الموضوع ده كان فى قائمة الحاجات اللى عايزة أكتب عنها من فترة طويلة بس حاسة أن المفروض ده وقتها
رغم إنى هتكلم عن حاجة مهمة كل الناس محتاجاها طول العمر وملهاش وقت معين ، وحتى أنا بحتاجها فى أغلب الوقت
إيه اللى بيخليك تمضى فى حياتك وإنت سعيد أو راضى ؟ أو بمعنى أخر إيه هدفك فى الحياه؟
كل الناس عندها مسؤوليات يومية بتاخد كل وقتها تقريبا سواء مذاكرة أو عمل أو إهتمام بأطفال أو إهتمام بمشروع أو اياً كان
و بالرغم من أن فى ناس كتير مدركة حجم وأهمية المسؤولية وتأقلموا عليها كإسلوب حياه إلا أنهم بيواجهوا من وقت للتانى سؤال أنا عايش ليه؟ أو إيه الهدف من الحياه؟
وبيصابوا بإحباط شديد وملل من الروتين والضغوط ( أنا نفسى ممكن يحصلى كدة ساعات )
طيب إيه الحل لحاجة زى كدة؟
الحل قريب وموجود لكن الناس مش شيفاه لبساطته الشديدة وهو أن يكون عندك هدف حقيقى تسعى له بجد بجانب مسؤوليات الحياه ومشاغلها
يعنى ممكن أكون بشتغل كل يوم بس فى ساعة واحدة بخصصها وبتعلم فيها هواية معينة بحبها ومش لازم حتى كل يوم
ومش لازم الحاجة اللى هخصصلها وقت دى تكون حاجة بالغة الأهمية أو هتفيدنى حتى بعد كدة بأى شكل لكن فى حاجات الواحد ممكن يعملها بس للمتعة أو للشعور بالرضى والسعادة ، حاجة أكسر بيها الروتين اليومى والواجبات اللى عليا
ممكن أتعلم أى حاجة بحبها من الإنترنت و أكون جادة فى تعليمها
بستغرب من الناس اللى لحد دلوقتى بتقول لازم أسافر و بتعلق حياتها كلها على السفر و إلا مش هنجح ومش هيبقى لى هواية ولا هكتشف العالم !!!
لأن ببساطة الإنترنت النهاردة موفر دروس فى كل مجالات الحياه تقريبا و معلومات عن كل حاجة
أنا شخصياً إتعلمت كتير من الإنترنت و بحثت كتير فيه
أمثلة : ممكن تتعلم الطبخ ، فيديو مُلهم أستفاد منه حاجة ، تتعلم لغة جديدة ، تتعلم الرسم ، أتعلم عن فرع من فروع العلوم أو الأدب لو أنا بحب حاجة زى كدة ، فى ناس هوايتها أنها تصور بس أو تتفرج على صور
ممكن تنظم خروجة كويسة ومش مكلفة فى نهاية كل إسبوع مع اسرتك لأى مكان ، أو لو مفيش وقت ممكن تتمشى فى اى مكان فى المنطقة اللى ساكن فيها لمجرد تغيير الجو بس
أحيانأً الإلهام بييجى من أبسط الأشياء أة إنك تعمل حاجة بالصدفة متكونش قاصدها بس تكتشف أنها شغفك فى الحياه و تمثلك شئ كبير بعد كدة
طيب إحنا مش بنعمل الحاجات دى؟
صدقونى الموضوع كله محتاج تنظيم وقت مش أكتر ، أخصص لنفسى وقت يكون ليا انا بس و أعمل فيه أى حاجة بحبها ، حاجة بتحسسنى إنى منتعشة كل يوم ومبسوطة وعندى حماس أكمل هوايتى اللى بدأتها و أكمل حياتى بشكل عام
بس بشرط إنى أفكر فى أفكار إيجابية بس ، ولو فشلت فى تحقيق هواية بحبها أحاول تانى أو أجرب حاجة تانية
بإختصار عيشوا الحاجة اللى تحسسكم بالأمل والسعادة و هتنعكس على حياتكم كلها بالإيجابية والنشاط ، و وقتها المسؤوليات اليومية هتكون أبسط وأخف بكتير
لو مهتمين تقرأوا عن إزاى تحبوا نفسكم ، اقرأوا الموضوع ده : اضغط هنا

