كورونا قعدنا فى البيت؟ مفيش مشكلة!

(مقال باللهجة العامية)

من غير مقدمة طويلة ، كلنا عارفين أهمية بقائنا فى المنزل الفترة دى بسبب إنتشار فيروس كورونا عشان مننقلش عدوى لاقدر الله لحد أو منخدهاش من حد  و نحافظ على نفسنا و أهلنا و بلدنا
لكن فترة المكوث فى المنزل بدون هدف ده شئ قاتل و خصوصاً للناس اللى متعودة تنزل يومياً للشغل أو لأى سبب
الفترة دى بشكل أو بآخر تعتبر هدية لينا من ربنا ، و أنا دايماً بشببها بأن العالم زى عجلة موتور سريعة فضلت تسرع أكتر و أكتر كل يوم لحد ما بقت تلف بشكل جنونى و بدأت تبوظ و تتحرق و محتاجة تقف لفترة عشان يتعمل لها صيانة و ده اللى بيحصل دلوقتى
الفترة دى محتاجة وقفة مع النفس و تقييم لأمور حياتنا كلها
و علشان كدة أنا جمعت شوية أفكار ممكن تساعدنا نحسن من نفسنا و نفكر إحنا محتاجين إيه تانى

1- قرب من ربنا
رغم إن القرب من ربنا شئ أساسى و مش محتاج أزمة عشان نبدأ نقرب ، لكن نفس الإنسان دايماً ملهية بتبعد و تقرب
و طالما إحنا الأيام دى مش ورانا حاجات كتير مهمة فلازم نبدأ ناخد الخطوة دى كلنا و ندعى ربنا يرفع عننا بلاء الوباء ده و إن كنت مقصر فى صلاتك فلازم تصلى أكتر و تزود من الوِرد اليومي للقرآن و أذكار الصباح و المساء
لو عودت نفسك فى الفترة دى على كدة ، هتكون دى نقطة فاصلة فى حياتك و هتلاقى نفسك مكمل بنفس الطريقة على طول حتى بعد الأزمة دى ما تخلص.

2- إقرأ

القراءة من الحاجات اللى أنا بعتبرها ضرورية جدا و مش مجرد هواية ، حاجة أساسية بتنمى قدرة العقل على الإبداع و الإدراك
ولو حابين تعرفوا أكتر عن أهمية القراءة ، اقرأوا المقالين دول كتبتهم قبل كدة عن فضل القراءة
بين القارئ و المقروء
لا تظلموا الروايات!

و إن كنت بتحب القراءة بس مينفعش تشترى كتب الأيام دى نظراً لإنعزال الجميع فى بيوتهم فأنا أرشحلك موقع مكتبة نور ، موقع مميز فيه أكتر من 90 ألف كتاب فى مُختلف المجالات و عمرك ما هتحس بالملل منه أبداً ، مع إمكانية تحميل أى كتاب و قرائته بشكل مجانى تماماً.

لينك مكتبة نور

3- مارس الرياضة فى المنزلالناس اللى كانت متعودة تروح الجيم و دلوقتى طبعاً ممنوع النزول ، تقدر تمارس الرياضة ببساطة فى البيت عن طريق إتباع تمرينات لليونة الجسم و تمارين الإحماء ، إما عن طريق فيديوهات اليوتيوب أو تطبيقات الموبايل المتنوعة اللى بتساعدك تحسب سعراتك الحرارية و كم السعرات اللازمة كل يوم.

4- ابعد عن السوشيال ميديا

مشكلة السوشيال ميديا إنها أصبحت زى سوق كبير ممكن تشوف فيه أى حاجة فى أى وقت من أى حد ، أنصح الناس أنها تبتعد لفترة عن الإشاعات اللى ملهاش لازمة و ملهاش هدف إلا نشر الذعر فقط بين المواطنين ، و طبعاً أغلبها شائعات عن فيروس الكورونا و طرق خطأ للوقاية منه و أخبار محصلتش هدفها إثارة ذعر الناس بس
ده غير توتر الأعصاب اللى بنشوفه بسبب ناس غير واعية بحساسية أزمة فيروس كورونا و ناس تانية بتوعى الناس دى و النتيجة أن الأطراف كلها بتتجادل مع بعض و ده بيسبب ليك توتر من غير لازمة
فحقيقى حاول تبعد عن السوشيال ميديا الفترة دى ، ولو أنت مينفعش تبعد حاول تتخطى اى منشور فيه شد عصبى

5- أطمن على اهلك و اصحابك

مش بس عشان أزمة الفيروس يبقى لازم أطمن، حاول تستغل الوقت أنك ترجع علاقاتك الكويسة مع أهلك و اصدقائك تانى وحاول تخلى نفسك إيجابى دايماً و طمن كل اللى بتتكلم معاه على أن دى أزمة و هتعدى
خليك الجزء الإيجابى فى الموضوع سواء بمكالمة او رسالة أو أى وسيلة تواصل عن بُعد

6- اتعلم دروس اونلاين فى أى مجال

أكيد فى مجال معين أنت مهتم بيه و كنت محتاج تطور نفسك فيه ومش لاقى وقت، و ده الوقت الأنسب علشان تطور نفسك فى المجال ده
فى أكتر من موقع بيقدم كورسات أونلاين فى كل المجالات و أنا أرشح منهم موقع إدراك للكورسات اللى باللغة العربية و اللى بتتيح ليك لإصدار شهادة فى نهاية الكورس بعد الإمتحان النهائى ( أخدت كورسين كاملين على الموقع ده من فترة و استفدت كتير جداً)
و فى كمان موقع أجنبى غنى عن التعريف اسمه موقع كورسيرا و اللى فيه كورسات باللغة الإنجليزية و فى منها مترجم للعربية

