النهاردة هكلمكم عن وصفة من بردية قديمة من عصور الحضارة المصرية القديمة
قبل ما اقول الوصفة اقولكم نبذة عنها...
وصفة (حلوى جوز النمر).. من الوصفات النادرة اللي طريقة عملها كانت موجودة بالتفصيل علي جدار مقبرة الوزير رخمير Rekhmire وزير الملك تحتمس الثالث في القرن الخامس عشر قبل الميلاد.
المقبرة رقم ١٠٠ في طيبة ( الاقصر حاليا) الاسرة ال ١٨.
و رغم انه مش شائع أنك تلاقي وصفة طعام على جدارية إلا أن دي الوصفة الوحيدة اللي اتسجلت
نيجي بقي للطريقة :
١- نجيب كمية من حب العزيز من عند اي عطار و نطحنه في مطحنة العطار مش في البيت لأنه ناشف جدا و ممكن يكسر المطحنة المنزلية
٢- ننخل الدقيق الناتج من طحن حب العزيز كويس و نحطه في سلطانية غويطة
٣- نضيف مقدار من العسل بالتدريج لحد ما تتكون عجينة طرية و نعجن بإيدينا و نقدر بعنينا كدة كمية العسل مع مطحون حب العزيز لحد ما تتكون عجينة مناسبة
٤- نجيب صينية مسطحة و نحط فيها حتة زبدة و نحط العجينة و نفردها بإيدينا علي اد دايرة الصينية و نحطها على النار هادية تستوي
٥- نشيلها من على النار اما ريحتها تبقى زي الشواء مش زي شئ محروق (و ده اللي حصل معايا)
٦- بعد ما تبرد العجينة بنشكلها على شكل أقماع زي ما في الصورة لأنها كانت بتتقدم بالشكل ده
جربتها و ريحتها تجنن
ردحذفشكرا ليكى