موضوع النهاردة اللى حابة اتكلم فيه هو عن حب النفس
ليه أنت لازم تحب نفسك وإزاى أصلا تحب نفسك؟
الموضوع ده للشباب والبنات على حد سواء لأن فوائد إن الإنسان يحب نفسه ويقدرها بتنعكس بشكل عام على حياته كلها وخطوات مستقبله
ليه لازم أحب نفسى؟
لأن ببساطة أنا مش هقدر أحب أى حاجة موجودة حولى ولا أحب أى شخص إلا لما أحب نفسى الأول بالقدر المناسب اللى مش بيوصل لحد الغرور
لما الإنسان يحب نفسه داخلياً وخارجياً ويقدرها هيقدر يوصل للشخص اللى قدامه رسائل إيجابيه غير مرئية هتخلى الشخص ده كمان يحبه ويحترمه ويثق فيه
و دايماً نخلى المقولة دى قدام عنينا ( راقب أفكارك لأنها تتحول إلى كلمات و كلماتك ستتحول إلى أفعال و أفعالك ستتحول إلى عادات وهذة العادات ستشكل شخصيتك و شخصيتك ستحدد وجهتك فى هذا العالم )
من الصعب جداً إنى أكون كارهه نفسى ومستنية الكون يعطينى كل الترددات الإيجابية و الأيام الجميلة من غير ما أكون بحب نفسى فى الأول وراضية عنها و كمان من الصعب إنى أقول أنا قررت إنى هحب نفسى وأفضل أنتقد نفسى فى كل صغيرة وكبيرة وطول الوقت و ألوم نفسى على حاجات قديمة عملتها أياً كانت
لازم يكون فى بداية أوقف فيها أى كلام سلبى بقوله لنفسى أو بتلقاه من الخارج من شخص تانى لأن ده هيتحدد عليه مصيرى بالكامل زى ما قلت

إزاى أحب نفسى؟
لو أنا إقتنعت بفكرة إن لازم احب نفسى و أن ده مترتب عليه حاجات إيجابية كتير بعد كدة فى حياتى ، فهلاقى 100 طريقة أقدر أحب بيها نفسى سواء مادياً أو معنوياً
أنا هحاول أقترح بعض الأفكار اللى جت فى بالى و لو عندكم أى أفكار تانية ضيفوها فى التعليقات أسفل الموضوع وأنا هقرأ كل حاجة

1- خصص يوم أجازتك لإسترخاء دماغك قبل أى شئ ، لأن فى ناس متخيلة أن يوم الإجازة يعنى بس نوم أو لعب أو أى حاجة فيها راحة ( بدنية ) فى حين أن حتى لو أخدت قسط من الراحة للجسم ، ذهنك بيكون مشغول بأفكار لا حصر لها من خوف من المستقبل لمشاكل الشغل او المذاكرة أو الأسرة
لكن من المهم أنى أخلى عقلى كمان ياخد راحة من أى تفكير وأبعد عن أى أفكار سلبية.
يعنى مثلاً ممكن للحظات أتخيل الحياه اللى نفسى فيها فى المستقبل أو أجيب نوتة و أكتب فيها أهدافى لمدة شهر أو سنة ( نفسى أعمل إيه خلال السنة دى )
إكتبوا كل حاجة حتى لو حاجات صغيرة وبسيطة جداً

2- بالنسبة للبنات ممكن يوم الراحة ده أبسط نفسى فيه بأبسط الطرق زى مثلاً إنى ألبس لبس بحبه أو اعمل تسريحة شعر بحبها ، أعمل روتين للعناية بشعرى وبشرتى ، آكل أكلة بحبها
الحاجات دى هتخلى عندك حب لنفسك وخوف عليها أكتر و بتحسن المزاج جداً بس عدوك الوحيد هو الكسل و الأفكار السلبية فلازم تتغلبى عليه

3- إتفرج على فيديو جميل على اليوتيوب أو أدخل على موقع مٌلهم فى النت ، أحياناً لو شوفت فيديو فيه رحلة شخص لمكان معين بتحبه أو فيديو عن رياضة بتحبها أو أى موضوع بتحبه بيحسن المزاج جداً وبيعطى طاقة داخلية للإنسان وممكن جداً يلهمه بأفكار ميتوقعهاش ابداً وده حصل معايا شخصياً

4- من المهم جداً أن تدرك ان مفيش حد كامل ، لأ أنا مش قصدى أنك تعرف انا بقول ( أن تدرك ) لأن إدراك الشئ أعمق من فهمه لأنه بيكون إقتناع بالفكرة ، ومعنى أن مفيش حد كامل يعنى كل إنسان له مميزات وعيوب و أن مينفعش أقارن نفسى بحد ابداً حتى لو شخص أعرفه أو شخصية عامة لأن كل واحد فى الكون ده مميز بطريقته وله إهتمامات و آراء مختلفة ومش من الضرورى أن يكون فى حد اسوأ أو أحسن من حد لكن الإختلاف ده فى حد ذاته موجود من قديم الأزل
و  خصوصاً الناس اللى بتقارن نفسها بشخصيات عامة بنشوفها على وسائل التواصل الإجتماعى ( شكلها أحلى منى ، معاه فلوس أكتر منى ) و هكذا
الناس بتحب تظهر فى وسائل التواصل الإجتماعى قدام الناس بأفضل شكل ممكن و بعد مجهود كبير من ترتيب الكلام والمظهر و كنت إتكلمت عن الموضوع ده بالتفصيل قبل كدة ، اللى حابب يقرأه ( اضغط هنا )

