كيفية العناية بالشعر المموج؟ (الكيرلى)
Hala Loly
يونيو 18, 2019
0 Comments
قبل ما اتكلم عن العناية بالشعر الكيرلى
حابة أوضح فكرة أن الشعر الكيرلى مش شعر بايظ لأن للأسف أغلب البنات اللى شعرهن كيرلى شايفين أن دى طبيعة سيئة جداً للشعر و المفروض انه يتفرد عشان يبقى كويس و بعدين تتعامل معاه و تغذيه و تطوله على هذا الأساس
يعنى فكرة بعض البنات عن الشعر الكيرلى أن ده مش شعر أساساً
لازم نفرده الأول و بعدين نشوف نهتم بيه إزاى
و طبعا الكلام ده كله غلط و بيدمر الشعر
الشعر الكيرلى ده طبيعة شعر خاصة الناس بتتولد بيها و لازم يتعاملوا مع شعرهم على الأساس ده زى الناس اللى طبيعة شعرها أصلا مفرود
طيب ليه الناس بتحب تفرده؟
ده ناتج عن قلة وعى الناس بالشعر الكيرلى و أن معايير الجمال فى الشرق الأوسط أن البنت يكون شعرها مفرود و غير كدة يبقى مش حلو ، و طبعاً فى كمية تنمر بنتعرضلها كبنات شعرنا كيرلى زى إنتى شعرك منكوش ، و يا حرام اهتمى بيه او اكويه لكن الموضوع ده لحسن الحظ بدأ يختفى تدريجياً
إزاى نهتم بالشعر الكيرلى؟
أولا : بالنسبة لغسل الشعر ده يستحسن يتغسل 3 مرات فى الأسبوع على أقصى حد ، لأن الزيوت الطبيعية اللى بتنتجها فروة الرأس بتتأثر و بتضيع بكتر غسيل الشعر
ثانياً : الشعر الكيرلى لو هتمشطيه ، لازم يكون مبلل مش جاف لأنه لو إتمشط و هو جاف هيتقطع و أطرافه هتهيش جداً و مع الوقت هيبقى كابوس
ثالثاً: اما تيجيى تعملى تسريحة لشعرك لازم يكون مش مشدود نهائى عشان ده مش هيفرده لأ هو هيبوظه أكتر و ممكن شعرك ينحل كمان
رابعاً : الزيوت مهمة جداً و مفيدة للشعر سواء مفرود أو كيرلى أو دهنى أو جاف ، على عكس المعتقد أن الشعر الدهنى مينفعش يتحطله زيوت
بالعكس تماماً ، الزيوت بتطول الشعر و تغذيه و خصوصا زيت الزيتون و جوز الهند ، و لو زيوت جاهزة من محل ففى ماركات زى تريشوب و زيت كيشور و زيت البرهان ممتازين
بس لو هتجيبى زيت البرهان هاتى لتكثيف الشعر مش لفرده طبعا !
خامساً : بلاش تكوى شعرك مهما حصل لأن الكيرلى هيبوظ و من كتر المكوى مش هيحصل لا مفرود و لاكيرلى ، هيكون شعر هايش بس
سادساً : من أفضل الكريمات اللى ممكن نستخدمها للشعر الكيرلى ، كريم لوفا و حمام كريم ترشوب
ممكن الإتنين نستخدمهم كدهان للشعر و ممكن كحمام كريم مرتين فى الأسبوع
