بما أننا بنتكلم فى المدونة عن ألوان الحكمة القديمة اللى نسيناها وسط التطور الحضارى ، فأنا النهاردة هكلمكم عن علم و فن من فنون الحياه اللى بجد ملهم و مفيد بشكل انتم مش متخيلينه و حابة اقولكم حاجة مهمة ....
و هى أن الموضوع بالنسبة لى مش قريت عنه ولا عارفاه يعنى فقولت انقله ليكم مخصوص
موضوع الأيورفيدا أو الإسم اللى انتو شايفينه فى العنوان ده انا درسته على أيد اخصائية من الهند و اخصائية من الأرجنتين و أخيرا درسته فى معهد متخصص فى علم الأيورفيدا فى أمريكا
بس المسألة مش مسألة شهادات و لا انا جاية اقولكم شوفوا انا عملت ايه و سويت ايه
انا قولت كدة علشان انا درست حاجة و شايفة انها زى الجوهرة الثمينة اللى مينفعش الناس متعرفش عنها حاجة و تفضل متشالة كدة.
طيب ايه هو بقى الأيورفيدا ؟ و ازاى ده هيساعدنا اننا نضبط اكلنا؟
خلينا الأول نسأل اسئلة مهمة...
- عمرك حسيت أن أى حاجة بتاكلها مهما كانت بسيطة حتى لو تفاحة .. بتخلي تحس بإنتفاخ رهيب بعدها؟
- عمرك حسيت أنك قايم من النوم جسمك تقيل جدًا و مرهق جدًا كأنك منمتش؟
- طيب بالنسبة للناس اللى ايديها باردة على طول 24 ساعة سواء فى الشتا أو الصيف؟
كتير مننا فاكر أنه عايش بشكل صحى ... اساسا كلمة صحى دى أول ما نسمعها بييجى فى بالنا على طول ، نظام غذائى صحى بيعتمد على كميات من السلطة مع قطعة من الفراخ أو اللحم أو السمك
- خد زبادى بالليل و لازم معرفش نعمل ايه...
- امشى بمبدأ الصيام المتقطع اللى هو صوم 16 ساعة عشان المعدة تنضف نفسها اول بأول
- كل كل ساعتين
- اشرب ديتوكس اللى هو بتضيف قطع من الفاكهة زى الليمون و الفراولة و النعناع مع الماية و نشرب الماية دى عشان تنقى الجسم من السموم.
... و غيره كتير اوى من السيناريوهات اللى بتيجى فى بالنا اول ما نسمع كلمة (صحى)....
طيب هل فكرنا و لو لمرة واحدة أن أجسامنا كلنا مختلفة عن بعضها تمامًا و مينفعش نفس النظام اللى يمشى مع شخص يمشى مع التانى بالضبط؟
هو ده النظام الأساسى اللى بيعتمد عليه الأيورفيدا
الأيورفيدا بيفصل علاج مخصوص لكل واحد و نظام أكل لكل فرد لوحده حسب حالته بالضبط من غير ما يجمع المرضى كلهم فى خانة واحدة ، عشان كدة هو مُصنف كأقدم نظام صحى فى العالم من حوالى 5000 آلاف سنة و لسة موجود لحد دلوقتى كنظام تقليدى اساسى فى الهند و اتنقل اوروبا كمان و موجود لحد دلوقتى
يعنى ممكن لو روحت اوروبا تلاقى هناك حاليا عيادات ايورفيدا كتير كمان و خصوصا فى ألمانيا.
طيب ازاى بقى نعالج نفسنا بالأيورفيدا أو هو ايه مبدأه اصلا؟
الأيورفيدا مش مجرد نظم صحى طبى بس ، لكنه كمان نظام شمولى ، يعنى بيهتم بالصحة النفسية و العقلية و الجسدية للإنسان ، يعنى انا لو وصفتلك حاجة معينة تعملها كجزء من النظام الأيورفيدى ، ده هيحسن صحتك العقلية و النفسية و الجسدية مع بعض لأنه مش مجرد نظام طبى لعلاج الجسد بس ، الأيورفيدا بينظر للإنسان على انه جزء من الكون بالمعنى الحرفى للكلمة....