5- أدرك جيداً أن إحنا فى مجتمع كبير فى ناس مختلفة وكل واحد له مميزات وعيوب معينة ، إحنا مش فى مسابقة تنافسية عشان أتفوق على حد فى شئ ، إحنا فى مجتمع بنتعايش كلنا مع بعض بمميزاتنا وعيوبنا

6- احضر نوتة و سجل فيها قائمة بمميزاتك كلها و مهاراتك وهواياتك اللى أنت بارع فيها ، ولو مش عارف توصف نفسك كويس ، اسأل فرد من العائلة أو صديق عن مميزاتك لأن غالباً الناس المقربة هتشوفك بنظرة موضوعية أكتر من نفسك
إكتب أهم مميزاتك و إزاى ممكن تطورها عشان تكون أفضل
و قائمة تانية إكتب فيها عيوبك و كل عيب منهم كبير وواضح ولا صغير و إزاى تتغلب عليه بهدوء و إنت بتحب نفسك مش و إنت كارهها و بدون توجيه لوم أو رسائل سلبية لنفسك

7- إبعد تماماً عن الأغانى الحزينة لأنها للأسف أصبحت موضة بين الناس أنهم يسمعوا أغانى توصف حالتهم وغدر أصدقائهم وهجر أحبائهم وهكذا
أنا فى رأيى الشخصى أن الأغانى دى بتوصف المشكلة لكن مش بتحلها
لكن أنا محتاج الحل ، ومحتاج اقرأ مثلاً قرآن لأنه فيه كل الحلول و أسمع أحياناً موسيقى هادية تهدى الأعصاب

8- إبعد عن الناس السلبية اللى زى ما بنقول عليهم ( مش بيعجبهم العجب ) الناس دى بتهدم كل شئ جميل ويستحسن الإبتعاد عنهم وعدم التأثر بهم على الإطلاق

9- الصلاة ثم الصلاة ، فكرة أن الإنسان يؤدى كل الفروض اللى ربنا كتبها علينا بتعطى إحساس بالراحة النفسية وصفاء الذهن و القلب و هتكون خالى من الهموم و مرتاح البال

عيد ميلادى ال 24 هو عيد الميلاد الوحيد اللى  مكنتش مخططاله ابدا
و إكتشفت أن المفاجئات أجمل شئ فى الدنيا و مش كل حاجة لازم نخططلها علشان تكون جميلة
أجمل حاجة حسيتها فى عيد ميلادى ده إن كل اصدقائى كانوا فاكرين اليوم من اول الشهر وكانوا مستنيين يبعتولى
ومنهم اللى كلمنى الساعى 12 بالليل أول ما بدأ يوم 25 ديسمبر بالضبط
و دى بالنسبة لى كانت أحلى حاجة أن صحابى يكونوا فاكرين عيد ميلادى أحلى 100 مرة من أى هدايا

سهرت من الساعة 12 أول ما بدأ يوم ميلادى لحد الساعة 1 و 25 دقيقة كنت برد على رسائل التهنئة بتاعة صحابى و فرحت بيها جداً

فى يوم عيد ميلادى نفسه صحابى كانوا خارجين و أنا مكنتش خارجة أساساً بس روحت لهم مفاجأة
إتنين منهم كانوا عارفين والباقى مش عارف

أكلنا أكل صينى وكان أول مرة بالنسبة لى أتذوقه و عجبنى جداً
إتصورنا كتير و شربنا عصائر حلوة و إتصورنا جنب شجر الكريسماس اللى زين مول سيتى ستارز فى كل مكان


ضحكنا و إتكلمنا فى كل حاجة تقريبا و كان يوم رائع بحق و أجمل وأبسط عيد ميلاد مريت بيه
صحيح كان فى ناس توقعت بشكل أو بآخر يكلمونى أو يهتموا بس خلاص محدش إهتم

