الثلاثاء، 19 مارس 2019

أسطورة إيزيس و أوزوريس

مارس 19, 2019 4 Comments

صورة لمدخل معبد فيله و الموجود فى جزيرة فيله بمحافظة أسوان جنوب مصر

تعتبر (إيزيس) إلهه رئيسية فى الديانات المصرية القديمة ، فقد عُرفت على أنها ربة الشمس و القمر ، و قد أطلق الناس عليها الكثير من الألقاب نظراً لصفاتها 
كما أن (إيزيس) جزء من التاسوع المقدس المنحدرة من سلالة الآله (رع) فهى - وفقاً للنصوص الدينية - إبنه (جب) رب الأرض و (نوت) ربة السماء و لديها ثلاثة أخوة و هم أوزوريس ، ست ، نفتيس 
            
صورة من داخل معبد فيلة تظهر فيها إيزيس و أوزوريس و حورس

و قد ذٌكرت (إيزيس) لأول مرة فى المملكة المصرية القديمة عام 2686 ق.م ، فقد لعبت الدور الرئيسى فى الأسطورة المصرية المعروفة ( إيزيس و أوزوريس ) ، فقد كان (أوزوريس) أخيها و زوجها كذلك
و تقول الأسطورة أنه حينما تولى (أوزوريس) العرش غار منه أخيهم (ست) فقام بقتله و إلقاء جثته بعيداً و فى الكثير من النصوص ذُكر أيضاً تقطيع جثته إلى أشلاء و توزيعها على أقاليم مصر الأثنين و الأربعون بواسطة (ست) إله الشر و أتباعه 
لذلك قامت كل من (إيزيس) زوجته و (نفتيس) أخته بالبكاء و النواح على (اوزوريس) و قد تم تمثيل الربتين (إيزيس) و (نفتيس) على هيئة طائر الحدأة فى المنحوتات المصرية القديمة و من ناحية أخرى فقد عٌرفتا الربتين على أنهما حاميتين للمتوفى فى الحياه الآخره .
إحتوت النصوص الجنائزية على بعض من كلام (إيزيس) و عن حزنها على زوجها وغضبها على تركه إياها حتى تتمكن (إيزيس) أخيراً من العثور على أشلاء (أوزوريس) كاملة و من ثم إعادته للحياه بواسطة التعويذات السحرية و بعض تعاويذ الشفاء والتى برعت فيها و لذلك سميت أيضاً بـ ( ربة السحر ).وضعت (إيزيس) إبنها (حورس) بعد حمل طويل وولادة متعسرة على أيكة من البردى فى دلتا النيل و قد ظهرت المنحوتات فى معبد فيله فى جزيرة فيله جنوباً (إيزيس) و هى تضم إبنها (حورس) بين جناحيها خوفاً عليه من عمه (ست) أن يفعل به كما فعل مع أبيه ( أوزوريس ).
قامت (إيزيس) بتربية إبنها فى أحراش الدلتا و أهتمت به و أرضعته و ظهر دورها الأمومى هنا و كان عليها حمايته من الثعابين والعقارب و الأمراض إلى جانب حمايته من (ست) .
                                                                                       
إيزيس تضم حورس بين جناحيها خوفاً عليه

  كانت (إيزيس) بارزة في النصوص السحرية من المملكة الوسطى وما بعدها ، وكانت المخاطر التي تعرض لها (حورس) في صغره موضوعا شائعا في ترانيم الشفاء السحرية، حيث تمتد جهود (إيزيس) لشفاء (حورس) من أجل شفاء أي مريض. في العديد من هذه الترانيم.
 أجبرت (إيزيس) (رع) إله الشمس على مساعدة (حورس) عن طريق تهديده بإيقاف جريان الشمس في السماء إذا لم يُشف ابنها ، وقد ربطت بعض الترانيم الأخرى النساء الحوامل بإيزيس لضمان أنهن سيضعن مولودهن بسلام.

                                                       
تقديم القرابين لإيزيس

و من هذة اللحظة اطمأنت (إيزيس) على زوجها فى العالم السفلى و أنه سيتحمل رحلة الموت لأن لديه إبن سيقوم بترتيل الشعائر الجنائزية لأبيه و ينتقم لموته.
و من هنا جاء اللقب الثالث لإيزيس ( أم الموتى ) فهى تساعد على إستعادة روح البشر الموتى و توفير الحماية و الغذاء لهم.
              
