2nd Chance أو فرصة ثانية
الفيلم بيحكى عن مدربة جمباز للبنات و لكنها تركت الجمباز منذ فترة طويلة
تطلب منها صديقتها الأكبر سنا ان تقوم بتدريب بنات تحت سن ١٢ سنة و تقبل المدربة الشابة بعد إلحاح
ليكتشف الجميع بعد فترة سر اعتزالها الجمباز و اكتفائها بالتدريب فقط
و تقوم بتعليم البنات الصغار درساً لن ينسوه
فيلم جميل  يستحق المشاهدة

يمكن دى أول مرة أتكلم فيها عن تجربة شخصية أو حاجة إتعلمتها بس أنا حسيت أنها مفيدة وإنى إتعلمت منها كتير فعلشان كدة حبيت أشاركها مع كل شخص هيقرأها
الموضوع كله بدأ بعد ما إتخرجت من الكلية ، بما إنى خريجة قسم علم النفس فكنت بفكر طول سنين الجامعة أشتغل ايه أما اتخرج و اشتغل فين
و كنت شبه مقررة إنى أتلقى تدريب فى مستشفى نفسى و أصبح أخصائية نفسية كخطوة أولى و مكنتش محددة إذا أنا عايزة أكمل ماجستير و دكتوراه ولا لأ بعد كدة
لكن يكفى إنى أخد لقب اخصائية نفسية و الناس تقول عليا يا دكتورة هالة
نظرة إحترام و لقب كبير مكنتش متخيلاه و مكنش فى بالى لأنى أخترت المواد الأدبية فى ثانوى و كان بالنسبة لى كلمة دكتورة مستحيلة لأنى كنت بفكر على أنها تقال لطبيب فقط
نظرتى للحياه إتغيرت كلها أخر سنة فى الكلية ، مش هنكر إنى مريت بفترة عصيبة جداً كنت بعانى من إكتئاب بدون سبب
حسيت إنى مش لاقية طريقى و مش هلاقيه لأن فى آخر سنة فى الكلية وبعد كل التعب والأبحاث دى قررت إنى مش هشتغل فى علم النفس
فى آخر سنة فى الكلية واجهت المعنى الحقيقى للأخصائية النفسية ، عمل مٌرهق نفسياً و بدنياً لأقصى حد على الأقل بالنسبة لى أنا.
أكتشفت إنى مينفعش ببساطة أقضى ساعات طويلة فى مستشفى الأمراض العقلية والنفسية مع ناس بتعانى من بؤس و جنون و أرجع بيتى فى نهاية اليوم ببساطة أبتسم فى وش عائلتى و أحضر أكل بحبه فى المطبخ و أضحك قدام مسلسل أو فيلم ظريف و أقدم دعم معنوى لصاحبى و أسرتى بعد كل ده
أكتشفت أن الأخصائية النفسية شغل بيستنزف طاقة مش طبيعية منى و المطلوب إنى أرجع بيتى أكمل ببساطة حياتى و يمكن أقابل مشكلات حياتية تانية بعيداً عن ضغوط الشغل!!
كنت مذهولة بشكل لا يصدق أخر سنة فى الكلية بعد ما عرفت كل ده و للأسف التدريبات العملية فى المستشفى موجودة فى آخر سنة بس و أول ثلاث سنوات فى الكلية كلهم نظرى بس.
و المشكلة الأكبر اللى بلوم عليها الكلية و المنهج أنهم مهتموش بوضع برنامج تأهيل للطلاب والطالبات للتعامل مع الحالات العقلية والنفسية دى .
الموضوع بالنسبة لهم كان بسيط ( بكرة فى تدريب فى المستشفى و انتهى الأمر!!! احضروا فى الموعد !!)
فكرت مع نفسى ليه دخلت القسم ده من الأول؟ مجموعى كان كويس بحيث أنه يسمحلى بأكتر من إختيار!!
لو كنت عرفت كدة من الأول مكنتش فكرت فى القسم ده أصلاً.
أتذكر فى أخر يوم ليا فى تدريب المستشفى خرجت كنت لوحدى و كنت بعيط و مش عايزة حد فى الشارع ينتبه ليا ، و للمرة الأولى قررت إنى مش هرجع البيت على طول بعد ما خلصت رغم إن دى مش عادتى
روحت على وسط المدينة والدنيا بدأت تمطر جامد سيول والجو كان بارد جداً و مع ذلك فضلت أمشى مسافة طويلة و كلمت ماما فى التليفون وخرج منى الكلام بشكل غريب ( ماما ، أنا مش هكمل فى علم النفس )
و هى مكنش عندها أى مشكلة فى الموضوع ده و كانت دايما ً و لحد النهاردة بتشجعنى على أى حاجة عيزاها طالما مش حرام
فى الوقت ده أنا افتكرت إن الكلمات دى خرجت منى عشان مضغوطة و محتاجة تدريب على التعامل مع الحالات الصعبة فى المستشفى مش أكتر ، لكن كان قرار صارم وواضح و بالفعل لحد اليوم ده مش ندمانة نهائى على إنى تركت المجال ده

