بما أن اغلبنا زهق تماما من السوشيال ميديا و من الكلام الكتير اللي ملوش لازمة عليها و من الأخبار الكئيبة و الحوادث اللي تقفل يوم الواحد
احب اقولكم أن في بدائل كتير جدا ليها و أفكار تبدأ تعملها في حياتك غير أنك تفضل تعمل سكرول و خلاص
و كل الأفكار اللي هقولها دي حاجات أنا مريت بيها بشكل شخصي يعني ممكن حد يحبها و حد ميحبهاش فأختاروا المناسب ليكم
يلا نبدأ...
1- اهتم بإيميلك
قليل أما حد بيدخل على ايميله يوميا يصفي الرسايل اللي ملهاش لازمة اللي غالبا بتكون بالآلاف ، و الأغلب اننا بنشوف الرسايل بس في حالة تغيير كلمة السر لأي حاجة مشتركين فيها تبع السوشيال ميديا عشان نشوف الكود و كل الكلام ده
لكن مؤخرا انتبهت لإيميلي و بدأت أمسح آلاف الرسايل اللي ملهاش أي لازمة و ألغي اشتراكي في قوائم رسايل كتير جدا من مواقع انا مش عايزاها و ده ساعدني بشكل كبير أني أخرج من دائرة عك السوشيال ميديا و اقرأ اللي أنا حابة اقرأه و بس.
الموضوع هياخد وقت بس بجد جميل أنك تتابع ايميلك بعد كدة بشكل يومي و تحتفظ بالرسايل اللي انت عايزها بس
2- تابع مدونات و مواقع مفيدة
الموضوع ده مرتبط نوعا ما بالإيميل... اما تشترك في نشرات المواقع اللي بتحبها هتلاقي رسايل يومية على الإيميل بمقالات تخص المجالات اللي انت مهتم بيها ، هتلاقي نفسك بتبدأ يومك بقراية حاجة أنت بتحبها و ده في حد ذاته هيفتح قدامك أفكار كتير مكنتش تتخيلها.
و ممكن طبعا تضيف المواقع اللي بتحبها لقائمة المفضلة بحيث يكون سهل توصل لكل المواقع اللي بتحبها بسرعة و سهولة
مش عارفة ارشح مواقع معينة لأن عدد المواقع لا حصر لها بس ابحث في جوجل عن اهتماماتك و هتلاقي مواقع بتتكلم عن الحاجات اللي بتحبها و بس
3- اسمع بودكاست
الناس اللي مش غاوية قراية مقالات من على مواقع و بتقضي جزء من يومها في مواصلات أو في انتظار اي شئ و بتحس بملل... تقدروا تحملوا على الموبايل ابلكيشن رائع اسمه Podcast Go
ايه هو البودكاست؟
عبارة عن راديو خاص... كل واحد بيكون له قناه بينشر حلقات و بيتكلم في حاجة هو عايز يوصلها للناس... كأنه منشور على الفيس بوك بالضبط بس مسموع مش مكتوب ... لو دخلت على الابلكيشن ده من الموبايل هتلاقي قنوات كتير... في قنوات دينية و حاجات تخص الغذاء ، مشاكل اجتماعية ، موضوعات عامة ، مجالات اكثر تخصصا زي الهندسة و الطب و تعليم اللغات
كل اللي عليك انك تبحث عن اسم مجال بتحبه او حاجة حابب تسمعها و هيجبلك كل القنوات اللي بتتكلم في نفس المجال ده ، اعملهم متابعة و هيجيبلك اشعار كل ما حد ينزل حلقة جديدة و استمتع!