صورة لمعبد فيلة من مركب بالنيل

و من المعابد المشهورة لعبادة (إيزيس) معبد فيله فى جزيرة فيله جنوب مصر والذي أغرقته مياه النيل وتم تقسيمه وأعيد تجميعه في موقع جديد فوق جزيرة إجيليكا على بعد حوالي 500 م من مكانه الأصلي بجزيرة فيله ويضم مبانيه معبداً للإلهه (حتحور) ويمكن للزائر مشاهدة عرض الصوت والضوء ليلاً الذي يقدم بلغات مختلفة
ويعد معبد (إيزيس) واحداً من أضخم وأهم الآثار ضمن مجموعة المعابد الكبيرة والصغيرة فوق جزيرة فيلة ويشغل هذا المعبد حوالي ربع مساحة الجزيرة ومن بين الآثار الأخرى فوق جزيرة فيله.

تم إعادة تشكيل جزيرة إجيليكا التي تبعد بمسافة خمسمائة متر من موقع جزيرة فيلة ونقلت إليها المعابد المختلفة من جزيرة فيله الغارقة وذلك بحيث تماثل جزيرة فيلة.
                                                            




بدأت عملية إنقاذ فيله عام 1972 وذلك عندما بدأت سفن دق الخوازيق تثبيت أول لوح فولاذي وذلك من بين 3000 لوح وذلك في قاع النيل وذلك لتكوين سد مؤقت لحجز المياه حول الجزيرة واستغرق الأمر عامان لإحاطة الجزيرة بصفين من الخوازيق المتشابكة بطول 12 متر، وداخل هذا الفراغ تم صب خليط من الماء والرمل المغسول في محاجر الشلال على بعد 5 كيلو، وتم توصيل هذا الخليط عبر البحيرة من خلال أنابيب، وقد سمح للماء بالتسرب تاركاً الرمل ليدعم الفولاذ ضد ضغط البحيرة، وهكذا اكتمل حزام النجاة حول الجزيرة.
Continue reading...
في هناك 4 تعليقات: quickedit
التسميات:

الخميس، 14 مارس 2019

مواقف جميلة فى رحلة الأقصر و أسوان

مارس 14, 2019 2 Comments

مواقف صغيرة لا تذكر فى رحلة الأقصر و أسوان لكن أنا هكتبها لنفسى و ليكم عشان دى أحلى أيام عيشتها

1- و أنا راكبة أتوبيس الرحلة من المدينة الشبابية لمعبد الكرنك ، البنات فى الأتوبيس شغلوا أغنية يا ستار بتاعة حماقى و أول ما جت الحتة بتاعة ( و القمر يختار ) عينى جت على الموبايل و الشاشة كانت مظلمة و شوفت صورتى و ابتسمت و هو بيقول القمر

2- فى معبد الكرنك سائحة صينية طلبت منى أصورها

3- و أنا خارجة من المعبد صديقتى كانت بتشترى هدية من هناك و أنا كنت واقفة على جنب باكل بسكويت و عزمت على صحاب المحلات و رغينا عن القاهرة والأقصر شوية

4- و أنا فى الطريق للأقصر بالقطار كنت نايمة طول الليل و كان نفسى أصحى على شروق الشمس و بالصدفة قلقت وقت الشروق و صحيت وشوفته كله لحد الصبح

5- الرحلة كان فيها 140 جنسية مختلفة مش بس مصريين و إتعرفت على بنات جميلات من تايلاند ( إيرينى و حبيبة و حفصة )

6- حفلة الصوت و الضوء قلبى كان بيرقص بالمعنى الحرفى للكلمة من حبى للتاريخ الفرعونى

7- أما رجعت من حفلة الصوت و الضوء ( أول يوم ) و كنت الصبح واصلة لسة بعد سفر طويل و ميتة من التعب سمعت محاضرة جميلة جداً من الدكتور سمير غُنيم و اتعشيت فى مكان الإستقبال بتاع الفندق أنا وصديقتى اللى لسة متعرفة عليها و فضلنا نتناقش عن المحاضرة

8- فى باص الرحلة غنينا و أخدت على البنات بسرعة أول يوم وقلبناها فرح

9- فى أسوان لقيت فل واقع فى الأرض أخدته و حطيته فى شعرى

10 - توهت أنا و صديقتى مرة فى الشارع و مكناش عارفين نرجع و الباص كان رجع المدينة لوحده و ركبنا فى باص تانى و علشان نستنى الباص التانى وقفنا على النيل و كان بالليل خالص و قررنا نركب حنطور و الراجل مخدش فلوس كتير نهائى !

11- جبت خاتم مفتاح الحياه من الأقصر و حبيته جدااااا ( مش بسيبه لحظة )

12- فكرة أنى ركبت القطار فى حد ذاتها كانت أمنية نفسى أحققها
13 - واحد أجنبى هو اللى طلب يتصور معايا و الصورة طلعت جميلة اوى !!