إحتمال يكون ده السبب الرئيسى اللى خلانى أعانى من الإكتئاب فى أخر سنة فى الكلية ، كان شعور سيئ جداً و عمرى ما فكرت إنى هحس بالإحساس الرهيب من الضعف و البعد عن الحياه بالطريقة دى
لحد ما فى مرة كنت بتصفح مجلة بتعلم تفصيل الأزياء و اتعلمت منها كتير ، كنت عارفة المجلة دى من زمان بس مفكرتش اتعمق فيها
بعدها فكرت إنى أفصل لنفسى ملابس و خصوصاً أن والدتى بتعرف تفصل الملابس بإحتراف فتعلمت منها و من المجلة و ده اللى خلانى النهاردة بعد 3 سنين من التخرج أشتغل فى تصميم الأزياء معاها
اتأكدت بعدها إن لقب دكتورة مش هو أهم حاجة فى العالم ولا إنى أكمل فى نفس اللى بدأته هو المهم
المهم إنى أعمل الحاجة اللى بتخلينى سعيدة و بتدينى إلهام مستمر. الحاجة اللى بتخلينى أفكر فيها و أنا سعيدة واللى مش بتستنزف كل طاقتى 

من الأفلام الجميلة جداً اللى شوفتها أمس فيلم The Nutcracker and the Four Realms
الفيلم ده رغم أن فى ناس كتير بتنتقض خياله الواسع إلا أن فى رأيى الخيال الواسع مطلوب فى بعض الأحيان علشان نخرج من دايرة الواقع و نحصل على الإلهام لأى شئ
الفيلم بيحكى عن أسرة مكونة من أب أرمل و بنتيه و إبنه الصغير يعيشون حياه هادئة وكان فى بنت من الإتنين مولعة بقوانين الفيزياء
لحد ما جت ليلة الكريسماس و وزع الأب هدايا على أطفال الثلاثة واللى تركتها الأم فى وصيتها للأبناء و لكن هدية الإبنه ( كلارا ) كانت مختلفة وغامضة جداً و لا تعرف سبيل لحلها
لحد ما تلاقى عراب و بتسأله أنه يساعدها وبالفعل بيساعدها لفك لغز الهدية لتجد ( كلاارا ) نفسها فى عالم خفى و مختلف تماماً عن عالمها
يا ترى هتعمل إيه؟!
الفيلم مناسب للأطفال والبنات و محبين الخيال الجميل