7- اتفرج على افلام وثائقية

الأفلام الوثائقية فكرة ممتازة للإستفادة بمعلومات عامة ، و طبعاً بما إن فى ناس بتحبها أكتر من القراءة فهتلاقوا أفلام وثائقية كتير جداً على موقع يوتيوب و أفلام نيتفليكس الوثائقية اللى بتقدم محتويات ممتازة

8- اكتب مذكرات

مش معنى إنك تكتب مذكرات إنك تكتب قصة حياتك... لا ابداً
أنا عارفة أن الطريقة دى مش مناسبة لكل الناس بس حقيقى فى ناس بيكون عندها مشاعر مكبوتة سواء حزن أو ذكريات مش جميلة أو حتى توتر من الوضع الحالى و فكرة أنك تجيب مجرد كراسة تعمل فيها رسومات بسيطة مع كتابات تفرغ فيها أى طاقة سلبية أو شعور سيئ بيحول مزاجك تماماً لشئ ايجابى و جميل
ممكن تعبر عن مزاجك بالكلمات أو بالرسوم أو بالاتنين مع بعض ، و ممكن تضيف للكلمات و الرسوم صور ليك كمان لو عندك صور قديمة من أيام طفولتك
ده مثال على اللى بقوله اضغط هنا

9- استرخى

مش معنى أن عندى وقت فاضى أنى لازم و حتماً إنى أعمل حاجة معينة، ممكن أقضى بعض الوقت (مش كله) فى عمل اللاشئ و استرخى لمجرد الإسترخاء بدون هدف حقيقى ، و ده مهم فى بعض الأحيان أنك تفضى دماغك من التفكير تماماً

10- اهتمى بنفسك و صحتك

بغض النظر عن التمارين الرياضية اللى سبق و اتكلمت عنها دلوقتى ، النقطة دى تهم البنات أكتر
جه الوقت اللى احنا كبنات نلاقى وقت كافى جداً نهتم ببشرتنا و شعرنا و نشوف وصفات منزلية مناسبة و نجربها
الموضوع ده هيخفف الضغط النفسى اللى احنا حاسين بيه بسبب انتشار الفيروس و هيخلينا مبسوطين شوية ، لأن زى ما صحتك البدنية مسؤوليتك كمان صحتك النفسية و ابتهاجك مسؤوليتك

11- بالنسبة لطلاب الثانوية العامة

أنا عارفة أن ده يمكن يكون أصعب وقت بيمر عليكم من أول السنة و أن السنة دى أصعب ظروف للثانوية من حيث أن مفيش أى مُتنفس ليكم و مفيش حتى خروج لمدة خمس دقايق  بره البيت و ترجعوا
و حقيقى أنتو أبطال السنة دى و عليكم ضغط نفسى جبار
بس أرجع و أقول أن انتم ابطال حقيقيين و محدش يقدر يلومكم لو اخدتوا شوية وقت للإسترخاء بعيداً عن ذغط المذاكرة و الضغط النفسى للوضع حواليكم
و فى الأول و فى الأخر ربنا بيعطى كل واحد على أد تعبه
قسموا وقتكم بين المذاكرة و الإسترخاء و استغلوه صح قدر الإمكان

12- فكر لقدام

دى من أكتر النقط اللى عايزة اتكلم فيها بس هى كانت لازم تكون آخر نقطة... ليه؟
هل بعد ما الأزمة دى تخلص كل حاجة هترجع زى ما كانت؟
هل سمعتم عن نسبة التلوث اللى قلت فى مناطق كتير من العالم بسبب إنخفاض النشاط البشرى اللى أدى بدوره لإنخفاض نسبة عوادم السيارات و تلوث الهواء و أنا واثقة أن ده انعكس على البيئة بشكل مباشر و غير مباشر كمان
اللى أنا عايزة أقوله هنا إننا لازم نفكر فى طرق بسيطة كأفراد عاديين نحافظ بيها على البيئة و نحمى بيها الكوكب بما أننا مش مؤسسات كبيرة أو شخصيات عامة
إزاى ممكن نحقق ده؟
ابسط طريقة ممكن أننا داخلين على فصل الربيع و ممكن نستغل ده فى زراعة زهور أو نباتات عشبية أو نباتات زينة فى كل مكان حوالينا سواء فى البلكونات أو أسطح العمارات أو حتى أشجار قدام مداخل العمارات
ده هدفه أنه يزود نسبة الأكسجين و ينقى الهواء من حوالينا
ممكن كمان نحافظ على الماية و نقلل استهلاكنا للماية بشكل عام على أد إحتياجنا بس
ده غير أننا لازم نفكر فى فكرة تعقيم إيدينا بإستمرار و المحافظة على سلامتنا العامة حتى بعد زوال الفيروس تماماً و إنتهاء الأزمة من باب الحد من أى نوع من أنواع التلوث على المدى البعيد

الفيروس جه و كان صدمة لينا كلنا بشكل كبير و خلانا نلف حوالين نفسنا و عطل نشاطتنا اليومية تماماً و غير كل خططنا ، بس لو بصينا للأمر على أنه نقطة تحول للأفضل ممكن نستغلها عشلان نحسن من نفسنا فى كل حاجة هنعتبر نفسنا إنتصرنا فى المعركة دى!