14- أكًلت قطة شيبسى و كانت ممتنة و أنا كمان كنت فرحانة

15- كنت بشترى حاجة من محل و الرجل رحب بيا بالفرنساوى ، تنحت فى وشه و قلتله بس يا عمو أنا مصرية و الناس اللى كانت واقفة كلها ضحكت

16- كنت بتصور فى معبد هابو ( رمسيس الثالث ) بوضعيات مختلفة و سائحة إيطالية إقترحت عليا وضعية جديدة و عجبتنى و الصورة طلعت جميلة جداً

17- إشتريت غزل بنات أنا و صديقتى و شاب من الجنسيات الأجنبية اللى كان معانا فى الرحلة كان عايز يجربه اديناله حتة و كان مبسوط و إحنا كمان كنا مبسوطين

18- أما دخلنا سينما فى الأقصر ، عزفوا النشيد الوطنى المصرى فى الأول و أنا دمعت عشان بحب مصر اوى
19- اما كنت في أسوان في جزيرة النباتات كان في مكان ممنوع الدخول فيه بس لحظي الأمن مكنش واقف و انا مكنتش اعرف انه ممنوع الدخول فيه و جه بعد ما اخدت كمية صور جميلة اوي فيه محدش في الرحلة كلها خدها لأن محدش دخل المكان ده 
Continue reading...
في هناك تعليقان (2): quickedit
التسميات:

الثلاثاء، 5 مارس 2019

الإشتراك فى رحلة وزارة الشباب للأقصر و أسوان

مارس 05, 2019 0 Comments
صورة من معبد الكرنك قبل بداية عرض الصوت والضوء بلحظات 

بالنسبة لرحلة الأقصر و أسوان التابعة لوزارة الشباب والرياضة فهى جميلة جداً جداً
دى أول رحلة أطلعها فى حياتى و كنت قلقانة أنها تكون وحشة بس الحمد لله يعنى
الرحلة من سن ١٨ ل ٣٥ سنة 
أما عن تفاصيل الإشتراك فى الرحلة و نظامها
فأولاً أنت هتملى إستمارة أونلاين ( اضغط هنا ) ، الإستمارة عبارة عن فراغات بتملاها ، أولا بتختار أن القطار يكون شباب و رياضة وخانة الرحلة إلى : هتختار الأقصر و أسوان
بعدها بتكتب إسمك كاملاً و الرقم القومى اللى هو رقم البطاقة و المحافظة ، بالنسبة للفترة فأنت مش بتختارها خالص لإن الفترة بتتكتب تلقائياً عند أول معاد فاضى و متاح التسجيل فيه
يعنى مثلاً أنا كنت هروح فى الفوج بتاع 18 يناير و لقيته اتملى و اتكتبلى تلقائياً الفوج بتاع 22 فبراير فبيكون حسب الفاضى
و أخيراً الخانة بتاعة الجهة المرشح منها ممكن تكتب فيها خريج أو طالب جامعة أو أياً كان
بعد التسجيل و هيكتبك تم التسجيل بنجاح بتتوجه لأقرب مركز شباب فى الحى بتاعك و بتسأل عن مكان الدفع للرحلة و الموظف بيتأكد أولاً أنك سجلت إلكترونياً مسبقاً
يعنى لازم تسجل إلكترونياً الأول و بعد كدة أما يتأكد بتعطى له فلوس الرحلة ( ٦٠٠ جنيه مصري ) و صورة بطاقة تكون مجهزها معاك و بس كدة
هيقولك أنت فى القطار كذا اللى هيغادر الساعة كذا و هيقولك رقم عربة القطار و رقم الكرسى و بس خلاص

 يوم الرحلة بتلتزم أنك تكون فى المحطة قبل معاد المغادرة اللى المشرف هيقول عليه بساعة عشان هتلاقى ناس كتير رايحة وكل واحد عايز يعرف مكانه طبعاً

اليوم الأول ( الأقصر) :
1- هتوصلوا الصبح الساعة 8 مثلاً أو على حسب كل رحلة لأن السفر بيكون بالليل علشان محدش يضيع يوم فى القطار
2- هتوجهوا للمدينة الشبابية فى الأقصر و هتسكنوا فى الغرف عادى جداً و بعد كدة هتستلموا وجبة الإفطار و هيكون فى راحة 3 ساعات أو اكتر من السفر
3- بعد كدة المشرف هينادى لازم تتوجهوا للباص فى الميعاد المحدد علشان هتروحوا أول مكان وهو عرض الصوت والضوء فى معبد الكرنك و ده بيكون بالليل علشان مؤثرات الصوت والضوء
4- بعد العرض هترجعوا المدينة الشبابية تانى و هتاخدوا محاضرة تنمية بشرية ( ده اللى حصل فى الفوج بتاعى معرفش فى تغييرات ولا لأ )
5- بعد كدة هتناموا واليوم يخلص

