عيد ميلادى ال 24 هو عيد الميلاد الوحيد اللى  مكنتش مخططاله ابدا
و إكتشفت أن المفاجئات أجمل شئ فى الدنيا و مش كل حاجة لازم نخططلها علشان تكون جميلة
أجمل حاجة حسيتها فى عيد ميلادى ده إن كل اصدقائى كانوا فاكرين اليوم من اول الشهر وكانوا مستنيين يبعتولى
ومنهم اللى كلمنى الساعى 12 بالليل أول ما بدأ يوم 25 ديسمبر بالضبط
و دى بالنسبة لى كانت أحلى حاجة أن صحابى يكونوا فاكرين عيد ميلادى أحلى 100 مرة من أى هدايا

سهرت من الساعة 12 أول ما بدأ يوم ميلادى لحد الساعة 1 و 25 دقيقة كنت برد على رسائل التهنئة بتاعة صحابى و فرحت بيها جداً

فى يوم عيد ميلادى نفسه صحابى كانوا خارجين و أنا مكنتش خارجة أساساً بس روحت لهم مفاجأة
إتنين منهم كانوا عارفين والباقى مش عارف

أكلنا أكل صينى وكان أول مرة بالنسبة لى أتذوقه و عجبنى جداً
إتصورنا كتير و شربنا عصائر حلوة و إتصورنا جنب شجر الكريسماس اللى زين مول سيتى ستارز فى كل مكان


ضحكنا و إتكلمنا فى كل حاجة تقريبا و كان يوم رائع بحق و أجمل وأبسط عيد ميلاد مريت بيه
صحيح كان فى ناس توقعت بشكل أو بآخر يكلمونى أو يهتموا بس خلاص محدش إهتم

من ضمن الحاجات اللى عملتها النهاردة لأول مرة كمان غير الطعام الصينى ، إستكشفت متجر virgin mega store لأول مرة وإنبهرت بإسطوانات أغانى تخيلت أنها خلاص مبقتش تتصنع لكن لقيتها و مجموعة كتب رائعة لهارى بوتر وألعاب لهارى بوتر سعرها غالى جداً لكن شكلها مميز وعجبنى
كمان فى ركن للناس تعزف فيه الموسيقى على آلات موجودة هناك بيانو و طبول و جيتار و مجموعة من النوت Note جميلة جداً و عجبنى أكتر من شكل وخصوصاً واحدة لونها بنى مرسوم عليها شعار برج الجدى
مكنتش عايزة أخرج من المحل من جمال المنتجات اللى فيه لحد ما روحت فى نهاية اليوم

كتير بنلاقى فيديوهات بتعجبنا فى اليوتيوب وبنكون مش عارفين نحملها إزاى ولا منين و لو حطيناها فى قائمة الحفظ بننساها خالص، أنا متعودة دايما أحمل الفيديوهات من الويتيوب من لينك معين هقولكم عليه و حبيت أفيد الناس بردو بالموضوع ده

طريقة تحميل فيديو من اليوتيوب

1- الأول إدخل على اللينك ده : اضغط هنا
2- الينك لو مش شغال عندكم هتبحثوا فى جوجل اكتبوا ( Video Converter ) و هتختاروا youtube converter
3- بعد كدة هتلاقوا مكان تضعوا فيه لينك الفيديو المراد تحميله أيا كان لكن الأهم إنه يكون من اليوتيوب
4- هتلاقوا تحت مكان اللينك مكان تانى تختاروا فيه صيغة تحويل الفيديو ، يعنى مثلاً عايزينه صوت بس تختاروا Mp3 أو فيديو تختاروا Mp4
5- اضغط على Start
6- الفيديو هيتحول فى خلال دقيقة للصيغة اللى إنتم عايزينها و بعد كدة إضغطوا على Download

رأس السنة قربت جداً خلاص و أكيد فى ناس مش هتعرف تسافر أو هيقعدوا فى البيت ويخصصوا وقت لمشاهدة أفلام ظريفة فى البيت
أنا هقترح عليكم بعض الأفلام الجميلة الكوميدية والدرامية و اللى فيها أمل جديد عشان أنا شيفاها مناسبة للسنة الجديدة

1- The princess switch

- ده فيلم أمريكى لسة شيفاه قريب جداً لإنه لسة جديد 2018 .. الفيلم كله بيحكى عن قصة فتاتين مختلفتين تماماً فى مركزهم الإجتماعى و لكنهم نسخة طبق الأصل من بعض فى الشبه
يا ترى إيه اللى هيحصل لهم؟
الفيلم أحداثة كلها بتدور فى آخر أيام السنة وسط الجليد وأجواء الإحتفال بالكريسماس

2- Happy new year

- طبعاً من إسمه باين إنه بيتكلم كمان على نهايات السنة لكن ده فيلم هندى و كوميدى جداً إتعمل سنة 2014 و دخلته فى السينما و لحد دلوقتى بحبه و بتفرج عليه
بيحكى الفيلم عن رجل إسمه تشارلى جمع اصدقاؤه من أجل الإنتقام لوالده
يا ترى إيه اللى هيحصل؟ الفيلم كوميدى أكشن و مبهج جداً

3- Queen

- ده فيلم هندى درامى بحبه جداً جداً ، أحداثه مش فى نهاية السنة ولا حاجة و ملوش علاقة بالشتاء لكنه بيعطى أمل فى الحياه رهيب و بيعطى الثقة لأى حد بيشوفه علشان كدة حسيت إنه مناسب لنهاية السنة لأن ده الوقت اللى بناخد فيه قرارات جديدة فى حياتنا غالباً
و ده اللى عملته البطلة بالضبط البنت رانى تركها حبيبها قبل الزفاف بيوم لإنه عديم المسؤولية و انهارت البنت بسبب كلام الناس عنها بعد ترتيبات الفرح إنه هيتلغى ببساطة
يا ترى عملت إيه؟