من ضمن الحاجات اللى عملتها النهاردة لأول مرة كمان غير الطعام الصينى ، إستكشفت متجر virgin mega store لأول مرة وإنبهرت بإسطوانات أغانى تخيلت أنها خلاص مبقتش تتصنع لكن لقيتها و مجموعة كتب رائعة لهارى بوتر وألعاب لهارى بوتر سعرها غالى جداً لكن شكلها مميز وعجبنى
كمان فى ركن للناس تعزف فيه الموسيقى على آلات موجودة هناك بيانو و طبول و جيتار و مجموعة من النوت Note جميلة جداً و عجبنى أكتر من شكل وخصوصاً واحدة لونها بنى مرسوم عليها شعار برج الجدى
مكنتش عايزة أخرج من المحل من جمال المنتجات اللى فيه لحد ما روحت فى نهاية اليوم

كتير بنلاقى فيديوهات بتعجبنا فى اليوتيوب وبنكون مش عارفين نحملها إزاى ولا منين و لو حطيناها فى قائمة الحفظ بننساها خالص، أنا متعودة دايما أحمل الفيديوهات من الويتيوب من لينك معين هقولكم عليه و حبيت أفيد الناس بردو بالموضوع ده

طريقة تحميل فيديو من اليوتيوب

1- الأول إدخل على اللينك ده : اضغط هنا
2- الينك لو مش شغال عندكم هتبحثوا فى جوجل اكتبوا ( Video Converter ) و هتختاروا youtube converter
3- بعد كدة هتلاقوا مكان تضعوا فيه لينك الفيديو المراد تحميله أيا كان لكن الأهم إنه يكون من اليوتيوب
4- هتلاقوا تحت مكان اللينك مكان تانى تختاروا فيه صيغة تحويل الفيديو ، يعنى مثلاً عايزينه صوت بس تختاروا Mp3 أو فيديو تختاروا Mp4
5- اضغط على Start
6- الفيديو هيتحول فى خلال دقيقة للصيغة اللى إنتم عايزينها و بعد كدة إضغطوا على Download

رأس السنة قربت جداً خلاص و أكيد فى ناس مش هتعرف تسافر أو هيقعدوا فى البيت ويخصصوا وقت لمشاهدة أفلام ظريفة فى البيت
أنا هقترح عليكم بعض الأفلام الجميلة الكوميدية والدرامية و اللى فيها أمل جديد عشان أنا شيفاها مناسبة للسنة الجديدة

1- The princess switch

- ده فيلم أمريكى لسة شيفاه قريب جداً لإنه لسة جديد 2018 .. الفيلم كله بيحكى عن قصة فتاتين مختلفتين تماماً فى مركزهم الإجتماعى و لكنهم نسخة طبق الأصل من بعض فى الشبه
يا ترى إيه اللى هيحصل لهم؟
الفيلم أحداثة كلها بتدور فى آخر أيام السنة وسط الجليد وأجواء الإحتفال بالكريسماس

2- Happy new year

- طبعاً من إسمه باين إنه بيتكلم كمان على نهايات السنة لكن ده فيلم هندى و كوميدى جداً إتعمل سنة 2014 و دخلته فى السينما و لحد دلوقتى بحبه و بتفرج عليه
بيحكى الفيلم عن رجل إسمه تشارلى جمع اصدقاؤه من أجل الإنتقام لوالده
يا ترى إيه اللى هيحصل؟ الفيلم كوميدى أكشن و مبهج جداً

3- Queen

- ده فيلم هندى درامى بحبه جداً جداً ، أحداثه مش فى نهاية السنة ولا حاجة و ملوش علاقة بالشتاء لكنه بيعطى أمل فى الحياه رهيب و بيعطى الثقة لأى حد بيشوفه علشان كدة حسيت إنه مناسب لنهاية السنة لأن ده الوقت اللى بناخد فيه قرارات جديدة فى حياتنا غالباً
و ده اللى عملته البطلة بالضبط البنت رانى تركها حبيبها قبل الزفاف بيوم لإنه عديم المسؤولية و انهارت البنت بسبب كلام الناس عنها بعد ترتيبات الفرح إنه هيتلغى ببساطة
يا ترى عملت إيه؟

4- Home alone

- الفيلم غنى عن التعريف طبعاً ، من أجمل أفلام رأس السنة بأجزاؤه التلاته ، كل بيتكلم عن قصة الولد كيفين اللى إتعرض لمهاجمه من لصين فى منزله ولكنه قرر محاربتهم لوحده
الفيلم كله بيحكى عن أجواء الشتاء والكريسماس و مناسب للوقت ده جداً

5- Polar Express

- فيلم الأنميشن المفضل عندى ، معرفش إذا فى ناس كتير إتفرجت عليه لكنه فيلم انميشن خيالى بيحكى عن ولد مش مؤمن بوجود سانتا كلوز الحقيقى لحد ما يقابله فعلاً فى مغامرة سفر فريدة من نوعها بقطار متجه للقطب الشمالى مع أغراب

