زراعة دوار الشمس فى البيت

 

زراعة دوار الشمس فى البيت من أمتع أنواع الزراعات اللى ممكن الإنسان يستمتع بيها 
لأن دوار الشمس فى رأيى له أكتر من فايدة لزراعته على المستوى الروحى و البيئى كمان
أولاً نبته دوار الشمس بتنمو فى خلال 3 أيام بس من بدء الزراعة نفسها  و ده بيدى أمل للناس اللى مستنية تشوف الزرع بتاعها يكبر بسرعة أنهم يكملوا إهتمام بيه لأن النتايج بتكون سريعة جدًا

و رؤية النبتة و هى بتكبر كل يوم بتبث البهجة و السرور فى النفس حتى لو لسة مجرد نبتة خضراء قبل ظهور زهرة دوار الشمس الصفراء المميزة اللى بتكبر بتظهر بعد حوالى 3 شهور من بداية الزراعة

زراعة دوار الشمس بسيطة جدًا ، كل اللى هتحتاجه بذور اللب السورى من أى محمصة لب و لكن بشرط أنه يكون نيئ و مش محمص
و بعد كدة بتجيب أصيص زرع و تحط فيه طينة عادية جدًا ملهاش أى خصائص خاصة اللى هى شائعة بالنسبة لأغلب أنواع الزهور و اسمها بيتموس

هتاخذ حبة لب أو 2 حسب حجم الأصيص و تزرعهم على مسافة من بعد مش لازقين فى بعض ، و على عمق حوالى نصف سم للأسفل بشرط أنه يكون الجزء المدبب متجه للأسفل
و يتم ريهم حسب الحاجة كل يوم مرة أو كل يومين و يتم إيداعهم فى شمس قوية جدًا

اتكلمنا عن فوايد زراعة دوار الشمس فى البيت على المستوى الروحى و قولنا أد ايه بتبث البهجة و السرور فى نفوس الزارعين ليها و المهتمين بيها ، و لكن مش بس كدة فعلى المستوى البيئى زراعة دوار الشمس كمان هتساعد جدًا النحل فى إنتاج عسل دوار الشمس اللى بيمتاز بخصائص علاجية هايلة
و طبعًا استخراج الرحيق مش هييجى من زهرة واحدة و لكن زهور كتيرة جدًا
على المستوى الجمالى فطبعًا اللون الأصفر أصلاً بيسر العين ، و لو شجعت أصدقائك و عيلتك على زراعة دوار الشمس فهنلاقى أغلب البلكونات مبهجة و شكلها جميل جدًا

و أخيرًا تذكر ان كل نبات بتزرعه بيسبح بحمد ربنا زينا بالضبط ، و أنت هتاخد ثواب على التسبيح ده لأنك زرعت النبتة من البداية !