4- Home alone

- الفيلم غنى عن التعريف طبعاً ، من أجمل أفلام رأس السنة بأجزاؤه التلاته ، كل بيتكلم عن قصة الولد كيفين اللى إتعرض لمهاجمه من لصين فى منزله ولكنه قرر محاربتهم لوحده
الفيلم كله بيحكى عن أجواء الشتاء والكريسماس و مناسب للوقت ده جداً

5- Polar Express

- فيلم الأنميشن المفضل عندى ، معرفش إذا فى ناس كتير إتفرجت عليه لكنه فيلم انميشن خيالى بيحكى عن ولد مش مؤمن بوجود سانتا كلوز الحقيقى لحد ما يقابله فعلاً فى مغامرة سفر فريدة من نوعها بقطار متجه للقطب الشمالى مع أغراب

6- Harry Potter

- من الأفلام الغنية عن التعريف طبعاً كمان ، الجزء الأول بس من هارى بوتر ( هارى بوتر وحجر الفيلسوف ) هو اللى فيه أجواء الكريسماس لكن بصفة عامة سلسلة أفلام هارى بوتر كلها من أجمل الأفلام اللى شوفتها فى حياتى و بحس أنها مناسبة لو قضيت أيام فى البيت فى الشتاء لأنها بتاخدنا لعالم تانى

7- While you were sleeping

- فيلم امريكى بردو فى أجواء رأس السنة بيحكى عن بنت شغالة فى محطة القطار و كل يوم بتشوف شاب بيقطع تذكرة منها و بيروح الشغل و هى بتحبه بس مش بتقول الكلام ده
و فى مرة هتنقذ حياته فى المحطة بعد ما وقع أمام القطار ، يا ترى إيه اللى هيحصل؟ هتقوله إنها بتحبه؟
فيلم قديم بس رائع جداً رومانسى و درامى

أما لو حابين تتفرجوا على مسلسل صغير درامى رومانسى و أحداثه فى الشتاء بردو فإتفرجوا على Winter Sonata
و ده اللينك اللى إتكلمت فيه عن تفاصيل المسلسل قبل كدة للى مشافهوش : إضغط هنا
دى كل الأفلام اللى اعرفها بتدور فى الإطار ده
لو عندكم افلام تانية أو إقتراحات تانية إكتبوها فى تعليق هنا داخل الموضوع 

