إزاى نحدد هدفنا فى الحياه؟

 إزاى نحدد هدفنا فى الحياه؟

الفترة اللى احنا عايشينها دى تعتبر من اكتر الأوقات اللى الناس فيها ملخبطة فى تفكيرهم و قراراتهم... و ده مش جديد أوى علينا ... و يمكن كل ده حصل بسبب السنة اللى فاتت أول ما وباء كورونا فاجئنا كلنا و قلب كيان العالم كله

الفترة دى احنا اتعلمنا منها كتير اوى... قدرنا قيمة الحياه أكتر و قدرنا أهمية أهدافنا الحقيقية بعيدًا عن القالب اللى المجتمع بيحطنا فيه
لاااازم اتخرج من الكلية الفلانية عشان دى من كليات القمة...
و لازم اشتغل شغلانة معينة عشان اكون وجهة اجتماعية كبيرة و الناس تفتخر بيا

بس الأجازة اللى العالم كله خدها بسبب الوباء... واما كنا بنشوف اد ايه كل الأماكن الأكثر ازدحامًا و اللى دايما عمرانة بالناس من كل مكان و فى كل وقت...بقت اماكن شبه مهجورة ... و الصمت و الجمود بقى هو السمة الأساسية للعالم كله...

فى الوقت ده أنا شخصيًا نظرت لحياتى بشكل عميق و من بعيد... فكرت ايه اللى انا عايزاه فعلاً ... ايه اللى ممكن اعيد تفكير فيه خلال الإستراحة العالمية دى

فى الوقت ده بدأت أتعلم على ايد مُعلمين روحيين و استفدت منهم كم مهول من العلوم الروحية اللى كنت محتاجة اتعمق فيها أكتر لأنى كنت دايما حاسة أن البدايات عندى بس محتاجة إرشاد روحى كبير و عميق

من أهم الحاجات اللى اتعلمتها خلال الفترة دى هى ازاى أحدد هدفى بطريقة مش عايزة أقول عليها علمية و لكن هقول عليها روحية. و فعالة و مفيدة جدا

أول حاجة لازم يكون عندك وعى!
ساعات كتير بنشوف ناس قبل ما تُقبل على حاجة مهمة فى حياتهم بيصلوا... بيهدوا نفسهم عقليا من التفكير المفرط ... بيحاولوا يتجنبوا الكلام الكتير و الرغى اللى ملوش لازمة من ناس كتير عشان يصفوا ذهنهم قبل ما يبدأوا الحاجة المهمة دى ...و ليكن قبل الإمتحان مثلا.... الطلاب بيحاولوا قدر الإمكان يشيلوا الزحمة اللى فى دماغهم.

نفس الفكرة هنا بالضبط ! لما أكون عايزة أحدد هدفى لازم اصفى ذهنى و ابدأ أبص على حياتى كدة من بعيد و يكون الوعى بحياتى....

فى المرحلة دى هتحس أن ربنا خلقك عشان مهمة معينة تعملها فى حياتك.... و دى حقيقة... كل شخص ربنا خلقه عشان يحقق مهمة معينة أو من أجل معنى معين ... مهمة محدش هيعرف يعملها زيك ابداً و محدش هيعملها غيرك... حتى لو فى ناس كتير اتخلقوا عشان نفس المهمة ... لكن كل واحد بيعملها بطريقته و بأسلوبه اللى زى بصمة الصباع... محدش ابداً هيكون شبهك ....لأن طريقة نشأتك و الخبرات اللى مريت بيها و الحاجات اللى بتحبها و مش بتحبها و شخصيتك و الناس اللى آثروا فيك و فى حياتك... كل ده بيختلف من شخص للتانى

المهمة دى هتفضل تلح عليك فى دماغك زى النحلة.... انجزنى ... اعرفنى....
و بما أن الإنسان و هو لسة جنين بيشوف حياته كلها قدام عينه... فبيكون عارف ايه هى المهمة دى و لكن بينساها أما يتولد و بيكون مخه زى الورقة البيضا.... مهمتك بقى أنك تتذكر ايه هى المهمة دى