6- Harry Potter

- من الأفلام الغنية عن التعريف طبعاً كمان ، الجزء الأول بس من هارى بوتر ( هارى بوتر وحجر الفيلسوف ) هو اللى فيه أجواء الكريسماس لكن بصفة عامة سلسلة أفلام هارى بوتر كلها من أجمل الأفلام اللى شوفتها فى حياتى و بحس أنها مناسبة لو قضيت أيام فى البيت فى الشتاء لأنها بتاخدنا لعالم تانى

7- While you were sleeping

- فيلم امريكى بردو فى أجواء رأس السنة بيحكى عن بنت شغالة فى محطة القطار و كل يوم بتشوف شاب بيقطع تذكرة منها و بيروح الشغل و هى بتحبه بس مش بتقول الكلام ده
و فى مرة هتنقذ حياته فى المحطة بعد ما وقع أمام القطار ، يا ترى إيه اللى هيحصل؟ هتقوله إنها بتحبه؟
فيلم قديم بس رائع جداً رومانسى و درامى

أما لو حابين تتفرجوا على مسلسل صغير درامى رومانسى و أحداثه فى الشتاء بردو فإتفرجوا على Winter Sonata
و ده اللينك اللى إتكلمت فيه عن تفاصيل المسلسل قبل كدة للى مشافهوش : إضغط هنا
دى كل الأفلام اللى اعرفها بتدور فى الإطار ده
لو عندكم افلام تانية أو إقتراحات تانية إكتبوها فى تعليق هنا داخل الموضوع 