كمان ممكن تحمل الحلقة ( مش هتنزل على الموبايل لكن بتكون جوه الابلكيشن نفسه ) و لكن اما بتحمل الحلقات بتقدر تسمعها من غير نت بره البيت و اما ترجع البيت امسحهم عشان المساحة و حمل حلقات جديدة اليوم اللي بعده قبل ما تنزل مشوارك
كمان ممكن تضيف الحلقات اللي بتحبها للمفضلة جوه الابلكيشن عشان تقدر ترجع تسمعها تاني اي وقت
4- استلهم أفكار جديدة
لو أنت ليك شغلك الخاص أكيد هتلاقي افكار كتييير تخص شغلك على موقع pinterst ، و حتى لو مش ليك شغل خاص ممكن تدخل pinterst بس تتفرج و تستمتع و صدقني هتلاقي أفكار تلهمك أنك تبدأ حاجات حتى من الصفر زي مشروع صغير مثلا
الصور دايما مُلهمة بالنسبة لي حتى لو معملتش بيها حاجة معينة.
عندك كمان ابلكيشن رائع اسمه Tumblr هو نفس فكرة pintrst لكنه بيميل اكتر لعرض الصور للناس اللي بتحب تتفرج على الصور و تستلهم منها أفكار... ممكن يكون مش زي pinterst لو انت عايز افكار لشغلك لكن Tumblr أنسب للناس اللي بتحب تلاقي صور جميلة تلهمها أو تتعلم تكنيك جديد للتصوير اصلا.
5- اشتغل على النت
طبعا النت مش مجرد تسالي ، و كلنا عارفين أن في ناس معتمدة على النت بشكل اساسي كمصدر للعمل ، عندك مواقع كتير جدا فري لانسر ممكن تشتغل عليها زي ( Freelancer ، مستقل ، Upwork) كلها مواقع تقدر تشتغل عليها و تقبض فلوس بالدولار
و الشغل بيكون تقديم خدمة محددة في وقت محدد.
يعني مثلا حد طالب ترجمة مقال للغة معينة ، ادخال نص على word ، تصميم موقع أو تصميم أي حاجة... و هكذا
ممكن حاجات زي كدة تشتغل عليها بعد شغلك الأساسي أو أي يوم و أي وقت حسب ما تتفق مع طالب الخدمة
يعني شغل عالماشي بس فلوسه كويسة اوي و في ناس معتمدة عليه كمصدر دخل أساسي زي ما قولت
6- اتفسح عالنت!!
وقت الريست و عايزين نغير جو و نشوف مدن جديدة بس مش عايزين ننزل من البيت.. نعمل ايه؟
ادخل على موقع Drive and Listen من الكمبيوتر او حمل التطبيق اللي بنفس الإسم على الموبايل ( بس هو شغال على الكمبيوتر افضل)
اما تدخل الموقع ده هتلاقي قائمة بمدن كتير حول العالم ، اختار اي واحدة منهم و هتلاقي نفسك قاعد في عربية و بتسوق في شوارع المدينة و تتفرج عليها و تشوف الناس و شكلهم و المباني و كل شئ
ادخل الموقع و هتفهم قصدي
7- طب احنا عايزين نتعلم!
يا سلام هو في احلى من كدة!
اجمد موقع بالنسبة لي للتعليم هو موقع Udemy لييييه؟
في مواقع كتير للتعليم و الكورسات بس انا بحب Udemy عشان اولا اخدت من عليه كورسات كتير جدا ( بقينا عِشرة عمر) ، ثانيا بقا الكورس اما بتشتريه من عليه بيكون معاك للأبد بمجرد ما تعمل حساب على Udemy تقرر ترجع للكورس تاني أي وقت و تعيش حياتك و ملوش مدة محددة ، وقت ما تخلص على مهلك بتاخد شهادتك ، و فيه كورسات في كل المجالات
ثالثا بقا و دي أهم نقطة بحب Udemy بسببها و هي أنه بيعمل خصومات جامدة على كل الكورسات و كمان الدفع بيكون من رصيد موبايلك ! ايوه حضرتك زي ما بقولك كدة
بتشحن رصيد بقيمة الكورس و بتدفع من تطبيق Udemy و هو بيسحب من رصيدك قيمة الكورس و خلاص على كدة
بالله عليك لسة عايز تخش عالفيس تشوف أم بردقوش قالت ايه و ام سماهر ردت عليها بإيه؟ 😐
ليست هناك تعليقات:
إرسال تعليق