طب و ده معقول حد هيتذكر حاجة شافها و جو جنين؟
أنت مش هتفتكر ... لكن رووحك هتفتكر.... هتعرف
أنت مهمتك دلوقتى أنك تخلى روحك تفتكر... ازاى؟
فى طريقة روحية أتعلمتها من مُعلمينى اسمها .... دارما
الدارما دى كلمة بلغة هندية قديمة اسمها اللغة السنسكريتية.... و احنا عارفين ان العلوم الروحية موجودة فى الهند بكترة
طيب يعنى ايه دارما بقى بلغتنا احنا؟
دارما يعنى هدف روحك... الهدف اللى روحك اتخلقت عشان تعمله... الهدف اللى روحك عارفاه و محتاج تتذكره من زمن سحيق

طيب ازاى بقى نعمل كدة؟
فى محاور معينة لازم تركز عليها عشان تعرف الدارما بتاعتك

أولاً : اكتب فى ورقة ايه اكتر حاجة انت بتعملها و انت مستمتع بيها... حاجة بتحبها بدون سبب و بتحبها فعلاً و اما بتيجى تعملها بتحس أنك سعيد و مش بتمل منها ابدا؟ اكتب الحاجة دى و حطها جوا دايرة.....

ثانى حاجة : ايه الحاجة اللى بتعملها بسهولة شديدة و الناس بتحسدك انك بتعملها ببساطة شديدة من غير تدريب حتى!!
زى مثلاً شخص بيرسم حلو جدا من غير ما ياخد اى كورسات رسم أو شخص بيطبخ حلو جدا و يا دوب قرأ حاجات بسيط اوى عن الطبخ.... حاجة بتسرى فى دمك كدة كأنها هبة من ربنا بتعملها بدون اى جهد؟
بردو حط الإجابة جوا دايرة

تالت سؤال : ايه المشكلة أو العقبة اللى مريت بيها فى حياتك و عالجتها و قدرت عليها؟..... أو العقبة اللى غيرك مر بيها و انت ساعدته جامد جدا انه يتخطاها بسهولة ....و كنت داعم له أو داعم لنفسك؟.... ايه الحاجة اللى انت تقدر تخدم بيها الناس بشكل ممتاز اكتر من غيرها ...
حط الأجابة جوا دايرة....

مسموح على فكرة أنك تكتب أكتر من اجابة فى الدايرة الواحدة بس الأفضل انك تكتب الشئ الأبرز اللى يجيى فى دماغك ... لكن ممكن تكتب حاجتين ميفرقوش عن بعض ابدا و محتار تكتب انهى فيهم.

دلوقتى هتلاقى نفسك كتبت حاجات جوا الدواير دى متقاربة... حاجات بتمثلك انت بس....

هنطبق اجابات ال 3 اسئلة دى عليا عشان ابسطلكم ازاى لقيت الدارما بتاعتى

السؤال الأول.....
ايه اكتر حاجة بحب اعملها و بستمتع بيها.... حاجة بحبها بدون سبب و اما باجى اعملها بحس أنى سعيدة و مش بمل منها ابدا
إجابتى هى : الكتابة... انا بكتب من و انا عندى 9 سنين بدون اى تشجيع من حد أو تدخل من حد... انا بعمل كدة عشان بحب اعمل كدة جدا و بنسى الوقت و الدنيا و انا بكتب

السؤال التانى : ايه الحاجة اللى بعملها بسهولة شديدة و بتدفق من خلالى من غير اى تدريب عليها و من غير مجهود كبير... و الناس بتستغرب من انى مش متدربة عليها؟
إجابتى هى : الإلقاء الإذاعى.... و دى حاجة انا مكنتش متخيلة اصلا انى بعرف اعملها لأنى عمرى ما فكرت أعمل كدة
و اما جاتلى الفرصة فى راديو البداية خدتها و حسيت انى بتكلم بطريقة كويسة و بسيطة..... بعد كدة افتكرت انى و انا طفلة اما كانت بنت خالتى بتزورنى... كنت باخد الموبايل...و افتح المسجل الصوتى و هى كانت بتعمل نفسها نجمة معروفة و انا مذيعة و بسألها عن اهم اعمالها و بعمل معاها حوار قوى جدا و كانت ماما بتستغرب من تمكنى من الالقاء و بتقولى ممتازة!!