إترددت كتير قبل ما أكتب عن الموضوع ده لأن إجابة سؤال ( ليه الناس أصبحت مكتئبة؟ ) إجابته كبيرة ومحتاجة كلام كتير جداً
لكن أنا قررت إنى أجاوب على السؤال ده بالنسبة للمصريين والعرب
لكن معلش إستحملونى أنا هتكلم باللهجة العامية مش باللغة العربية عشان الموضوع يوصل بشكل أسهل
ليه كتير جداً من المصريين والعرب اصبحوا مصابين بالإكتئاب أو حتى بلادة الشعور والضيق أغلب الوقت؟
لو سألت أى حد سؤال زى ده هيجاوب فوراً أنه بسبب غلاء الأسعار وضيق المعيشة لكن الحقيقة فى وجهه نظرى أن مش ده السبب الوحيد لحالة الكآبه السائدة الأيام دى
فى حاجات بنعملها فى حياتنا اليومية بتأثر علينا بشكل سلبى جداً من غير ما ناخد بالنا من الموضوع ده
رقم واحد : السوشيال ميديا
خلينى أكون صريحة ، أنا نفسى لما بسمع كلام سلبى من حد عن الحياه والمعيشة بتضايق وببقى مش عايزة أتكلم مع الشخص السلبى ده تانى حتى لو كان أقرب الأصدقاء ليا
لو بصينا على الفيس بوك مثلا هنلاقى أن كتير من المنشورات المكتوبة فيها بؤس و حزن وبتتكلم عن أن الحياه صعبة وأن الواحد مبقاش عارف يعيش لدرجة أن فى الفترة الأخيرة إنتشرت صور لناس من أيام أجدادنا مثلا وهم عايشين حياه رايقة و هادية بعيداً عن هموم الوقت الحالى اللى الناس كلها حاسة بيها
رغم أن العالم كله بيعانى من غلاء الأسعار ومشاكل فى تدبير الأمور المالية وحتى أيام أجدادنا كانوا بيعانوا من غلاء الأسعار وده شئ ممكن تتأكدوا منه يا إما من حكايات الأجداد أو من الأفلام القديمة
طيب لو طول الوقت الناس بتعانى من غلاء الأسعار و ضيق المعيشة فى بعض الوقت ، فين المشكلة؟ ليه إحنا مش عايشين بروقان زى الناس بتاعه زمان ؟ إيه الفرق وإيه علاقة السوشيال ميديا بالموضوع أصلاً؟
مشكلة السوشيال ميديا ( اللى مكنتش موجودة زمان ) أن الناس بتقضى وقت طويل عليها فى ايام الأجازات ووقت الفراغ وأحياناً وقت طويل جداً زيادة عن اللزوم
طول الوقت ده من الأشياء اللى بتخلى أى إنسان ينسحب بالتدريج من الحياه الإجتماعية الأسرية أو الأصدقاء و بيبدأ يتسلى بوحدته ويقتنع بيها و بينسحب من الحياه الإجتماعية عن قصد
ده مع الوقت بيخلق شعور بالوحدة النفسية ، حتى لو بعد كدة الشخص ده خرج مع أصدقاؤه وأقاربه مش بيكون سعيد لأنه سبق و كون لنفسه عالم منعزل تماماً ، بيسعد بيه بالأول لكن بعد كدة العزلة دى بتتحول لإكتئاب
و تانى شئ وسائل التواصل الإجتماعى بتعطى شعور كامل بالزيف ، لأنى ممكن اقرأ أخبار مزيفة عن ناس أعرفها و أكون متأكدة أنها مش حقيقية و الهدف من الأخبار المزيفة غالباً الإستعراض و جمع اكبر عدد من المعجبين .
النقطة اللى بعد كدة مفيش ناس كتير فكرت فيها لكن لازم اقولها لإنى لاحظتها بشكل واضح الفترة الأخيرة والموضوع بدأ يزيد لحد مرعب.
إيه هى؟
وسائل التواصل الإجتماعى سواء الفيس بوك أو إنستجرام وبالذات الأخير ده لأنه كله عبارة عن صور وضعوا قوالب محددة للسعادة وحولوا أبسط مسببات السعادة لأشياء معقدة جداً جداً
فاللى بيحصل إن الناس صدقت قوالب السعادة المزيفة دى و بتحاول لحد النهاردة تحط نفسها جواها علشان تلاقى السعادة على أساس ان كل ده حقيقى
فاللى بيحصل حاجة من الإتنين :
1- يا إما الناس بتقلد اللى بتشوفه بالحرف ومش بتلاقى السعادة فى الأخر لأنها زى ما قلت مزيفة ومش من جواهم و بيكتئبوا
2- يا إما الناس بتحاول توصل للى بتشوفه على وسائل التواصل الإجتماعى و مش بتعرف فبالتالى بيكتئبوا
و علشان اوضح أكتر هكتب أمثلة كتير عن الموضوع ده عشان أقدر اوصل الصورة كاملة
أول مثال : إنتشر على الفيس بوك مؤخراً مقولة ( سافر فأنت لست شجرة )
مش كل الناس معاها الفلوس الكفاية أنها تسافر و ده مش شئ ضرورى بحيث أنه يكون من حقوق الإنسان ، السفر للسياحة فى الأول وفى الأخر رفاهيه مش كل الناس تقدر عليها إلا اللى يملكوا المال والوقت الكافى لده
لكن بما أن الناس وخصوصاً الشباب وضعوه جزء من قالب السعادة المزيف ، فبنلاقى فجأة الناس كلها عايزة تسافر بل وتهاجر بل وتغير جنسيتها كمان!!!!
الثقافة دى مكنتش موجودة زمان نهائى و زى ما قلت السفر من عيب ولا حاجة لكن هو رفاهيه مش كل الناس تقدر عليها و مش من الصح ان الناس اللى ضعيفة الإيمان فى نفسها و قليلة الثقة يشعروا بالإكتئاب لمجرد انهم مش عارفين يسافروا مثلاً
طيب وسائل التواصل الإجتماعى بتعمل إيه؟
بتنشر أجمل صور فى العالم للسفر والمسافرين والمدونين المشهورين وهم فى اماكن مشهورة و بصراحة الموضوع أصبح إستعراض أكثر منه شعور بالسعادة ، إستعراض للملابس والفلوس والإمكانيات كإن لسان حالهم يقول ( شوفوا انا بعمل إيه )
والله أعلم إذا كانوا هم اصلا اقصد المدونين المشهورين سعداء ولا لأ؟!
تانى مثال : الناس اللى عايزة تستعرض بس مش هينفع تسافر تعمل إيه؟!
تستعرض بلبسها و كل حاجة ماركة عندها حتى لو أكل والله!!
بيفضلوا يتصوروا وبردو وسائل التواصل الإجتماعى بتنشر صور الماركات بتاعة الملابس وأشهر المطاعم و ده بنفس الطريقة بينعكس على الناس اللى مش هتقدر تشترى ملابس أو إكسسوار او أى حاجة ماركة بالإكتئاب ( أنا مش عارف أحقق الكلام ده) ( الناس دى أغنياء ) ( انا ليه مش معايا فلوس زيهم؟)
وخصوصاً البنات والنساء صغيرات السن يعنى أكتر ناس بتتأثر.
من كام يوم كلمتنى بنت قريبتى وصديقتى جداً و كانت مكتئبة ومتضايقة وأنا مستحملتش أسمع صوتها كدة فى التليفون فكلمتها و لقيتها بتعانى من نفس الحاجات بالضبط!!
هى مقالتش أنا مكتئبة عشان كذا لأ ، هى مكنتش عارفة مالها بالضبط بس لما إتكلمنا سوا توصلت إنها عايزة تخلص الكلية بسرعة علشان تبدأ تشتغل بسرعة و تكون فلوس بسرعة وأنها لو معملتش كدة هتحس بعدم تقدير من الناس و أن ملهاش لازمة فى الحياه خالص و ده للأسف تفكير بنات كتير جداً.
كانت نصيحتى ليها متخليش الطموح الزيادة عن اللزوم و جرى الناس على الوضع الإجتماعى العالى يضايقك ويحسسك بعدم الرضا
إعملى اللى بتحبيه وبس ، الحاجة اللى تخليكى سعيدة و تكونى مرتاحة فيها سواء الناس حست إنك عملتى إنجاز او لا دى مش مشكلتهم أصلاً
و كمان قولتلها إنى كان ممكن أكون دكتورة وكان سهل جداً أشتغل على ده لإنى درست علم النفس وكان ممكن أدرس بطريقة ما طب نفسى ويقولوا الدكتورة راحت والدكتورة جت لكن أما قررت إنى مش هشتغل فى مجال دراستى كان لسببين:
أولا : و ده الأهم أنا مش مقتنعة بأغلب اللى درسته فى علم النفس أصلاً ( قولوا عليا مجنونة أو لأ بس فى حاجات مش منطقية وأنا مش هعمل حاجة أنا مش مقتنعة بيها )
ثانياً :لو إخترت إنى مشتغلش فى مستشفى نفسى و قررت أعلم لطلبة الجامعة وأكون دكتورة جامعية ، هعطى للطلبة نفس المعلومات العجوزة الغير منطقية اللى أنا مش مقتنعة بيها بردو و فى الحالتين أنا مش هكون سعيدة.
علشان كدة انا مكنش مهم عندى كلام الناس ( حد يسيب لقب دكتورة و يشتغل حاجة تانية؟!) آه أنا !!!

