسا بدائل الروج
الأول كمقشر للشفاه و علاج تشققات الشفاه بنجيب
- معلقة كبيرة سكر بنى
- قطرتين من الفانيلا السائلة ( اختيارى و لكنها رائعة)
- قرفة
المقشر ده بيستخدم مرة او مرتين فى الأسبوع حسب نسبة التشقق فى الشفاه ، و افضل حاجة بعدها هو دهن الشفاه بزبد الكاكاو بلون معتدل و حلو و ده بيخلينا نستغنى عن الروج تماما لأن الروج اصلا هو اللى بيسبب تشققات الشفاه مهما كان ماركة ممتازة
انتظرونى فى مقال جديد هتكلم فيه عن نصايح عامة للصحة من علم الأيورفيدا
و مستنية رأيكم و تعليقاتكم
حلو اوى اوى
ردحذفمفيش اجمل من الحاجات الطبيعية
دي حقيقة فعلا 🌿💙
حذف