و ده حصل لى مع السباحة !!
أنا فى البداية كنت بلعب كرة طائرة بس و مكملتش فيها لظروف خاصة و كنت حزينة جداً ، فضلت منقطعة عن الرياضة لفترة طويلة لحد ما وزنى زاد و قررت أنى أدور على أى رياضة تانية متاحة
لقيت بالصدفة أن السباحة فى طريقى
و بالرغم من انى بحب البحر و بحب أعوم عموماً لكن بعوم بطريقة عشوائية ، و عمرى ما فكرت أتعلم حركات السباحة الأربعة و اتقنها لأن السباحة كرياضة مش فى دماغى خالص
و بعد محاولات كتير أنى ارجع للكرة الطائرة و كلها محاولات فاشلة ، اضطريت للسباحة !!
عمرى ما تخيلت أنى ممكن أحب السباحة للدرجة دى و يمكن أكثر من الكرة الطائرة نفسها
حسيت أنى لقيت شغفى فى الحياه اللى فضلت أدور عليه 3 سنين من بعد التخرج بدون فايدة
اتأكدت أن ربنا بيضعنا فى الطريق المناسب لنا و طريق الخير ، حتى لو ده مش إختيارنا فى البداية
بعد فترة تدريب لا بأس بها ، بدأت اتسابق مع اصدقائى فى حمام السباحة بشكل ودى و لقيتنى بسبقهم و إكتشفت أن لياقتى أعلى من بنات أصغر سناً منى حتى !
لو هتكلم عن السباحة علمتنى إيه ؟
بغض النظر عن اللياقة البدنية اللى بدأت أحس بيها من جديد ، السباحة علمتنى الثقة بالنفس و الإقدام بطريقة غير مباشرة !
بالرغم من أنى ساعات كتير ثقتى فى نفسى بتتهز ، و الإقدام عندى شئ مش موجود أساساً ، إلا أنى اكتشفت أنى بدأت أتمتع بالصفات دى بعد تمرينات السباحة ، و بدأ خوفى من الأشياء يقل بالتدريج
و ده شئ أنا مكنتش عاملة حسابه رغم أنى قررت أتعلمها لأكتساب بعض اللياقة فقط !!
و أصبحت ممتنة لكل كلمة تشجيع من مدربتى و بنسى مع أى كلمة إيجابية أى تعب أو إرهاق ، بل بالعكس حاسة إنى محتاجة اجتهد أكتر و أثبت أنى لسة قدامى لياقة أعلى أقدمها
علشان كدة أنا حقيقى ممتنة للرياضة العظيمة دى لكل حاجة أعطتها لى جسدياً و معنوياً
ليست هناك تعليقات:
إرسال تعليق