برانا هو اسم بلغة قديمة اسمها اللغة السنسكريتية ، و دى لغة من اللغات اللى كانت مستخدمة زمان اوى فى الهند و لسة مستخدمة لحد دلوقتى فيها فى المعابد و الطقوس الدينية و اللغة دى اشتق منها كلمات كتير و خصوصا فى علم الطاقة.
فكلمة برانا هنا يعنى طاقة الحياه و باللغة اليابانية معناها (رايكى) و بالأغريقية
معناها بنوما و بالصينية تشى.
الهدف هنا انى اتكلم عن الطاقة بشكل علمى و مجالاتها ، و مش بس كدة انا
كمان هقولكم ازاى نستفيد منها فى حياتنا اليومية، لأن اى علم فى الدنيا لو
مستفدناش بيه على المستوى الاجتماعى او الشخصى يبقى ملوش لازمة.
كمان انا اخترت انى اتكلم عن الموضوعات دى لأنى اتقنت بعض فنيات استخدام الطاقة و
اتدربت عليها من 2012 و وصلت لمستوى كويس مع الوقت و كل ده هييجى كلام عنه
بالتفصيل.
طيب ليه بنتكلم عن علم الطاقة بلغات مش مألوفة؟ ليه منقولش علم الطاقة على طول كدة
بدل رايكى و برانا و تشى؟
لأن علم الطاقة ازدهر بشكل كبير جداً و معروف فى الصين و اليابان و الهند أكتر من
غيرهم لدرجة ان ارتبط فى دماغنا ان الكهنة الصينيين و اليابانيين و اللى عايشين فى
التبت أنهم ليهم قدرات خارقة مش موجودة عند أى حد تانى أو مش مألوفة فى أى مكان
تانى. و بالرغم من كدة علم الطاقة منشأه اصلا كان فى بلاد سومر عند السومريين اللى
هم العراقيين حالياً و انتقل بعدها لمصر و بعدها للهند و بلاد الهيمالايا و بعد
كدة التبت و استقر هناك.
كمان لازم نعرف ان كل منطقة فى العالم ظهر فيها استخدام الطاقة كان ليها طقوس و
طرق مختلفة لإستخدام الطاقة عن غيرها و ده
اللى خلى كل مسمى منهم له تعليمات مختلفة ، لكنهم فى النهاية كلهم متشابهين فى
الجوهر
طيب ايه هو علم الطاقة أو البرانا أو الكى؟ (أيا كان المسمى)
المقصود بالطاقة هنا هى الطاقة الكونية أو طاقة الحياه و بالنسبة لنا الطاقة دى
موجودة فى كل مكان.... مثلاً فى الغذاء اللى بناكله و بتحيط بكل شئ حوالينا زى
الكائنات الحية و حتى الجمادات.
الطاقة كمان بتنقلنا من مكان لتانى و بناخدها من عناصر الكون زى القمر و الشمس و
الرياح و البحر و البراكين و كل شئ.
بعض الناس هتفسر كلمة طاقة بأنها هى الطاقة اللى بتوصلنا الكهرباء و ده فى حد ذاته
مش غلط، لكن كلامنا هنا عن الطاقة اللى جاية من مصادر طبيعية تماماً
فى الحقيقة فى ناس ممكن تحس بالطاقة دى عن طريق اهتزازات صادرة من الجسم اللى
بينتج الطاقة دى ، لكن مش اى حد هيحس بالإهتزازات دى إلا لو كان متدرب كويس على
تدريبات روحية معينة و يكون الحدس عنده حالى.
فى ناس كتير فى حياتنا بيكون عندهم حدس عالى و حساسية شديدة للطاقة و بنلاحظ انهم
بيشعروا بطاقة المكان اللى هم قاعدين فيه سواء طاقة سلبية أو ايجابية.
- الطاقة دى بتأثر علينا كلنا بشكل يومى و بتأثر فى انجذابنا ناحية اشخاص معينة و
نفورنا من اشخاص تانيين ، و بيستخدمها المتمرسين فى علم الطاقة فى العلاج و لتحسين
حالتهم النفسية و العقلية و الجسدية.
بل و كمان بيستخدموها لإعلاء الطاقة الإيجابية فى البيت و تقليل الطاقة السلبية عن
طريق ترتيب البيت و تنظيفه بطريقة معينة و لحاجات تانية كتير اوى.
خليني أوضح أن الطاقة دى بنحس بيها و ممكن ندركها أكتر من أنى اشرحها و ده السبب
للأسف اللى خلى كتير من العلماء ميطلقوش عليها اسم علم لأن لسة ملهاش تعريف اجرائى
محدد أو منهج علمى لدراستها زى علم الفلك أو الكيمياء و باقى العلوم الطبيعية
مثلاً.