- لقيت مرة فى جروب بنات على الفيس بوك ، كان فى بنت معرفهاش كاتبة ( إمتى بقا هيبقى ليا الكارير بتاعى وأكون مبالغ كبيرة و أعيش حياتى بيها ؟ ) و بنت تانية بتقول ( أنا مش هتجوز وبتقول للإمهات كلهن متجوزوش بناتكن علشان مينفعش البنت يكون أخرها راجل تطبخله وتستناه يرجع من الشغل ، لكن المفروض تسيبيها تعتمد على نفسها وتسافر و تكون فلوس و تعيش بيها!!! )
و بنت تالتة كاتبة ( إمتى هيبقى معايا فلوس كتير أروح أعمل بيها شعرى و أروح لصالونات التجميل و ألبس أحسن موديلات و أسافر؟ )
و هنا تكمن المشكلة أن وسائل التواصل الإجتماعى غيرت كتير من تفكير الناس سواء بنات أو شباب
كل هدفهم جمع المال وإنفاقه علشان ألاقى السعادة اللى هى هتطلع فى الأخر مزيفة و فى الأخر أكتئب بقا بس المهم أتصور صور رهيبة وأنا بلف العالم بلبسى الشيك الماركة و أقول للناس أنا سعيدة وغنية و فوق الكل
لو بصينا للبنات على وجه الخصوص فى الموضوع ده هنلاقى البنات ( أغلبهم مش كلهم ) بداوا يحقروا من فكرة الزواج أساساً ( أنا هطبخ لواحد معرفوش) ( أنا لازم يبقى عندى شخصيتى المستقلة) ( أنا لازم أشتغل أحسن شغل ) ( لو زوجى زعلنى حتى لو حاجة بسيطة جداً مش هتناقش معاه لأ ، أنا هعيش بنت حرة و هتطلق!)
أكيد فى كتير مننا قابل الصنف ده من البنات ، المشكلة أن قدوتهم فى الحياه بيكونوا أصلاً بائسين وبيعانوا مر المعاناه بس لازم يمثلوا السعادة والناس بتصدق!!
و طبعاً أمثلة تانية كتير ولو جينا عدينا الأمثلة مش هنخلص الموضوع أبدا ً
اللى أنا عايزة أقوله بعد كل ده أن فكرة أن الناس تحط نفسها فى قالب مش بتاعها ده خرب كل شئ وخرب سلامهم النفسى
و أن خروجة بسيطة للمشى فى منطقة البيت مع شخص بحبه ( زوج ، أخ ، أم ، أب ، صديق ) أى حد بتكون أحسن من 100 سفرية
و ملابسى اللى فى الدولاب لو اهتميت بيها وعطرتها و كويتها وإهتميت بشكلى الخارجى فى حدود عدم البهرجة أحسن 100 مرة من ملابس ماركة غالية بتكلفنى فلوس كتير وبضغط على أهلى عشان أخد منهم فلوس و أشتريهم
و أكلة معمولة فى البيت أو حتى فى مطعم متوسط مع ناس بنحبهم فى يوم اجازة أحسن من المطاعم الفاخرة اللى بتضحك على الناس ( بالبرستيج ) علشان تاخد فلوسهم
و أن سفرية يوم أو يومين لإقرب منطقة فيها بحر ( الإسكندرية أو الإسماعيلية ) مثلاً أحسن من الضجر أن مفيش أماكن حلوة فى بلدنا و أن السفر بره هو الحل
و أن أما أقتنع بشكلى ووشى وجسمى مهما كان شكله و اكون فرحانة وواثقة فى نفسى أحسن ما أفكر إنى لو مغيرتش شكلى الناس مش هتحبنى و لازم أشترى مستحضرات تجميل غالية بشكل مبالغ فيه عشان شكلى يبقى كويس و أبدأ أحس بالرضا عن نفسى
بإختصار : البساطة و إنى اعيش فى حدود المتاح قدامى أياً كان كتير أو قليل هو سر السعادة و أن السعادة هى حاجات بسيطة بعملها و شعور داخلى بالرضا قبل أى حاجة