فيلم full out من الأفلام الدرامية اللى غالب عليها طابع رياضى
الفيلم إتعمل فى كندا سنة 2015 و بيحكى عن قصة حقيقية لبطلة جمباز امريكية إسمها ( أريانا برلين ) واللى كانت بطلة جمباز معروفة بأدائها الممتاز و صديقتها ( إيلا ) اللى بتلعب معاها الجمباز بردو
استعدت البنتين للمنافسة فى الألعاب الأوليمبية كفريق واحد إلا أن القدر جاء على عكس ما تمنت ( أريانا ) لأنها تعرضت لحادث سيارة شديد كادت أن تفقد حياتها
ونصحها الطبيب أن تترك الجمباز تماماً إلا أن إصرارها تخطى الواقع الصعب و كملت طريقها بتشجيع أصدقائها و إرادتها القوية لتكمل المشوار اللى بدأته
الفيلم رائع و مؤثر جداً و ينفع لسهرة البنات كمان
و أجمل حاجة فى الفيلم أن القصة دى حقيقية و البطلة موجودة بالفعل بنفس الإسم الحقيقى و ده اللى بيلهم أى حد بيتفرج عليه أن المستحيل ممكن ومش مجرد فيلم خيالى و مُبالغ فيه 

معرض الكتاب بيقام كل سنة فى القاهرة والسنة دى بنحتفل بمرور 50 سنة على المعرض منذ بدايته
لكن السنة دى كان فى مفاجأة ( مش جميلة جداً ) وهى أن معرض الكتاب اتنقل مكانه من أرض المعارض للتجمع الخامس
أنا فكرت فى البداية أن المواصلات هتكون بعيدة جداً على أغلب الناس لكن الحكومة وفرت أتوبيسات من و إلى المعرض ومكنش فى أى مشاكل خالص فى الموضوع ده
لكن الشئ اللى معجبنيش السنة دى هو أن المعرض فقد روحه بشكل كلى!!
أنا كنت بروح المعرض كل سنة بإنتظام لأنى بحب القراءة بطبيعة الحال و أما روحت السنة دى حسيت إنى فىمكان مختلف وحسيت إنى لازم أمشى كمان وبسرعة !!
أولاً : الكتب أسعارها غالية جداً ( كل انواع الكتب سواء للأطفال أو الكبار أو ألعاب تنمية مهارات الأطفال )
ثانياً : المعرض زى ما قلت فقد روحه تماماً ، المكان أبعد ما يكون عن أن الواحد يألفه
مكان موجود فى صحراء بالمعنى الحرفى للكلمة ، المكان مبنى ضخم على طراز حديث وجميل لكن بلا روح تماماً
أول ما تدخل المعرض بتلاقى طابور كبير و طويل على كل صالة أو قاعة داخل المعرض و أذكر أنهم كانوا 4 صالات ضخمة
المكان من الداخل أقرب لمكتبة جامعة مهمة ، أرفف و كتب ليس إلا !!
فى الأول كانت كل دار نشر لها خيمة و بيعرضوا الكتب بطريقة جميلة جداً ، ده غير أن ما بين كل خيمة والتانية فى طرقات واسعة بنتحرك فيها بحرية لكن المسافات بين كل دار نشر والتانية فى معرض الكتاب الجديد ضيقة جداً و بتخنق!
حتى معرض الكتاب القديم كان مليان ألعاب لتسلية الأطفال و حدائق و كل ده مٌفتقد تماماً فى المعرض الجديد
مجرد مكان بارد بلا روح زى مكتبة جامعة ارفف وعليها كتب
أنا اتصدمت لأن معرض الكتاب بالنسبة لى حاجة بستناها كل سنة بفارغ الصبر ، و نفسى معرض الكتاب القديم يرجع 

لمن لا يعرف إيمى هيتارى هى مطربة شابة يمنية تمتاز أغنياتها بالبساطة والبراءة ، كما تتميز أغنياتها كلها بأنها باللغة العربية الفصحى مما يضيف لها جو ساحر و راقِ
سبق و أن كتبت عنها : إيمى هيتارى