إترددت كتير قبل ما أكتب عن الموضوع ده لأن إجابة سؤال ( ليه الناس أصبحت مكتئبة؟ ) إجابته كبيرة ومحتاجة كلام كتير جداً
لكن أنا قررت إنى أجاوب على السؤال ده بالنسبة للمصريين والعرب
لكن معلش إستحملونى أنا هتكلم باللهجة العامية مش باللغة العربية عشان الموضوع يوصل بشكل أسهل
ليه كتير جداً من المصريين والعرب اصبحوا مصابين بالإكتئاب أو حتى بلادة الشعور والضيق أغلب الوقت؟
لو سألت أى حد سؤال زى ده هيجاوب فوراً أنه بسبب غلاء الأسعار وضيق المعيشة لكن الحقيقة فى وجهه نظرى أن مش ده السبب الوحيد لحالة الكآبه السائدة الأيام دى
فى حاجات بنعملها فى حياتنا اليومية بتأثر علينا بشكل سلبى جداً من غير ما ناخد بالنا من الموضوع ده
رقم واحد : السوشيال ميديا
خلينى أكون صريحة ، أنا نفسى لما بسمع كلام سلبى من حد عن الحياه والمعيشة بتضايق وببقى مش عايزة أتكلم مع الشخص السلبى ده تانى حتى لو كان أقرب الأصدقاء ليا
لو بصينا على الفيس بوك مثلا هنلاقى أن كتير من المنشورات المكتوبة فيها بؤس و حزن وبتتكلم عن أن الحياه صعبة وأن الواحد مبقاش عارف يعيش لدرجة أن فى الفترة الأخيرة إنتشرت صور لناس من أيام أجدادنا مثلا وهم عايشين حياه رايقة و هادية بعيداً عن هموم الوقت الحالى اللى الناس كلها حاسة بيها
رغم أن العالم كله بيعانى من غلاء الأسعار ومشاكل فى تدبير الأمور المالية وحتى أيام أجدادنا كانوا بيعانوا من غلاء الأسعار وده شئ ممكن تتأكدوا منه يا إما من حكايات الأجداد أو من الأفلام القديمة
طيب لو طول الوقت الناس بتعانى من غلاء الأسعار و ضيق المعيشة فى بعض الوقت ، فين المشكلة؟ ليه إحنا مش عايشين بروقان زى الناس بتاعه زمان ؟ إيه الفرق وإيه علاقة السوشيال ميديا بالموضوع أصلاً؟
مشكلة السوشيال ميديا ( اللى مكنتش موجودة زمان ) أن الناس بتقضى وقت طويل عليها فى ايام الأجازات ووقت الفراغ وأحياناً وقت طويل جداً زيادة عن اللزوم
طول الوقت ده من الأشياء اللى بتخلى أى إنسان ينسحب بالتدريج من الحياه الإجتماعية الأسرية أو الأصدقاء و بيبدأ يتسلى بوحدته ويقتنع بيها و بينسحب من الحياه الإجتماعية عن قصد
ده مع الوقت بيخلق شعور بالوحدة النفسية ، حتى لو بعد كدة الشخص ده خرج مع أصدقاؤه وأقاربه مش بيكون سعيد لأنه سبق و كون لنفسه عالم منعزل تماماً ، بيسعد بيه بالأول لكن بعد كدة العزلة دى بتتحول لإكتئاب
و تانى شئ وسائل التواصل الإجتماعى بتعطى شعور كامل بالزيف ، لأنى ممكن اقرأ أخبار مزيفة عن ناس أعرفها و أكون متأكدة أنها مش حقيقية و الهدف من الأخبار المزيفة غالباً الإستعراض و جمع اكبر عدد من المعجبين .
النقطة اللى بعد كدة مفيش ناس كتير فكرت فيها لكن لازم اقولها لإنى لاحظتها بشكل واضح الفترة الأخيرة والموضوع بدأ يزيد لحد مرعب.
إيه هى؟
وسائل التواصل الإجتماعى سواء الفيس بوك أو إنستجرام وبالذات الأخير ده لأنه كله عبارة عن صور وضعوا قوالب محددة للسعادة وحولوا أبسط مسببات السعادة لأشياء معقدة جداً جداً
فاللى بيحصل إن الناس صدقت قوالب السعادة المزيفة دى و بتحاول لحد النهاردة تحط نفسها جواها علشان تلاقى السعادة على أساس ان كل ده حقيقى
فاللى بيحصل حاجة من الإتنين :
1- يا إما الناس بتقلد اللى بتشوفه بالحرف ومش بتلاقى السعادة فى الأخر لأنها زى ما قلت مزيفة ومش من جواهم و بيكتئبوا
2- يا إما الناس بتحاول توصل للى بتشوفه على وسائل التواصل الإجتماعى و مش بتعرف فبالتالى بيكتئبوا
و علشان اوضح أكتر هكتب أمثلة كتير عن الموضوع ده عشان أقدر اوصل الصورة كاملة
أول مثال : إنتشر على الفيس بوك مؤخراً مقولة ( سافر فأنت لست شجرة )
مش كل الناس معاها الفلوس الكفاية أنها تسافر و ده مش شئ ضرورى بحيث أنه يكون من حقوق الإنسان ، السفر للسياحة فى الأول وفى الأخر رفاهيه مش كل الناس تقدر عليها إلا اللى يملكوا المال والوقت الكافى لده
لكن بما أن الناس وخصوصاً الشباب وضعوه جزء من قالب السعادة المزيف ، فبنلاقى فجأة الناس كلها عايزة تسافر بل وتهاجر بل وتغير جنسيتها كمان!!!!
الثقافة دى مكنتش موجودة زمان نهائى و زى ما قلت السفر من عيب ولا حاجة لكن هو رفاهيه مش كل الناس تقدر عليها و مش من الصح ان الناس اللى ضعيفة الإيمان فى نفسها و قليلة الثقة يشعروا بالإكتئاب لمجرد انهم مش عارفين يسافروا مثلاً
طيب وسائل التواصل الإجتماعى بتعمل إيه؟
بتنشر أجمل صور فى العالم للسفر والمسافرين والمدونين المشهورين وهم فى اماكن مشهورة و بصراحة الموضوع أصبح إستعراض أكثر منه شعور بالسعادة ، إستعراض للملابس والفلوس والإمكانيات كإن لسان حالهم يقول ( شوفوا انا بعمل إيه )
والله أعلم إذا كانوا هم اصلا اقصد المدونين المشهورين سعداء ولا لأ؟!
تانى مثال : الناس اللى عايزة تستعرض بس مش هينفع تسافر تعمل إيه؟!
تستعرض بلبسها و كل حاجة ماركة عندها حتى لو أكل والله!!
بيفضلوا يتصوروا وبردو وسائل التواصل الإجتماعى بتنشر صور الماركات بتاعة الملابس وأشهر المطاعم و ده بنفس الطريقة بينعكس على الناس اللى مش هتقدر تشترى ملابس أو إكسسوار او أى حاجة ماركة بالإكتئاب ( أنا مش عارف أحقق الكلام ده) ( الناس دى أغنياء ) ( انا ليه مش معايا فلوس زيهم؟)
وخصوصاً البنات والنساء صغيرات السن يعنى أكتر ناس بتتأثر.
من كام يوم كلمتنى بنت قريبتى وصديقتى جداً و كانت مكتئبة ومتضايقة وأنا مستحملتش أسمع صوتها كدة فى التليفون فكلمتها و لقيتها بتعانى من نفس الحاجات بالضبط!!
هى مقالتش أنا مكتئبة عشان كذا لأ ، هى مكنتش عارفة مالها بالضبط بس لما إتكلمنا سوا توصلت إنها عايزة تخلص الكلية بسرعة علشان تبدأ تشتغل بسرعة و تكون فلوس بسرعة وأنها لو معملتش كدة هتحس بعدم تقدير من الناس و أن ملهاش لازمة فى الحياه خالص و ده للأسف تفكير بنات كتير جداً.
كانت نصيحتى ليها متخليش الطموح الزيادة عن اللزوم و جرى الناس على الوضع الإجتماعى العالى يضايقك ويحسسك بعدم الرضا
إعملى اللى بتحبيه وبس ، الحاجة اللى تخليكى سعيدة و تكونى مرتاحة فيها سواء الناس حست إنك عملتى إنجاز او لا دى مش مشكلتهم أصلاً
و كمان قولتلها إنى كان ممكن أكون دكتورة وكان سهل جداً أشتغل على ده لإنى درست علم النفس وكان ممكن أدرس بطريقة ما طب نفسى ويقولوا الدكتورة راحت والدكتورة جت لكن أما قررت إنى مش هشتغل فى مجال دراستى كان لسببين:
أولا : و ده الأهم أنا مش مقتنعة بأغلب اللى درسته فى علم النفس أصلاً ( قولوا عليا مجنونة أو لأ بس فى حاجات مش منطقية وأنا مش هعمل حاجة أنا مش مقتنعة بيها )
ثانياً :لو إخترت إنى مشتغلش فى مستشفى نفسى و قررت أعلم لطلبة الجامعة وأكون دكتورة جامعية ، هعطى للطلبة نفس المعلومات العجوزة الغير منطقية اللى أنا مش مقتنعة بيها بردو و فى الحالتين أنا مش هكون سعيدة.
علشان كدة انا مكنش مهم عندى كلام الناس ( حد يسيب لقب دكتورة و يشتغل حاجة تانية؟!) آه أنا !!!