لو انتو من متابعين الدراما الكورية أو شفتوا بنت كورية هتلاقوا بشرتها نقية بشكل مش طبيعى كإنها زجاج
و هم فعلاً بيسموها البشرة الزجاجية
لكن إزاى بتكون عاملة كدة وخالية من أى شوائب و تجاعيد ؟ و كمان لامعة جداً !
بحثت كتير و عرفت و اتأكدت أن كل ده بسبب ماسك الأرز اللى بتستخدمه نساء آسيا بشكل يومى
لأن الأرز له فوائد كبيرة للبشرة بغض النظر عن فوائده عند الأكل
فالأرز يهدّئ البشرة من الالتهابات الجلديّة و يعمل الأرز كعامل مضاد للإلتهابات الجلديّة مثل تهيّج واحمرار البشرة سواء من خلال تناوله أو من خلال تطبيقه على البشرة
وتحارب مضادات الأكسدة الموجودة في الأرز الجذور الحرّة في الجسم وبالتالي تخفف من علامات الشيخوخة المبكرة كالتجاعيد والخطوط كما أنه يعالج مشكلة حَبّ الشّباب و يزيد من نضارة البشرة و يساعد على تبييض وتلطيف البشرة وتنعيمها يقشّر خلايا الجلد الميتة وبالتالي ينعكس على صفاء البشرة أيضاً
كما انه يحفّز إنتاج الكولاجين ويحسّن مرونة الجلد و يحافظ على رطوبة البشرة و يساعد على إغلاق المسامات حيث يحتوي على النشا الذي يمتص الزيت من البشرة وبالتالي يغلق المسامات

الوصفة

- كمية ربع كوب من الأرز عملت منها نوعين كريم يومى للبشرة ، و زى ما قلت قبل كدة أنى بميل للكريملت المصنوعة فى المنزل لأنها بتكون طبيعية و سعرها مناسب ومتاحة لكل البنات والنساء

١- نحضر ربع كوب من الأرز و كوب ونصف من الماء و نضعهم على نار هادئة ١٠ دقائق حتى الغليان
٢- بعد ذلك يصفى الأرز و نترك الماء جانباً فى إناء صغير حتى يبرد تماماً
٣- نضع الأرز المطهى فى الخلاط مع القليل من ماء الأرز و يضرب جيداً حتى نحصل على قوام الكريمة
٤- نقسم كريمة الأرز بالتساوى فى طبقين نظيفين
5- بالنسبة للطبق الأول الموجود به نصف كمية كريمة الأرزنضيف إليها ٤ ملاعق كبيرة جلسرين نباتى، ٢ ملعقة كبيرة زيت لوز حلو ، ملعقة كبيرة زيت فيتامين E او ما يعادل ٤ كبسولات فيتامين E ، ملعقة كبيرة من ماء الورد
٥- نخلط المكونات كلها معاً و نضعها فى علبة فى الثلاجة
يستخدم هذا الكريم مرتين فى اليوم نهاراً و ليلاً و ستحصلى على النتيجة بعد أسبوع من الإستخدام

أما بالنسبة للنصف الأخر من الكريمة فنضع عليها نفس المكونات السابقة و نضيف إليها ملعقة كبيرة من الكركم
ونضعها أيضاً فى علبة فى الثلاجة
وده موضوع كنت كتبته من قبل عن فوائد الكركم للبشرة اضغط هنا