 اليوم التانى ( الأقصر ) :
1- هتروحوا معبد الكرنك تانى و هيكون معاكى مرشد سياحى علشان يشرح الآثار والمسلات ، يفضل أنكم تسمعوه كويس لأنه بيشرح كويس و بعدها بيعطيكم فرصة للتجوال فى المعبد مع صحابكم و التقاط صور
2- بعد كدة هتتجمعوا للباص فى المعاد المحدد و هتروحوا معبد الأقصر و ده معبد تانى جميل جداً موجود فى وسط المدينة نفسها و بردو معاكم المرشد هيشرح و هتتصوروا زى الكرنك بالضبط
3- بعد كدة هتتوجهوا للباص تانى و هتروحوا للمدينة الشبابية هيقولولكم على معاد الغذاء ، هتتغدوا و بعدها فى راحة ساعتين تقريباً
4- بعد ساعتين الراحة هتركبوا الباص و تنزلوا جولة حرة فى المدينة تتمشوا و اللى عايز يشترى أى حاجة يشتري و هيقولولكم هتتجمعوا فى المكان الفلانى فى أخر الجولة عشان تروحوا المدينة الشبابية تاخدوا وجبة العشاء و تناموا

 اليوم الثالث ( الأقصر ) :

 1-هتصحوا الصبح هتاخدوا وجبة الإفطار و هتروحوا معبد حتشبسوت  بالباص كالعادة و هناك هتلاقوا بازار فى أول المعبد ، الناس بتبيع حاجات زى اللى فى السوق السياحى بتاع الجولة الحرة بالضبط.
2- هتركبوا طفطف لحد المعبد من جوه لأن المسافة بين البوابة بتاعة الدخول لحد المعبد نفسه مشى كتير و فى الشمس فبتركبوا الطفطف
3- بعد معبد حتشبسوت هتتجمعوا فى الباص و هتروحوا معبد هابو ( رمسيس الثالث ) هتعرفوا طبعاً أصل التسمية وكل المعلومات من المرشد السياحى.
4- بعد المعبد هتروحوا جزيرة الموز و دى جزيرة جميلة كلها نباتات و أشجار موز و هتاكلوا هناك موز و هتلاقوا المكان فيه تماسيح و قرود بيربوها و بيبيعوا عصير قصب و كدة
ملحوظة : جزيرة الموز كلها جزيرة فى النيل فالباص هيقف فى مكان معين و بعدها بتركبوا مراكب للجزيرة و نفس طريقة العودة بالمراكب للبر و بعدها تركبوا الباص تروحوا.
5- اول ما توصلوا هتتغدوا و هيكون فى راحة بردو ساعتين تقريباً و بعدها هتركبوا الباص و هتنزلوا جولة حرة زى اليوم اللى قبله و بعد ما الوقت المقرر ليكم يخلص هتروحوا بالباص للمدينة الشبابية هتحضروا شنطكم و تستلموا وجبة العشاء و تستعدوا عشان تانى يوم هتروحوا أسوان
6- بالليل أخر يوم فى الأقصر بيكون فى حفلة سمر جميلة أحضروها بتتعشوا مع صحابكم و بتسمعوا موسيقى و أغانى و كدة يعنى و بتكون فى بلكونة المدينة الشبابية على الهواء كدة فالموضوع منعش بصراحة

 ملحوظات مهمة :
١- صحابكم اللى هيشتركوا معاكم فى غرفة السكن هتختاروا بعضكم فى القطار و إنتم رايحين فأختاروا ناس شبهكم عشان هما دول اللى هيفضلوا معاكم فى الأوضة
٢- إستلام وجبات الإفطار و الغذاء و العشاء بيكون بكوبونات بتستلموها أول ما توصلوا الأقصر و كل كوبون فيه اسم الوجبة واليوم فأنت بتقطع كوبون الوجبة وتستلم بيه فحافظوا عليه كويس + الأكل لذيذ جدا الثلاث وجبات هتحبوه جدا
٣- أهم حاجة تلتزموا بالمواعيد اللى المشرف هيقولها يعنى لو قال هنتجمع فى الساعة 7 يبقى 7 بالدقيقة تكون فى المكان اللى قال عليه عشان ممكن الباص يفوتك أو أى مشكلة تحصل فبلاش
٤- الناس اللى نفسها تروح وادى الملوك فى الأقصر و هو مش فى برنامج الرحلة لأنه مكلف شوية ، فلو فى إجماع من شباب الرحلة أنكم عايزين تزوروه قولوا للمشرف بتاعكم و هو هيقطع وقت من معبد فيهم أو من أى مزار فى الرحلة و هيوفروا لزيارة وادى الملوك لكن مش هيعطيكم وقت زيادة يعنى لازم تعرفوا أن الوقت ده هيكون متاخد من حاجة تانية و طبعاً القرار ليكم و للمشرف
٥- إذا المشرف قالكم ممنوع التصوير فى المكان كذا و متاح فى المكان كذا فياريت تلتزموا بكدة منعا للإحراج لأن فى أماكن التصوير فيها بتذكرة
٦- وجبة الغذاء و الإفطار بتكون في المطعم اما العشاء فبتستلموه في شنطة ووقت الاكل عموما مع الصحاب بيكون احلى وقت 
٧- اما تشتروا حاجة اسألوا عن سعرها في اكتر من مكان في السوق عشان في ناس بتبيع الحاجة غالية جدا