لو هقرب ليكم المعنى أكتر خلينى أقول ان كل الكلمات بتنقسم لمادية و معنوية
مادية مثلاً زى كرسى / جدار/ حجر و معنوى زى حرية/ سعادة و هكذا...
إنما الطاقة أو البرانا اللى بتكلم عنها هنا لا هى مادية و لا معنوية
ممكن أقول عليها روحية...
لأنها بيتم الشعور بيها و إدراكها أكتر من كونها كلمة ليها تعريف
الطاقة دى موجودة حوالينا زى ما قولت فى كل مكان و مش بس خاصة بالإنسان لكن هى
كمان خاصة بالنبات و الحيوان و الجماد و كلها بتتفاعل مع بعضها
و هنتكلم عن طاقة النبات بالتفصيل فى حلقة تانية و أنا واثقة أنكم هتكونوا مذهولين
من كم المشاعر اللى ممكن تكون عند النباتات اللى ممكن تزعل منكم و تحبكم أو تكون
مكتئبة أو سعيدة!! أيوه النباتات بتعمل كدة!
ساعات بندخل أماكن و نحس اننا مقفولين منها و ده معناه أن طاقة المكان مش منسجمة
مع طاقة جسمنا و الهالة اللى حوالينا و ساعات بنحس بإرتياح شديد فى مكان معين من
غير سبب و ده معناه أن طاقته الإيجابية عالية و محسوسة.
و ساعات تلاقى أجدادنا بيرشوا الملح لطرد الحسد من غير ما يعرفوا السبب و بنلاقى
فى الهند نفس الفكرة قرع الأجراس حوالين الشخص لطرد الأرواح الشريرة من حياته!
الحسد أو الأرواح الشريرة كلها طاقات سلبية و ليها فى المقابل طاقات ايجابية
بتغلبها ... ولو ألتزمنا بإستخدام المواد اللى بتحمل طاقة ايجابية فى بيوتنا و فى
محيطنا عموما هنحس بإختلاف شديد
فى ناس بتستخدم الملح و فى ناس بتستخدم الأحجار الكريمة لأن كل حجر كريم له خاصية
علاجية مختلفة و فى أحجار مخصوصة لنشر الطاقة الإيجابية فى المحيط بتاعنا و لتنظيف
هالتنا.
دلوقتى انا مش عايزة يحصل عندكم خلط بين الهالة و الطاقة
الهالة اللى هى Aura
و الطاقة اللى هى Energy
طيب ايه الفرق بينهم؟
الطاقة بتكون نابعة من داخل الجسم من مخازن الطاقة السبعة الموجودين فى الجسم اللى
اسمهم شاكرات
انما الهالة دى هى الشكل المتجسد للطاقة اللى بيتشاف حوالين الجسم سواء بالعين
المجردة أو بالجهاز.
طب هل إحنا نقدر نشوف هالتنا؟
الحقيقة المدربين بس هم اللى يقدروا يشوفوا الهالة دى ، و لكن المثير فى الموضوع
اننا كلنا اتولدنا عندنا القدرة دى على اننا نشوف الهالات و نحس بيها و على اننا
نتخاطر و و نتحكم فى طاقتنا و ننشرها بطريقة صحيحة و ننظف هالتنا بتصرفات معينة
لكننا فقدنا القدرة دى بسبب انعدام التدريب عليها و بسبب تغلب الحضارة و التلوث
الحضارى على كل نواحى حياتنا.
لكن العلماء اللى مهتمين فعلاً بدراسة الطاقة و بيحاولوا يفهموها اخترعوا جهاز اسمه كريليان.
عن طريق الجهاز ده يقدر شخص يقف وراه و العلماء يشوفوا من الجهاز طاقته أو هالتة و بتكون زى طاقة ضوء حوالين جسمه و ليها لون محدد ، و كل لون بيدل على شئ... يعنى ممكن تعرف من لون هالة الشخص اذا كان حزين او خائف او متوتر او فى حالة حب او حتى لو مريض قلب او اى مرض تاني.
و طبعاً لون الهالة لنفس الشخص بيتغير من وقت للتانى حسب حالته ، و بيتم علاجه على هذا الأساس.
انما الكهنة و الروحانيين زى ما قولنا بيشوفوها بالعين المجردة من كتر التدريبات الروحية اللى بيتلقوها ، و حتى لو مش كهنة بس لازم شخص يكون متدرب بطريقة معينة على التحكم فى القوى دى.
ليست هناك تعليقات:
إرسال تعليق