أغلب الناس الأيام دى بتعانى من ثرثرة الفكر أو زى ما الناس بتحب تسميه Over Thinking
ازاى نتغلب على ثرثرة الفكر؟
مبدأيًا كلنا عارفين أن كل مشكلة عشان نحلها من جذورها لازم نفهم سببها
يعنى مينفعش حد بيعانى من ثرثرة الفكر و أقوله روح نام هتصحى كويس أو روح العب رياضة هتخرج الطاقة اللى جواك و تهدى و خلاص على كدة
طبعًا الرياضة و النوم مهمين لصحة الجسم لكن مش هم سبب المشكلة و الحل مش فيهم
التفكير عبارة عن ترددات و طاقة ، مش بس فى حدود دماغك أو قلبك و لكنها بتسرى فى الكون كله و بتعود ليك من جديد.
التفكير نعمة كبيرة من عند ربنا و خص الإنسان بيها دونًا عن باقى الكائنات الحية زى النباتات و الحيوانات
ايه اللى ممكن يحول نعمة التفكير لنقمة؟
مبدأيًا التفكير مبيقفش ! و مش هيقف إلا لما القلب و الكبد و الكلى يقفوا ! هل تحب كدة؟
مش من الصحى أنك توقف تفكير لكن تقدر تتحكم فيه و متخليهوش يستهلكك
مشكلة التفكير الزائد بتتلخص فى النقط دى :
1- أنك تكون بتفكر فى أحداث محتمل انها تحصل فى المستقبل ، غالبا ممكن تكون خايف من المستقبل و بتفكر فى احداث سيئة هتحصل ، فيبدأ عقلك يصدق الأحداث دى على انها واقع فعلا رغم أنها مجرد أفكار أو ترددات فى دماغك فقط لأن محدش عارف فعليًا ايه اللى هيحصل فى المستقبل
و ده يرجعنا لنقطة مهمة جدًا ، مفيش حاجة اسمها أفكار ايجابية ، و افكار سلبية. الأفكار ما هى إلا مجرد أفكار ممكن تتحقق و تبقى واقع و ممكن تفضل افكار فى الدماغ. فى الحالة دى انا مينفعش أبنى حياتى على مجرد أفكار لكن ابنيها على واقع و ابدأ اتصرف على أساسه. إذا اختلقت فكرة أنت مش بتحبها هتفضل مجرد فكرة ملهاش أى قوة حقيقية ، اما لو حولتها لواقع فهتدمرك.
2- تانى حاجة هى الإسهال الفكرى ( و أنا آسفة فى اللفظ)
لو أكلت أكلة ملوثة من الخارج و جسمك رافضها هتعانى من داء الإسهال . نفس الشئ بيحصل مع التفكير ، عقلك بيستقبل الأفكار من الخارج و يخزنها من غير ما يفكر ايه المناسب اللى ممكن ارسخه جوايا و ايه اللى مش مناسب اللى لازم اطرده من دماغى ، و بالتالى هتاخد آراء الناس فيك أو أى افكار تانية غريبة على انها ثوابت فيبدأ عقلك يعانى من دخول اشياء غريبة له زى الفيروسات ما بتهاجم جسمك بالضبط . و الحل هنا أنك تفكر فى أى كلمة تتقالك و تكون قبلها عارف نفسك كويس اوى و عارف عيوبك و مميزاتك
و تبدأ تفكر فى اى فكرة تجيلك من بره : هل هى مناسبة؟ هل بتعبر عنى ؟ هل ده أنا؟
يعنى تشغل الفلتر بتاع عقلك قبل ما تستقبل اى حاجة
ايه الفرق بين الإسهال الفكرى و بين التفكير؟
التفكير عملية عقلية رائعة جدًا و مش مزعجة زى ما الناس بتشكى. الإزعاج بييجى من الإسهال الفكرى اللى بيتم من غير وعى يعنى افكار كتير أنت مش بتحبها بتتدفق لعقلك و بتحولها لواقع جواك و تبدأ تعيش الأفكار دى كحقيقة
إنما التفكير بيتم بوعى و أنت عارف أنك بتفكر لحل لموضوع معين أو بتفكر بنظرة تأملية فى أى حاجة حواليك و فى الآخر بتحس بالإلهام و بشعور رائع. هو ده التفكير.
طيب لو ملحقتش نفسك و ضبطت النقطتين اللى فاتوا دول ايه اللى ممكن يحصل؟
أولاً : على المستوى الجسدى هتحس بخمول رهيب ، لأن طاقة الجسم الحيوية أو البرانا بتتأثر و بتفنى إما فى نشاطك البدنى أو العقلى ، و فى حالة إستهلاكك للتفكير دون وعى بكل مفرط ده بطبيعة الحال هيستنزف طاقتك بحيث ميبقاش فى وقت للقيام بأى نشاط
هتحس أنك قاعد فى السرير أو فى البيت و مش قادر تتحرك من مكانك و هتحس أنك مختبرتش اى شئ جديد فى الحياه.
و كل ده ليه؟
عشان بتعانى من إسهال فكرى و أنت فاكره تفكير بالمعنى الصحيح و بعدين ترجع تقول عايز أوقف تفكير!!
علشان كدة لو أنت بتعانى من التفكير الزائد و أقتنعت بكلامى أفتكر النقطتين دول كويس اوى و أكتبهم فى ورقة ملاحظات و علقهم فى مكان واضح قدامك عشان دايمًا تفتكر أنك متستهلكش تفكيرك فى شئ مش أنت أو مش بيعبر عنك .
و ثانيًا أن مفيش حاجة إسمها فكرة إيجابية أو سلبية و أنك انت اللى فى ايدك تعطى للفكرة الجيدة قوة أو تتركها و تنساها.
ليست هناك تعليقات:
إرسال تعليق