 اليوم الرابع ( الأول فى أسوان ) :

 1- اما بتوصلوا أسوان بتروحوا المدينة الشبابية هناك بردو و بتسكنوا فى الحجرات بتاعتكم بالبطاقة و مع صحابكم اللى اخترتوهم زى الأقصر بالضبط
2- بعدها بتتغدوا و تقعدوا راحة شوية و بعدها بتتوجهوا بالباص لمتحف النيل ، المتحف ده جميل جداً بيحكى عن نماذج لدول حوض النيل و الزيارة بتكون بالليل
هتسمعوا أصوات حيوانات أفريقية مع صوت ماء كإنك فى أفريقيا بالضبط و المتحف كمان فيه تماثيل لأكتر من خديوى و محمد على و الناس دى بعد الجولة بتروحوا تتعشوا وتناموا

 اليوم الخامس ( الثانى فى أسوان ) :

 1- بتصحوا الصبح تفطروا كالعادة و بعدها بتتوجهوا لجزيرة النباتات ، بردو الباص بيركن فى مكان و بتروحوا بالمراكب زى ما حصل مع جزيرة الموز فى الأقصر
2- جزيرة النباتات جميلة و مريحة للأعصاب و فيها متحف للنباتات هو مش كبير بس ألقوا عليه نظرة للى مهتم بالنباتات
3- هتتمشوا فى الحديقة الجميلة وهتلاقوا أنواع نباتات نادرة وغريبة و مكتوب لوحة بإسم كل نبات جنبه و عايزة أقول حاجة مهمة ( بلاش يا جماعة حد يمشى يدوس على النبات نفسه لأن دى حاجات لازم نحافظ عليها ) محدش هيقولكم كدة بس تشعروا بالمسؤولية لوحدكم
4- بعد كدة بتركبوا المراكب و بتروحوا القرية النوبية ، القرية حلوة و هتدخلوا بيت حد من أهل المكان بيستقبلكم و بتشربوا عنده شاى ، غالبا هيكون معاكم مرشدة هتقولكم للبنات على المكان اللى ترسموا فيه حنة فبلاش يا بنات حد يرسم حنة فى مكان غير اللى هى هتقول عليه لأنها عارفة الدنيا هناك و عارفة أن الأماكن التانية بيحطوا فيها مادة كاوية بتتعب الجلد فإلتزمن ب كدة
5- هترجعوا المدينة الشبابية هتتغدوا و بعد الراحة كالعادة هتروحوا متحف النوبة ، و المتحف ده فيه تاريخ النوبة بالنسبة لمصر هتلاقوا هياكل عظمية و مقتنيات للناس فى الوقت ده و تماثيل و حاجات زى كدة و هو بصراحة ظريف بردو جدا لكن التصوير فيه ب 20 جنيه فلو عايزين تصوروا ادفعوا التذكرة
6- بعد كدة بتروحوا تتعشوا و تناموا

اليوم السادس ( الثالث فى أسوان )

1- بعد الإفطار بتروحوا السد العالى و رمز الصداقة و معاكم المرشد السياحى بيشرح كل حاجة عن السد العالى و تاريخه و بتتصوروا فى رمز الصداقة
2- بعد كدة بتروحوا معبد فيلا و إسمه فيلا مش فيلة و هو عبارة عن جزيرة بردو بتروحوه بمراكب و المرشد السياحى بيعرفكم على تاريخه و إنقاذه من تحت مياه النيل تم ازاى و امتى و حاجات زى كدة
3- بعدها بترجعوا المدينة الشبابية بتاخدوا فرصة ساعة بتحضروا شنطكم و تستعدوا و تحطوها فى الباص و بتستلموا وجبة المغادرة و تتوجهوا لمحطة القطارات استعدادا للعودة بألف سلامة إن شاء الله

الرحلة جميلة وتستاهل 
بتتعرفوا على تاريخ مصر الجميلة ده غير أنكم بتتعرفوا على ناس جديدة وتكتسبوا صداقات  و صور و ذكريات جميلة بحق.
Continue reading...
في ليست هناك تعليقات: quickedit
التسميات:

الأحد، 3 مارس 2019

إتعلمت إيه من رحلتى إلى الأقصر و أسوان؟

مارس 03, 2019 3 Comments

أقدر أقول أن ده نوع جديد من الخبرات اللى اتضافت ليا فى الفترة الأخيرة
مش مجرد رحلة لرؤيه آثار بلدنا الجميلة لكن على المستوى الشخصى والفكرى والثقافى إستفدت حاجات مكنتش أتخيل أنى هوصلها ابداً من خلال مجرد رحلة... لأنها مكنتش مجرد رحلة
من حوالى شهر أخدت القرار بالإشتراك فى الرحلة دى و كان القرار لسبب واحد فقط وهو إن من صغرى بعشق التاريخ الفرعونى بكل الحقب التاريخية ، كنت و أنا طفلة بحب أعرف عن ملوك الفراعنة وسلسال عائلاتهم وإنجازاتهم و ده كان أكتر تاريخ بحبه فى تاريخ مصر بغض النظر عن الحقب اللى جت بعد كدة
كنت بتعلم كتير عن أسلوب حياتهم ومعتقداتهم وكنت بحب أجمع صور ليهم 
و أما كبرت وجاتلى الفرصة دى كان مستحيل أفوتها و وقتها إستغربت أن أهلى وافقوا إنى أسافر لأسبوع كامل بعيد عنهم و القرار كان صعب عليا أكتر منهم بكتير
قبل الرحلة بأيام كنت بعيط وكنت بتمنى إنى مروحش الرحلة دى عشان مش عارفة إزاى هعيش من غير أهلى إسبوع و خصوصاً إن مفيش حد من اللى أعرفهم طالع الرحلة دى خالص.
و مع ذلك روحت و إستفدت وحمدت الله على الرحلة العظيمة دى اللى غيرتنى للأحسن و بشهادة اللى أعرفهم والقريبين منى
من أبسط الحاجات اللى إتعلمتها مثلاً الإلتزام بالمواعيد بشكل أدق ، كنت بنام الساعة 3 فجراً و بقوم من النوم 6 و نصف صباحاً بس علشان ملتزمة بمعاد الإفطار فى المدينة الشبابية 
وكان لازم أضبط المنبه لإن لو فوتت أى وجبة مش هعرف أعوضها !!
كنت مسؤولة عن نفسى مسؤولية كاملة لأول مرة ، بعتنى بنفسى و أنا تعبانة لأنى عارفة إنى الوحيدة اللى هقدر أعمل كدة ، كنت بضطر أغسل ملابسى بنفسى لإنى عارفة إنى لو معملتش كدة مش هعرف أخرج مع صحابى مثلاً لإن ملابسى مش جاهزة
الحاجات البسيطة دى تبدو لأى حد معتمد على نفسه بطبيعة الحال حاجات عادية جداً و مش إنجاز لكن كانت بالنسبة لى إنجاز كبير جداً لأنى و بعترف بكدة ( كسولة ) شوية 
الرحلة علمتنى النشاط وعلمتنى أكسر حاجز الخوف فى التعرف على الناس لأن كان مستحيل أقعد إسبوع كامل مش بكلم حد لمجرد إنى مترددة !!
و بالفعل إتعرفت على أصدقاء رائعين و زملاء فى غرفة النوم 
جمعنا مع بعض إفطار وغذاء و عشاء و كل بنت فينا بتعرف نفسها و بتحكى عن شخصيتها والحاجات اللى بتحبها واللى بتكرهها ، لقيت نفسى فى يوم وليلة قريبة من ناس أول مرة أشوفهم 
إلتزمنا كلنا بالحفاظ على غرفة السكن فى المدينة الشبابية ، وضعنا قوانين لنفسنا و نفذناها
ممنوع الصوت العالى بعد ساعة معينة عشان كلنا عايزين نرتاح بعد إجهاد الرحلة ، ولازم أكلم أهلى فى أوقات معينة أطمئن عليهم ويطمئنوا عليا .
إلتزمت بفكرة إن موبايلى يكون جاهز للتواصل مع الناس كلها ، ويكون جاهز للتصوير .
كم كبير من الإلتزامات كانت بالنسبة لى مش مهمة أساساً لأن فى بيت أهلى كانت الحياه أبسط من حيث المسؤوليات .
حتى إنى أصبحت مش بختار أكل معين لإنى ملتزمة إنى آكل أى حاجة تٌقدم ليا فى الساعات المخصصة للطعام ، لكن اللى جعل الوقت خفيف وجميل هى الصُحبة الجديدة للناس اللى أتعرفت عليهم و إتعلمت الجرأة فى التعرف لصديقات جدد ، إزاى أتعرف على صديقة من غير ما أكون خجولة زيادة عن اللازم و من غير ما أكون متطفلة أكثر من اللازم كمان.
و كمان إلتزمت بتحديد ميزانية لشراء الهدايا من الأقصر وأسوان و شراء إحتياجات المنزل.
