احنا عايزين النيزك

الكلام باللغة العامية

فى الفترة الأخيرة كل ما أفتح الفيس بوك و ألاقى مثلاً فيديو فيه إسفاف أو ناس بتعمل مواقف غبية أو ناس مش بيقدموا أى محتوى أساساً بس طالعين بيعملوا حاجات غريبة بهدف الشهرة بس و أنهم يكونوا حديث الساعة لدرجة انى سمعت أن فيه قناه على يوتيوب صاحبها طالع بيشتم و بيعوج فمه فى الكلام عشان يضحك الناس ( قلة كرامة تفوق الوصف )
والبعض الآخر بيقدموا محتويات خارجة زى مثلاً البنات اللى بتطلع تغنى بطريقة مش كويسة أو لابسين ملابس مش محتشمة
و طبعاً ربنا يهديهم لأن ده بقا إسمه جنون

بغض النظر عن أن كل ده غلط و كل دى فتن ، بيثير أعصابى الناس اللى بتقول ( النيزك بقا يارب ) و المقصود يعنى أنهم بيدعوا ربنا أن النيزك اللى هيخبط الكرة الأرضية عشان الحياه تنتهى و يخلصوا من البشرية من كتر الغباء و البلادة اللى أصابت الناس ، و قلة الإيمان اللى أصابت البعض الآخر

لكن التعليقات دى مش أفضل حالاً من المحتوى الفاسد المقُدم ، لأننا ببساطة مينفعش ندعى غير بالخير لنفسنا و للناس لكن فكرة إنى أدعى بالفناء لمجرد أن فى شخص مش سوى بيعمل حاجات غريبة فى فيديو
الموضوع نفسه غريب و مُنفر!!

وصل الأمر بالبعض أنهم بيستهينوا بالدين و بيتريقوا و هما مش عارفين مدى عظمة الشئ اللى بيتكلموا عنه و أد إيه شئ مخيف مكنوش قالوا كدة
لقيت مرة تعليق من شخص ( أنا هروح أحفر مع يأجوج و مأجوج ، حد جاى معايا ؟ ) يعنى وصلت الإستهانة بالقرآن للدرجة دى !!
و كل ده عشان إيه اصلاً؟

خلاصة القول إننا فى زمن فتنة زى ما حكيت قبل كدة و أفضل شئ نعمله اننا نشجع الكلمة الطيبة اللى ترضى ربنا و ندعى لنفسنا و لغيرنا و للناس كلها بالخير و الصحة و السعادة
و أبسط شئ نبعد عن أى إسفاف و ندعى بالهداية لأصحاب القلوب المريضة لأننا كان ممكن نكون مكانهم لولا نعمة الله علينا ببعض الحكمة و التفكير و سلامة العقل و الإيمان
يمكن ربنا إبتلاهم ليكونوا أفضل بعد كدة بشكل ما 

محدش عارف بكرة إيه اللى هيحصل!!
دمتم سالمين