- لقيت مرة فى جروب بنات على الفيس بوك ، كان فى بنت معرفهاش كاتبة ( إمتى بقا هيبقى ليا الكارير بتاعى وأكون مبالغ كبيرة و أعيش حياتى بيها ؟ ) و بنت تانية بتقول ( أنا مش هتجوز وبتقول للإمهات كلهن متجوزوش بناتكن علشان مينفعش البنت يكون أخرها راجل تطبخله وتستناه يرجع من الشغل ، لكن المفروض تسيبيها تعتمد على نفسها وتسافر و تكون فلوس و تعيش بيها!!! )
و بنت تالتة كاتبة ( إمتى هيبقى معايا فلوس كتير أروح أعمل بيها شعرى و أروح لصالونات التجميل و ألبس أحسن موديلات و أسافر؟ )
و هنا تكمن المشكلة أن وسائل التواصل الإجتماعى غيرت كتير من تفكير الناس سواء بنات أو شباب
كل هدفهم جمع المال وإنفاقه علشان ألاقى السعادة اللى هى هتطلع فى الأخر مزيفة و فى الأخر أكتئب بقا بس المهم أتصور صور رهيبة وأنا بلف العالم بلبسى الشيك الماركة و أقول للناس أنا سعيدة وغنية و فوق الكل
لو بصينا للبنات على وجه الخصوص فى الموضوع ده هنلاقى البنات ( أغلبهم مش كلهم ) بداوا يحقروا من فكرة الزواج أساساً ( أنا هطبخ لواحد معرفوش) ( أنا لازم يبقى عندى شخصيتى المستقلة) ( أنا لازم أشتغل أحسن شغل ) ( لو زوجى زعلنى حتى لو حاجة بسيطة جداً مش هتناقش معاه لأ ، أنا هعيش بنت حرة و هتطلق!)
أكيد فى كتير مننا قابل الصنف ده من البنات ، المشكلة أن قدوتهم فى الحياه بيكونوا أصلاً بائسين وبيعانوا مر المعاناه بس لازم يمثلوا السعادة والناس بتصدق!!
و طبعاً أمثلة تانية كتير ولو جينا عدينا الأمثلة مش هنخلص الموضوع أبدا ً
اللى أنا عايزة أقوله بعد كل ده أن فكرة أن الناس تحط نفسها فى قالب مش بتاعها ده خرب كل شئ وخرب سلامهم النفسى
و أن خروجة بسيطة للمشى فى منطقة البيت مع شخص بحبه ( زوج ، أخ ، أم ، أب ، صديق ) أى حد بتكون أحسن من 100 سفرية
و ملابسى اللى فى الدولاب لو اهتميت بيها وعطرتها و كويتها وإهتميت بشكلى الخارجى فى حدود عدم البهرجة أحسن 100 مرة من ملابس ماركة غالية بتكلفنى فلوس كتير وبضغط على أهلى عشان أخد منهم فلوس و أشتريهم
و أكلة معمولة فى البيت أو حتى فى مطعم متوسط مع ناس بنحبهم فى يوم اجازة أحسن من المطاعم الفاخرة اللى بتضحك على الناس ( بالبرستيج ) علشان تاخد فلوسهم
و أن سفرية يوم أو يومين لإقرب منطقة فيها بحر ( الإسكندرية أو الإسماعيلية ) مثلاً أحسن من الضجر أن مفيش أماكن حلوة فى بلدنا و أن السفر بره هو الحل
و أن أما أقتنع بشكلى ووشى وجسمى مهما كان شكله و اكون فرحانة وواثقة فى نفسى أحسن ما أفكر إنى لو مغيرتش شكلى الناس مش هتحبنى و لازم أشترى مستحضرات تجميل غالية بشكل مبالغ فيه عشان شكلى يبقى كويس و أبدأ أحس بالرضا عن نفسى
بإختصار : البساطة و إنى اعيش فى حدود المتاح قدامى أياً كان كتير أو قليل هو سر السعادة و أن السعادة هى حاجات بسيطة بعملها و شعور داخلى بالرضا قبل أى حاجة

لو انتو من متابعين الدراما الكورية أو شفتوا بنت كورية هتلاقوا بشرتها نقية بشكل مش طبيعى كإنها زجاج
و هم فعلاً بيسموها البشرة الزجاجية
لكن إزاى بتكون عاملة كدة وخالية من أى شوائب و تجاعيد ؟ و كمان لامعة جداً !
بحثت كتير و عرفت و اتأكدت أن كل ده بسبب ماسك الأرز اللى بتستخدمه نساء آسيا بشكل يومى
لأن الأرز له فوائد كبيرة للبشرة بغض النظر عن فوائده عند الأكل
فالأرز يهدّئ البشرة من الالتهابات الجلديّة و يعمل الأرز كعامل مضاد للإلتهابات الجلديّة مثل تهيّج واحمرار البشرة سواء من خلال تناوله أو من خلال تطبيقه على البشرة
وتحارب مضادات الأكسدة الموجودة في الأرز الجذور الحرّة في الجسم وبالتالي تخفف من علامات الشيخوخة المبكرة كالتجاعيد والخطوط كما أنه يعالج مشكلة حَبّ الشّباب و يزيد من نضارة البشرة و يساعد على تبييض وتلطيف البشرة وتنعيمها يقشّر خلايا الجلد الميتة وبالتالي ينعكس على صفاء البشرة أيضاً
كما انه يحفّز إنتاج الكولاجين ويحسّن مرونة الجلد و يحافظ على رطوبة البشرة و يساعد على إغلاق المسامات حيث يحتوي على النشا الذي يمتص الزيت من البشرة وبالتالي يغلق المسامات

الوصفة

- كمية ربع كوب من الأرز عملت منها نوعين كريم يومى للبشرة ، و زى ما قلت قبل كدة أنى بميل للكريملت المصنوعة فى المنزل لأنها بتكون طبيعية و سعرها مناسب ومتاحة لكل البنات والنساء

١- نحضر ربع كوب من الأرز و كوب ونصف من الماء و نضعهم على نار هادئة ١٠ دقائق حتى الغليان
٢- بعد ذلك يصفى الأرز و نترك الماء جانباً فى إناء صغير حتى يبرد تماماً
٣- نضع الأرز المطهى فى الخلاط مع القليل من ماء الأرز و يضرب جيداً حتى نحصل على قوام الكريمة
٤- نقسم كريمة الأرز بالتساوى فى طبقين نظيفين
5- بالنسبة للطبق الأول الموجود به نصف كمية كريمة الأرزنضيف إليها ٤ ملاعق كبيرة جلسرين نباتى، ٢ ملعقة كبيرة زيت لوز حلو ، ملعقة كبيرة زيت فيتامين E او ما يعادل ٤ كبسولات فيتامين E ، ملعقة كبيرة من ماء الورد
٥- نخلط المكونات كلها معاً و نضعها فى علبة فى الثلاجة
يستخدم هذا الكريم مرتين فى اليوم نهاراً و ليلاً و ستحصلى على النتيجة بعد أسبوع من الإستخدام

أما بالنسبة للنصف الأخر من الكريمة فنضع عليها نفس المكونات السابقة و نضيف إليها ملعقة كبيرة من الكركم
ونضعها أيضاً فى علبة فى الثلاجة
وده موضوع كنت كتبته من قبل عن فوائد الكركم للبشرة اضغط هنا

مسلسل winter sonata أو أغانى الشتاء ، ده مسلسل تليفزيونى رومانسى درامى من كوريا الجنوبية
قبل ما أحكى تفاصيل زيادة عنه عايزة أقول أن ده أكتر مسلسل حبيته فى حياتى كلها ، أنا الحقيقة معرفش السبب لكن ده مسلسل بيلمس حاجة جوايا أنا مش عرفاها
أما بتفرج عليه بحس بمزيج من الحنين والحب والحزن ، و لازم أأكد أن ده أرقى مسلسل و أرقى قصة حب ممكن تتفرجوا عليها
والغريب اللى محدش يعرفه إنى بتفرج على المسلسل ده من أيام ما كان عمرى 8 سنوات بس !!!
المسلسل أتعرض لأول مرة فى 2002 و لازم كل سنة أتفرج عليه ولازم فى الشتاء
بقالى 19 سنة بتفرج عليه بدون ملل لأن زى ما قلت بيلمس حاجة جوايا مش قادرة أحددها لكن أقدر أوصفه بأنه حالة بعيشها أكتر من وصفه على انه مجرد مسلسل عادى

قصة المسلسل بدايتها واقعية جداً ، بتحكى عن مجموعة أصدقاء فى المدرسة الثانوية ( يوجين ‘ جون سانغ ‘ جين سوك ، يونج كوك ، شيارين ، سانغ هيوك )
بنشوف قصصهم فى المدرسة وهوايتهم و بنتعرف على كل واحد منهم أكتر لحد ما نعرف أن يوجين وجون سانغ بيحبوا بعض جداً على الرغم من أن جون سانغ يبدو عليه طالب قليل الكلام وغير مهتم بأى شئ ماعدا يوجين
قصة المسلسل من إسمه طبعاً بتدور فى الشتاء ، يوجين وجون سانغ هيخرجوا ويهربوا من المدرسة مرة و هيعرفوا بعض أكتر وهيلعبوا بالجليد ويركبوا العجل مما يثير غضب سانغ هيوك اللى هنلاحظ أنه هو كمان بيحب يوجين لكن هى مش بتحبه ، فتبدأ عداوات ومشاحنات بين سانغ هيوك وجون سانغ
لحد ما فى يوم يوجين هتروح المدرسة تلاقى الفصل كله وأصدقائها كلهم بيعيطوا وأما تسأل عن السبب تعرف أن جون سانغ مات فى حادث سير !!!                                                     
 هتصاب بحزن شديد لدرجة أنها مش هتعرف تبكى غير فى وقت متأخر من الصدمة
وتتوالى الأحداث لحد ما تظهر مفاجآت كتير على مدار ال 20 حلقة
هل هو مات فعلاً؟! هو هيموت فى تانى حلقة طب إيه اللى هيحصل بعد كدة؟!!!
أنصح بجد بمشاهدة المسلسل ده ومتابعة أحداثه وخصوصاً أنه مش طويل بس هى حالة بنعيشها مش مجرد أحداث
من كتر ما المسلسل عجب الناس وأخد جوائز كتير وقتها وأشتهر ، إتعمل ليوجين وجون سانغ تمثالين وهما سوا أيام ثانوى وتمثالين أما كبروا
كبروا إيه ؟!! مش بقول مات دلوقتى؟
لأ لازم تتفرجوا على المسلسل بقا :)
                                            

تمثالين ليهم و هما كبار فى المنطقة اللى اتقابلوا فيها فى المسلسل ومكتوب على الرخام قصة حبهم

تمثالين ليهم وهما صغيرين أيام ثانوى

صورة من المسلسل اللى على أساسه أتعمل التمثالين وهما صغيرين

طبعاً من أجمل الحاجات اللى فى المسلسل التراكات بتاعته
وده لينك التراكات للى حابب يسمعها :
1- ( cheoum ) كلمة كورية معناها المرة الأولى : اسمعها من هنا
2- ( love is blue ) : اسمعها من هنا
3- from the beginning until now : اسمعها من هنا
4- inside the memories : اسمعها من هنا
5- Don't forget : اسمعها من هنا
6- Star : اسمعها من هنا
7- Sparks : اسمعها من هنا
8- Still : اسمعها من هنا
9- Premonition : اسمعها من هنا
10 - white lovers : اسمعها من هنا
11 - Only you : اسمعها من هنا
12 - Violet : اسمعها من هنا
13 - (My memory (piano : اسمعها من هنا
14 - (My memory (violin : اسمعها من هنا
15-Goodbye my love : اسمعها من هنا
16- Memories under moonlight : اسمعها من هنا
17 - Missing you : اسمعها من هنا
18 - Tears in your Eyes : اسمعها من هنا
19 - The love i can not send :اسمعها من هنا
20 - The Beginning : اسمعها من هنا ( ده اول تراك فى أول مشهد فى أول حلقة )

حلقات المسلسل نفسه مترجمة من : هنا

           

حليب جوز الهند من المواد الرائعة اللى بحس أنها لازم تكون موجودة كدة فى البيت بشكل أساسى
لأن أنا بصراحة طبيعتى مش هخبى عليكوا بميل أكتر لمنتجات التجميل اللى بحضرها فى البيت لأنها بتكون أفيد للشعر والجسم والبشرة و فى نفس الوقت سعرها معتدل عن عبوات الكريمات المُصنعة واللى غالباً أصلاً بتدمر طبقة الجلد الرقيقة السطحية
حضرت قبل كدة حليب جوز الهند فى البيت وهكتب بالتفصيل عن طريقة تحضيره واستفدت منه إزاى

فوائد حليب جوز الهند :

- مفيد جداً جداً للشعر والبشرة و بما أنه مصنوع فى البيت فممكن الناس تشربه كمان لأنه خالى من المواد الحافظة ، لكن لو إشترينا حليب جوز الهند من السوق هنلاقى مكتوب عليه للشعر فقط أو بمعنى أصح للإستعمال الخارجى فقط
أو مسموح بتناوله و ده بيكون أنقى ومعمول للشرب

طريقة التحضير :

1- فى إناء عميق نضع كمية من جوز الهند المبشور ( من عند العطار )
2- نضع عليه كمية من الماء المغلى ( يكفى لغطية طبقة جوز الهند فى الإناء فقط و لن نحتاج الكثير من الماء )
3- نترك جوز الهند بالماء المغلى إلى أن يبرد تماماً
4- بعد التأكد من برودة الماء نفرك جوز الهند بداخل الماء لمدة 10 دقائق متواصلة
5- بعد 10 دقائق سنلاحظ أن جوز الهند حول الماء إلى لبن وكلما زاد فرك جوز الهند كلما اصبح اللبن كثيف القوام
6 - نحضر علبة زجاجية نظيفة وجافة و نستخدم المصفاه لإستخراج اللبن بدون حبيبات جوز الهند ونضعه فى العلبة
7- تترك العلبة فى الثلاجة

و نلاحظ حاجة مهمة جداً : يستحسن إستخدام كمية مناسبة من جوز الهند من البداية على أد الإستخدام لأن لو عملنا كمية كبيرة ومستخدمنهاش هتتعفن حتى لو كانت فى الثلاجة ، مش هتستمر فى الثلاجة لأكثر من 10 أيام فلازم أعمل كمية مناسبة بحيث تخلص بسرعة وأما أحتاج تانى أعمله أول بأول.

يستخدم لبن جوز الهند كبديل لحمام الكريم قبل غسل الشعر لأنه بيساعد على تقليل هيشان الشعر وبيخليه لامع جداً و صحى
أما بالنسبة للبشرة فوايده كتير جداً جداً
أولاً : الأحماض الدهنية اللى فيه بتساعد على ترطيب البشرة ، أنا مثلاً كنت بستخدمه كدهان للوجه واليدين قبل النوم لأنه بيخلى شكلها صحى وناعمة جداً
ثانياً : بيعالج حكة الجلد و بيعالج حروق الشمس كمان فممكن أستخدمه بعد ما أرجع من مشوار اتعرضت فيه لشمس جامدة مثلاً
ثالثاً : بيعالج قشرة الشعر مع الوقت لو إستخدمناه كبديل لحمام الكريم قبل غسل الشعر زى ما قلنا
رابعاً : مع إستخدامه المتكرر بيقلل تجاعيد البشرة بشكل ملحوظ
و كل ده من مادة طبيعية بعيداً عن أى كريم ممكن يحتوى على كورتيزون بيدمر الجسم

من هى إيمى هيتارى؟

عادة لما بدخل على النت مش بعطى أولوية كبيرة للفيس بوك ، لأن فى مواقع تانية كتير أحسن وأفيد
لكن طبعاً بشوف الفيس بوك بشكل سريع عشان أتواصل مع صحابى و كنوع من التغيير
طيب إيه أفضل المواقع اللى بزورها ومين البلوجرز اللى بتابعهم؟
هتكلم عن كل حاجة بحبها فى النت بالتفصيل وهحط لينكات المواقع دى كمان
ملحوظة : هتكلم عن المواقع بشكل عشوائى مش بالترتيب من الأحسن للأسوأ لأن كلهم ممتازين

1- موقع إدراك

- موقع ممتاز للتعلم والثقافة باللغة العربية ، فى الموقع ده هتلاقوا كورسات فى كل المجالات عن طريق متخصصين بيشرحوا بهدوء وتركيز
التسجيل فى إدراك مجانى ومش بيحتاج أى حاجة غير إنى أعمل أكونت فيه بس واختار الكورس اللى أنا عيزاه وببدأ فوراً أشغل الفيديوهات عشان أتعلم ، والفيديوهات بتكون مقسمة على اسابيع طويلة أو قصيرة حسب منهج الكورس وفى نهاية كل محاضرة بيكون فى مناقشة بين المُعلم والمُتعلمين عن المنهج المشروح و كمان بتعرف منه إمتى معاد المحاضرة الجاية
وفى نهاية الكورس بتاخد شهادة بإسمك اللى سجلت الدخول به للموقع ( إسم الأكونت )
الموقع ده تابع لمؤسسة الملكة رانيا ملكة الأردن وكان هدفها السامى أنها تنشر الثقافة والعلم باللغة العربية لكل المجتمع العربى بسهولة وعن طريق النت.
اللينك : هنا

2- Pinterest- موقع متخصص فى جمع كل الصور من الإنترنت ووضعها فى مكان واحد
الموقع ده معروف جدا طبعاً ومُلهم جداً ، ممكن أخد منه أفكار لشغلى أو أفكار حول أى حاجة وطبعاً بمجرد ما بضغط على أى صورة فيه بيوصلنى للموقع الأصلى اللى نزلت فيه الصورة دى وده كمان مفيد فى إنه بيعرفنى على مواقع جديدة.
و بمجرد ما بعمل أكونت على الموقع وبهتم بنوع معين من الصور ببحث عنها ، الموقع بيجبلى بشكل تلقائى كل الصور من نفس النوع ده من غير ما أطلب
اللينك : هنا

3- Egybest

- طبعاً من أشهر المواقع وخصوصاً بين فئة الشباب ، لأن من خلال الموقع ده أقدر أتفرج على أى فيلم أو مسلسل وأحمله على جهازى بسهولة ، و طبعا Egybest غنى عن التعريف
اللينك : هنا

5- youtube

- اليوتيوب عموماً أنا بحبه جداً لكن مش كل القنوات تستحق المشاهدة ، فى قنوات بيكون هدفها ربح مال وخلاص بدون تقديم أى محتوى مفيد فعلشان كدة أنا هكتب عن القنوات اللى بتابعها فيه بس :

-الجانب المشرق : القناه دى جميلة جداً على اليوتيوب و رمزها مصباح أصفر اللون ، وهى متنوعة جداً بتتكلم عن حاجات عاة زى أغرب 10 أماكن ، وصفات للبشرة ، نصائح للعمل المثمر
حاجات ملهاش علاقة ببعض لكن بيربطها أنها بتُقدم بأسلوب بسيط ورسومات بتشد العين وبطريقة بسيطة و ممتعة ومش هتملوا منها ابداً.
اللينك : هنا

-honeykii : دى قناه للطبخ الكورى ، الحقيقة القناه دى بحبها بشكل رهيب رغم أنها بسيطة جداً و رغم كمان إن مش من هوايتى قنوات الطبخ خالص
لكن القناه دى بالذات فيها شئ بيشد لأن عمرى ما شفت شكل المٌقدمة ولا سمعت صوتها لأنها بتصور إيديها بس وهى بتطبخ و المقادير بتكون مكتوبة على الجنب فى الشاشة وهى بتطبخها مع صوت موسيقى هادية فى الخلفية أحياناً
القناه دى بالذات مفيدة ومش مملة وبتقدم وصفات حلويات و شوربات وأكل كورى رائع ( جربت منه وصفة )
اللينك : هنا

- Alaa Ghabour : بحب قناه آلاء غبور جداً لأن البنت دى هادية ومش بتستعرض وبتلهمنى كتير بطريقة فكيرها وكلامها وأحلامها ، بحب أتفرج على نشاطتها اليومية وبستفاد منها حاجات وهى الفلوجر العربية المصرية الوحيدة اللى معتدلة وكويسة فى رأيى.
اللينك: هنا

- 5 minute Crafts : القناه دى معروفة نوعاً ما وموجودة على إنستجرام كمان ، بتقدم فيديوهات عن إزاى أعيد إستخدام حاجات قديمة عندى وأحولها لحاجات مفيدة جداً وبنكون محتاجينها بجد ، أو إزاى أصلح حاجة مكسورة أو مقطوعة عندى أو أجدد أى حاجة قديمة بستخدمها ، قناه مفيدة جداً وتستحق المشاهدة
اللينك : هنا

- محمود فضل : قناه رائعة جداً ، عبارة عن شاب مصرى وهو أصغر مؤذن فى الحرم المكى وبيقرأ قرآن بصوته و بيقول إبتهالات جميلة
اللينك : هنا

- Planetnihon : لو بتحب اليابان و مهتم تعرف كتير عن الثقافة اليابانية بعيون مصرية فقناه اليوتيوب دى بتحكى عن سيدة إسمها ميج مصرية ومتزوجة من يابانى والقناه بتاعتها بتحكى عن حياتها فى اليابان و عادات اليابانيين وأكلاتهم ولغتهم
اللينك هنا

- كوريا بالعربى : أما بقى لو بتحب كوريا و بردو عايز تعرف عن عادات الشعب الكورى و حياتهم و آرائهم و أكلاتهم بعيون مصرية بردو هتلاقى القناه دى ظريفة جداً بتاعة رجل مصرى متزوج من كوريا وبينقل عن الحياه هناك و عادات الشعب الكورى و تعاملهم معاه
اللينك : هنا

مفيش فى بالى حاجة تانية دلوقتى لأن دى الحاجات اللى بتابعها لكن الموضوع ده قابل للتجديد ، وإذا عرفت حاجة تانية أكيد هكتب عنها

و بعد كدة ابدأ أتخيل صورة إيجابية عن نفسى ، أنا شكلى كذا و لابسة كذا وشعرى شكله كذا . أتخيل كل حاجة عن الصورة اللى نفسى أكون عليها
حتى أتخيل المكان اللى انا فيه مع إستمرار الشهيق والزفير بشكل متوازن وببطئ.
فى البداية ممكن أزهق بسرعة أو أحس بالملل وأن ده كله كلام فاضى و أقوم بسرعة لكن مع الوقت هحس بثبات وقلة تشتيت و سلام نفسى وصفاء ذهن كبيرين

نصائح عن ممارسة التأمل :

1- يستحسن إرتداء ملابس واسعة ومريحة
2- يفضل تعطير المكان بعود بخور ( إختيارى )
3- ( للبنات ) بلا ش يكون شعرى مشدود زيادة عن اللزوم
4- دى حاجة بردو إختيارية لكن أنا بحب أعملها ، بسمع موسيقى خاصة بالتأمل من ابلكيشن عندى على الموبايل إسمه Meditation Music و دى صورته

                                                                       

النهاردة هكتب عن أفضل وصفة للعناية بالبشرة ، حقيقى النتيجة بتاعتها رائعة رغم غرابتها شوية لكن مفيدة جدا

المكونات :

1- من أى محل مقلاه نجيب ب 2 جنيه حمص
2- ازازة زيت جوز هند الكابتن
3- ب 3 جنيه كركم

الطريقة :

1- فى اناء يتم وضع كمية الحمص كلها ثم يضاف إليه الكركم
2- تخلط المكونات الجافة معا
3- يتم إضافة زيت جوز الهند بالتدريج حتى يتشكل سائل مثل قوام العسل
4- تفرد العجينة على الوجه والبشرة عموما وتترك حتى تجف تماما
5- لإزالة الخليط من على الوجه يفرك برفق بحركات دائرية
6- نغسل الوجه بماء دافئ اولا ثم ماء بارد