لقيت نفسى مسؤولة عن حاجات كتير وكنت فى غاية السعادة وأثبتت إنى أقدر أتحمل مسؤلية نفسى كاملة من غير مساعدة ومن غير تعب حتى وكنت سعيدة وأنا بعمل كدة.
ده غير إنى قابلت شخص من أعز اصدقائى واللى من الأقصر أصلاً و كانت فرصة جميلة جداً و مكنتش متخيلاها و إنبسطت كتير و كانت من أجمل الحاجات اللى حصلتلى فى الأقصر.
لو حد يعرفنى كويس من أصدقائى وزملائى هيعرفوا إنى بحب أتعرف على ناس من بلاد تانية مختلفة عننا فى كل حاجة ، وبالفعل ليا أصدقاء من بلاد تانية 
و كأن الرحلة كمان عرفت الكلام ده عنى وكانت عيزانى أكون مبسوطة أكتر و أكتر !!!
أكتشفت إن الفوج ده بالذات مش مصريين بس ، بل يضم كمان طلاب وطالبات مدينة البعوث الإسلامية ( طلاب الأزهر الوافدين ) واللى أستأنست بيهم جداً جداً على المستوى الشخصى و إتعلمت منهم بشكل غير مباشر حاجات كتير
و لقيت فرصة جميلة إنى أتعرف عليهم و إتعرفت بالفعل على بنات من تايلاند و ماليزيا و إكتشفت أن المدينة الشبابية اللى أقمنا فيها الإسبوع ده تضم 140 جنسية من المصريين و طلاب الأزهر و ذكور و إناث ، كم من التنوع مبهج ولا يُصدق !!
لو قلت عليها إن دى رحلة الأحلام هكون مش ببالغ ابداً.
140 جنسية من أفريقيا و آسيا غير المصريين و فيهم ذكور و إناث من كل الجنسيات ، إتجمعنا كلنا على مواعيد نوم واحدة و خروجات واحدة وزيارات واحدة ، و تشاركنا نفس الطعام و نفس المائدة و أحاديث جميلة و محاولات عبثية فى تعلم كلمة أو كلمتين من لغات مختلفة. 
و بما أنهم من طلاب الأزهر الشريف فكانوا بيجيدوا اللغة العربية بطبيعة الحال ، كنا بنتكلم معاهم باللغة العربية الفصحى و إتصورنا معاهم .
حتى إن آخر يوم لينا بالأقصر ( قبل السفر لأسوان بيوم ) أقام مشرفين الرحلة حفلة سمر فى بلكونة كبيرة جداً فى المدينة الشبابية و كل الحاضرين تعجبوا من منظر السماء فى مدينة الأقصر الجميلة ، النجوم كانت منثورة فى كل مكان و حولت السماء لبساط فضى اللون .
فى الليلة دى عزفت فرقة صعيدية بعض الأغنيات و الألحان من الفلكلور المصرى الصعيدى ، وكان فى فقرة مسموح فيها أن أى حد عنده موهبة يقولها سواء أغنية أو شعر .
بعدها حصلت أجمل حاجة فى الرحلة كلها تقريباً ، كان فى شخص هندى معنا فى الرحلة قام بتشغيل أغنية هندية بحبها وحافظة كل كلمة فيها بالصدفة طبعاً.
كنت فى الوقت ده بلعب مع اصدقائى فى الرحلة كوتشينة و كنا مندمجين و كنا إنتهينا كلنا من وجبة العشاء
أول ما سمعت ألحان الأغنية الهندية نسيت انا مين وفين و أندمجت وغنيت بصوت عالى مع الأغنية ، اصدقائى سقفوا لى و كنت فى حالة استمتاع كبيرة
لفتت نظر الهنود فى الرحلة بدون قصد لكن لقيت عدد لا بأس به بيسمعلى وانا بغنى بلغة غريبة و مكنش حد متوقع إنى بعرفها .
بعد ما إنتهيت من الأغنية كإنى اوحيت للناس دى بإننا نقرب كلنا من بعض أكتر بالموسيقى
بدأ كل شخص يشغل أغنية من بلده و موسيقى فلكلورية مختلفة!!
فى الليلة دى سمعنا أغانى من باكستان وافغانستان والهند و مالى و مصر و اغانى بلغات أخرى معرفتهاش 
اللى جمع بيننا صوت الموسيقى الجميلة ورقصات الشباب اللى بتتغير مع كل موسيقى و كل لحن.
حسيت إن التعارف الحقيقى بين الناس حصل فى الليلة دى ، و إتأكدت بعد كدة من الأيام المتوالية إن كل مجموعة صحاب ماشية مع بعضها صعب تلاقى فيها نفس الجنسية 
كان خليط جميل وغريب جداً و حقيقى إتعلمت منهم كتير على المستوى الدينى والأخلاقى والمعاملات