كل حاجة حوالينا قطعة من الكون و قطعة من عناصر الكون.... و كل ده بيتعايش مع بعضه فى تناغم.... و اى خلل فى طاقة اى حاجة منهم بتأثر على باقى الموجودات تلقائيًا.... و لو فى شخص بيعانى من عدم ارتياح فى حياته من الناحية النفسية او العقلية او الجسدية.... معناه وجود خلل فى المنظومة كلها لأنها كلها مرتبطة ببعض.
الأيورفيدا ككلمة مقسمة لكلمتين ( آيور) حياه و ....(فيدا)علم.
علم الحياه.... و أساسًا الأيورفيدا كنظام طبى بدأ ينتشر حاليًا بشكل كبير فى أوروبا هو طب بديل و لكنه فعال لأقصى درجة.... لأنه مش بينظر للمرض على أنه مجرد مرض و بيتعالج و خلاص
يعنى مثلا لو حد بيعانى من ثقل دائم فى جسمه أو صداع نصفى بيجيله كل شوية بشكل متكرر... ده مش معناه ان الأيورفيدا بيديله دوا للصداع ... لكنه بيؤمن أن فى خلل عميق له جذور قديمة فى نظام جسم الإنسان ككل.
عشان كدة الأيورفيدا هى فلسفة مُكملة بتطبيق...
فلسفة الأيورفيدا بتقول أن الإنسان جزء من كوكب الأرض اللى عايش عليه... و بالتالى جسمه مكون من عناصر كوكب الأرض الخمسة اللى هم الأرض و الهوا و النار و الماية و الإيثير..
يعنى ايه بقى الكلام ده؟
يعنى عشان الإنسان يعيش حياه صحية سعيدة عقليًا و جسديًا و نفسيًا لازم العناصر الخمسة تكون متوازنة فى جسمه و مفيش عنصر منهم يكون مسيطر أو متحكم أو غالب فى جسمه عشان ده هو منبع الخلل..... و خلونى اضيف لكم من الشعر بيت.... الكلام ده ايده الطب النبوى و ايدته كتب ابن سينا فى الطب كمان
طيب خلونى احكيلكم قصتى مع الأيورفيدا و ازاى بدأت اتحسن على أساسها
أنا أول ما عرفت عن الأيورفيدا لفتت نظرى جدًا جدًا لأنها مش متتشرة خالص فى الشرق الأوسط لأنه اصلاً علم هندى
معلمتى الروحية اللى علمتنى كل ده ... سمعتها مرة كانت ضيفة حلقة من الحلقات و كانت بتتكلم طبعاً بالأنجلش عن الأيورفيدا و ازاى أنه فى مرحلة ما من حياتها انقذها من الموت حرفياً ... فقررت أتعلم على ايديها مش بس الأيورفيدا و لكن حاجات تانية كتير يعنى و دى كانت بداية معرفتى العظيمة بيها و اللى خليتنى اتشرف بيها حقيقى.
المهم عرفت موضوع أن جسمنا مكون من العناصر الخمسة اللى قولت عليهم اللى هم النار و الهوا و الأثير و الماية و الأرض.... و قررت أعمل اختبار الأيورفيدا على ايديها عشان اعرف انا ايه العنصر الأساسى لجسمى و على اساسه أعالج نفسى بالأيورفيدا.... و على فكرة دى اجمل حاجة فى الأيورفيدا أن الإنسان أصلاً ممكن يعالج نفسه بنفسه.
طلعت نتيجتى أن عنصر الماية و الأرض هو الغالب فى جسمى و بعده عنصر النار فى الترتيب و لقيت أن عنصر الهوا اساسًا مش موجود خالص !! و دى كارثة !!!
اتعلمت منها انى لو استمريت على هذا الحال هعانى فى المستقبل من امراض كتير عشان كدة فورا بدات آخد خطوة لقدام...
عنصر الماية و الأرض اللى غالب عندى ده اساسا رمز للثبات و الإستقرار زى الماية و زى الأرض بالضبط.... يعنى تخيل معايا زى نهر و أرض زراعية و جبل ... الصورة دى عبارة عن عصر الماية الللى هو النهر و عنصر الأرض اللى هو الأرض الزراعية و الجبل..... فبديهيا بنلاقى الماية و الأرض مستقرين مش طايرين فى الهوا و الجاذبية اللى بتشدهم و بتثبتهم....فعشان كدة بنقول أن عناصر الماية و الأرض مستقرة و ثابتة... طيب ده ايه علاقته بجسم الإنسان أو بينعكس ازاى عليه؟
العنصر الغالب فى جسم الإنسان بيعطى الخصائص بتاعته للجسم بالضبط زى ما هى كدة .... يعنى مثلاً عنصر الماية غالب فى جسم الإنسان هتخلى بشرته لامعة... مفيهاش جفاف لأننا طبيعى بنتكلم عن عنصر الماية يعنى مفيش جفاف فى البشرة خالص و لا فى الشعر بردو.... بيخلى جسم الإنسان متثاقل اما يكون قايم من النوم... و بيحس بالأرهاق على طول لأن الماية طبيعتها الثقل .... التثاقل فى الجسم هنا مش بس بيكون فى الوزن و الحجم ...و لكن كمان ثقل و كثافة فى الأظافر و الشعر و ثقل فى العظام.... هو موضوع ثقل الشعر و العظام.... كمان لون شعر داكن فى الغالب زى لون الأرض بالضبط .... ده حلو بس صدقونى من ناحية ثقل الجسم ده بيخلى فيه معاناه.
طيب اوصافهم ايه كمان اصحاب عنصر الماية و الأرض غير الثقل ده كله؟
أنا قلت كمان غير الماية فيه الأرض ... الأرض يعنى ايه؟ .... يعنى رمز الإستقرار و الثبات.... يعنى نادرا ما بيحبوا يخرجوا من البيت... مش بيحبوا القيام بأى مجهود بدنى.... بيحبوا يقعدوا أكتر ما يقفوا.... بيحبوا جدًا الاسترخاء و الكسل. و الاستقرار فى مكان واحد وقت طويل.... عشان كدة بنلاقى أن أغلب أصحاب عنصر الماية و الأرض بيعانوا من سمنة بدرجات مختلفة حسب نسسبة الماية و الأرض فى جسمهم لأن مفيش حركة كتير... طاقتهم هادية و بطيئة زيادة عن اللزوم.
أتمنى كدة أكون وضحتلكم صفات الناس اللى غالب عندها عنصر الماية و الأرض.
و اللى أنا واحدة منهم !
بدات بالفعل آخد خطوات عشان أوازن العناصر فى جسمى ، و الخطوات دى فيها تفاصيل كتير جدًا من أول الغذاء و المشروبات و التمارين الرياضية و التأمل و البوجل و كل ده
و ده اللى هنتكلم عنه بالتفصيل فى الموضوع الجاي بس الأول هنتكلم عن أصحاب العناصر الخمسة بالتفصيل الممل و صفاتهم و مشاكلهم و بعد كدة هنتكلم فى العلاج
حابة بس انوه عن حاجة مهمة... انا بدرس الأيورفيدا أونلاين من مصادر معتمدة يعنى الكلام ده مش مجرد هواية و لا اى كلام... ده كلام أنا درسته بالتفصيل و قضيت فيه وقت مش قليل
و تقدر تحمل كتاب علم الأيورفيدا أو تقرأه من مدونتي على الرابط التالي
اضغط هنا
ليست هناك تعليقات:
إرسال تعليق