ملحوظة : يجب إضافة زيت جوز الهند بالتدريج حتى لا تصبح العجينة سائلة جدا او صلبة جدا
                                                                 

فوائد الكركم للبشرة :
1- يفيد الكركم في إزالة الخلايا الميّتة عن البشرة، من خلال التقشير
2- يفيد في التخلّص من مشكلة حب الشباب وذلك لاحتوائه على مواد مضادة للالتهابات والبكتيريا، ممّا يخلص الوجه من مشكلة احمرار البشرة الناتج عن الالتهابات في الوجه
3- يساعد الكركم في تسريع شفاء حروق الوجه

فوائد زيت جوز الهند للبشرة :

حاولت بمناسبة الإمتحانات الأيام دى أجمع بعض نصائح جربتها وقت ما كنت بدرس فى المدرسة والجامعة ونجحت معايا جداً وحصلت بسببها تقديرات عالية 
قبل أى شئ لازم أوضح أن مفيش حاجة إسمها فهم وحفظ و فكرة أن الفهم للمواد العلمية والحفظ للمواد الأدبية
كل شئ بنفهمه لازم بشكل ا نحفظه علشان نعرف نجاوب فى الإمتحانات
طب ليه الفهم لوحده مش كفاية؟
- لأنى ببساطة ممكن أكون فاهمة مبدأ حل مسألة معينة فى الفيزيا أو الكيميا أو الهندسة مثلاً لكن ناسية قوانينهم و فى الحالة دى الفهم ملوش معنى لأن لازم يتم حفظ بعض القوانين و المعلومات عشان أتذكرها فى الإمتحان

1- لازم تنام كويس بالليل وتصحى بدرى تذاكر مش العكس
لأن دى فطرة الإنسان ، لكن للأسف كتير من الطلاب بيسهروا بالليل للمذاكرة ويقاوموا النعاس بأكواب من النسكافيه والقهوة و ده كمان غلط لأنه مع الوقت بيدمر الجهاز العصبى ، ده غير أن الدراسات أثبتت أن الطالب بيحتاج من 6 ل 8 ساعات نوم يومياً لتجديد بناء الجسم وتنظيم إفراز الهرمونات و التقليل من الإصابة بأمراض جسمية ونفسية
فالحل الأمثل تغيير روتين النوم والصحيان .

النهاردة حابة أتكلم عن المنتجات اللى بستخدمها للعناية بالبشرة والشعر على طول و ممتازين معايا.
وبصراحة أنا من الناس اللى مش بتحب تستخدم أدوات التجميل 24 ساعة كدة ولا المكياج على طول كمان
فهتلاقوا الحاجات قليلة جدا بس مفيدة وكافية اوى.
أولاً أنا بحب أجرب فى نفسى الأول قبل ما أنصح أى حد بأى حاجة عشان أكون متأكدة ان المنتجات دى كويسة ومش بتأذى البشرة والشعر
وكمان الميزة فى المنتجات دى أنها مش غالية وبتقعد كتير جداً معايا و زى ما قلت قبل كدة مش بستخدمها كتير أساساً

1- غسول الوجه إيفا : الغسول ده رااائع جدا و بينور البشرة حرفياً و بيخليها ناعمة وريحته جميلة كمان
و بستخدمه مرة الصبح ومرة بالليل بس
بدهن الغسول على وشى و بدلك الوجه بحركات دائرية لحد ما ينشف خالص وبعد كدة بغسله بمايه فاترة وبعد كدة ماية ساقعة وبس.

2- ثانى حاجة ماية الورد وسعرها رخيص بس المهم أنها تُشترى من الصيدلية مش من العطار لأن ماء الورد اللى عند العطار مش طبية وبتستخدم فى صنع الحلويات
أما ماء الورد من الصيدلية فبتكون طبية و معمولة للبشرة
بجيب قطن واحط عليه ماية ورد وادلك بيها الوجه كله و بستخدمها قبل النوم فقط وبعد الغسول .

 3- زبد الكاكاو الوردى : بستخدم ماركة أماندا وهى مناسبة جداً وبحطه وأنا خارجة لأنه بيعطى لون الوردى الفااتح جداً وبيعطى لمعة خفيفة ومناسبة جدااما بالنسبة للروج فأنا مش بستخدم روج نهائى.

4- ده بقا الكحل بتاعى إسمه ( كحل أسود هاشمى ) هتلاقى مكتوب عليه صنع فى باكستان وهو عبارة عن علبة كحل بودرة وليها زى عصاية كدة بنغمسها فى البودرة وبنكحل بيها العين.
أنا متعودة عليه أكتر من القلم بكتير وبحب لونه الأسود القوى لأنه عامل زى الفحم كدة و بيقعد سنة لو هتحطى منه كل يوم وب 10 جنيه بس.
العلبة المزخرفة اللى جنبه دى بفضى فيها علبة الكحل علشان عاجبنى شكلها بس لكن ممكن نكتفى بعلبة الكحل الذهبى نفسها
بشتريه من مرسى مطروح مرة فى السنة.

5- زيت ترشوب : الزيت ده للشعر وبحبه جداااا ، بيتقل الشعر وبيطوله فى وقت قياسى وبستخدمه 3 مرات فى الأسبوع بس
هو ده الوحيد اللى غالى من ضمن الحاجات اللى بستخدمها ، حوالى ب 50 جنيه
لكن بيفيد الشعر وطبيعى و ريحته عاملة زى الأعشاب القوية كدة
و بالنسبة للعناية بشعرى فى الصيف والشتاء عشان هو موضوع طويل فأنا كتبت عنه بالتفصيل قبل كدة :

تجربتى الشخصية فى العناية بالشعر ( إضغطى هنا )

دى كل الحاجات اللى بستخدمها فعلاً مش أكتر من كدة ، لا روج ولا كريم أساس ولا بودر ولا بلاشر و لا أى حاجة تانية وبنصح أى بنت متستخدمش حاجات كتير لأن كل الحاجات دى بتسد مسام البشرة وبتخليها تصفر وتطلع لها حبوب ( مهما كانت الماركات عالمية )