السؤال التالت : : ايه المشكلة أو العقبة اللى مريت بيها فى حياتك و عالجتها؟
إجابتى : انى خرجت نفسى من الإكتئاب اللى مريت بيه فى مرحلة معينة من حياتى و بدون اى مساعدة و بدون أدوية و بدون تدخل و دى حاجة مكنتش سهلة ابدا و كانت اسوأ مرحلة عديت بيها فى حياتى

أما جمعت الحاجات دى كلها مع بعض : الكتابة ، الإلقاء ، القدرة على مساعدة النفس
قولت لنفسى ان الحاجة اللى ممكن اعملها عشان اعيش الدارما بتاعتى كل يوم هى انى اكتب مقالات ... ده فيما يخص الكتابة.... اعمل قناه يوتيوب و ده فيما يخص الإلقاء الإذاعى.... و الحاجة التالتة انى ساعدت نفسى انى اتغلب على الاكتئاب... دى تعنى انى عندى القدرة انى اساعد الناس كمان... فربطت اجابة السؤال التانى بالتالت و قررت انى اعمل قناه يوتيوب تتحقق فيها الإلقاء الإذاعى و فى مواضيع اساعد بيها الناس اللى هم حضراتكم و ده عن طريق العلوم الروحية اللى اتعملتها و اللى بلاقى فيها نفسى جداً
أنا هنا عشان أساعد الناس يلاقوا طريقهم ... دى الدارما بتاعتى ... و بستخدم البودكاست و الكتابة عشان ارفع درجة وعى الناس بروحهم
الحياه بالنسبة لى عبارة عن دروس روحية مليانة بالحكمة.... دروس روحية مش اى حد هيفهمها من مصدرها ... انا هنا عشان اتعلمها لأنها بتغذى روحى... و ابسطها و انقلها ليكم و اقدمهالكم جاهزة...
مع الوقت الواحد بينسى هدف روحه او الدارما بتاعتة بس الأطفال ممكن يكتشفوها بسهولة لأن مفيش زحمة فى دماغهم و مفيش التزامات كتيرة عندهم... فلو من و هم اطفال عاشوا تجارب كتير أو جربوا حاجات كتير هيعرفوا مواهبهم و أهداف روحهم و هيتمكنوا منها و هيحولوها لشغل!
انتو كمان تقدروا أنكم تكتشفوا أهداف روحكم أو الدارما بتاعتكم عن طريق الخطوات دى ... بس الأهم انك تفضى دماغك من أى أفكار سلبية أو مُشتتة ليك .

طيب لو طنشت الخطوات دى ايه اللى هيحصل؟
أولاً هتلاقى نفسك عايش أهداف مضطر تحققها و هى مش بتاعتك و ملهاش علاقة بيك و مش بتسعدك ... و ده هيشكل عليك ضغط عصبى شديد جدا انك بتعمل حاجة مش حاببها و ده مع الوقت ممكن يوصل لأمراض نفسية سيئة جدا
ده غير نظرتك لنفسك انك مش سعيد و محققتش هدف روحك!

ثانياً : لو عرفت الدارما بتاعتك و قررت انك تحاربها و متحققهاش لأسباب تتعلق بالوجهة الإجتماعية فهى كمان هتحاربك !!
ازاى بقى؟
بعد ما تكتشف الدارما بتاعتك... ممكن تلاقى انها مش جديرة بالإهتمام أو متفرحش أو مجتمعك بينظر ليها على انها حاجة تافهة او مش مهمة أو مش ده اللى الناس تنبهر بيه
فى الحالة دى فى ناس هتحاول انها تعمل حاجات تانية غير الدارما بتاعتها.... فى البداية طاقة الكون هترسلك رسايل تنبيه عبارة ان أحداث ملخبطة تحصلك ... توهة ... ضيقة شديدة من غير سبب ترجعك لنقطة الصفر تانى
لو تجاهلت الرسايل دى مع الوقت ... الكون هيديك الرسايل الأصعب منها ... هتحس بضيقة أكتر و انك ضايع تماما و مش لاقى نفسك و لا حياتك و مخنوق و مكتئب و كل ايامك سيئة و تقيلة
ساعتها لازم تعرف ان الدارما بتاعتك بتتوق ليك انك تحققها ... مهمتك فى الكون مستنياك عشان تنجزها... و العالم كله مستنيك تساعده بطريقتك الفريدة اللى محدش هيعرف يعملها زيك.

لسماع الحلقة على اليوتيوب : اضغط هنا
لسماع الحلقة على أنكور : اضغط هنا
لسماع الحلقة على ساوندكلاود : اضغط هنا
لسماع الحلقة على جوجل بودكاست : اضغط هنا
لسماع الحلقة على بريكر : اضغط هنا
لسماع الحلقة على راديو بابليك : اضغط هنا
لينك صفحة الفيس بوك : اضغط هنا