شباب و بنات الأزهر علمونى الإلتزام أكثر بدينى بطريقة غير مباشرة رغم أنهم غير مصريين ، يكفى أن وقت آذان الفجر كنت بسمع إبتهالات تفرح القلب من مايكرفون المسجد بالمدينة الشبابية ، الإلتزام فى شكل الملابس و المعاملة الحسنة  و حاجات تانية كتير.
و من الحاجات اللى أثرت فيها بشكل كبير جداً خلال الرحلة ، محاضرة التنمية البشرية اللى إتعملت أول يوم فى الرحلة ليلاً.
كنا فى الوقت ده رجعنا كلنا تعبانين جداً من الرحلة الشاقة ومن أول زيارة لمعبد الكرنك ، و تقريباً مكنش فى حد مستعد يسمع أى محاضرة لأى سبب.
لكن بمجرد ما بدأت المحاضرة لقيت نفسى مركزة وعايزة اركز وعايزة اسجل المحاضرة من جمالها عشان استفيد بيها تانى فى وقت لاحق
المحاضرة كانت للدكتور سمير غٌنيم ، شخص عالِ المقام ومتواضع إلى حد  مُذهل.
فى البداية أنا مكنتش سمعت عنه نهائى لكن لما بحثتعنه فى الإنترنت إكتشفت إنى أمام عالِم كبير يستحق كل الإحترام والتقدير.
و الأستاذ سمير غُنيم لمن لا يعرفه هو ، هو خبير دولى و مدرب محترف فى مجال إدارة الأعمال و تطوير الذات ، حصل على بكالريوس دكتوراه الإقتصاد و العلوم السياسية من جامعة ميونخ ، و ماجستير فى الموارد البشرية جامعة الزقازيق و درجة ماجستير ادارة الاعمال م جامعة بوسطن بالولايات المتحدة كما حصل على بكالريوس علم النفس جامعة الزقازيق
كما إنه المدير التنفيذى لمعهد بوسطن للتدريب و الغطاس رقم 2 افريقياً و مدير محمية رأس محمد بشبه جزيره سيناء و إستشارى بوزارة التعليم العالى و مدير المركز الثقافى الأمريكى وغير ذلك من الإنجازات الكبيرة و المكانة العالية.
حدثنا كتير عن أهمية بلدنا و أد إيه هى عظيمة ومحتاجة مننا مجهود كبير عشان نبنيها ، و أد إيه مصر نعمة عظيمة و فكرة إننا أتولدنا مصريين ده حظ جميل فعلاً
و عجبنى كمان إنه مدح كثيراً فى شباب و بنات البعوث الإسلامية الغير مصريين و أنهم اصبحوا جزء مننا و لهم كل الإحترام والتقدير.
عرفنا كتير عن معاناه الدول الأخرى و عن نعم موجودة فى حياتنا اليومية ولا نشعر بوجودها حتى
إتعلمت إزاى ( أتعب على حالى ) كما يحب أن يقولها الدكتور سمير بدلاً من ( إشتغل على نفسك ) و أتعلمت إن المجالات قدامى كتيرة بس لازم اتعب عشان اوصل لشأن كبير و أقدر استفيد من العلم وأفيد به غيرى
إتعلمت كمان من الدكتور سمير إحترام دينى ولغتنا العربية و عدم الإستخفاف بهم و أن الدين سابق للعلم من نواحى كتيرة رغم أنه رجل علم بالدرجة الأولى ولكنه أيضاً رجل أزهرى .
تشجعت على البحث أكثر فى الدين و أتعلمت أدور على المعرفة فى كل مكان ، لأنه فى رأيي الدكتور سمير رجل دين وعلم و ده شئ عظيم أن يمتلك المرء دين وعلم معاً.
إتعلمت من خلال الزيارات الويمية للمعابد حب بلدنا أكتر ما أنا بحبها أساساً و أد إيه تاريخ بلدنا كبير و عظيم ويستحق الإحترام ونظرة تأمل للنفس ( أنا فين من كل ده ؟ ) ( إزاى أقدر أعمل إنجاز كبير فى حياتى؟ )
و كان صوت الدكتور سمير دايما فى أذنى بلكنته البدوية التى يحبها كثيراً ( إتعب على حالك ).
و كان ليا شرف التحدث معه بشكل شخصى وأخذ صورة تذكارية معه.
فى الحقيقة اللى إتعلمته على المستوى الدينى واللغوى والتاريخى والإجتماعى و الشخصى يفوق اللى إتعلمه الشخص العادى فى سنة كاملة لإن كل كلمة إتقالت و كل موقف حصل قدامى ترك أثر فى نفسى و كم من الإجابات لأسئلة كنت بسألها و كم من الطاقة الإيجابية يكفينى لرحلات قادمة أجمل و أجمل من وزارة الشباب و الرياضة.
صورة الموضوع من تصويرى فى معبد الأقصر ليلاً
Continue reading...
في هناك 3 تعليقات: quickedit
التسميات: