*ايه هو العلاج بالطاقة؟- مبدأيا لازم نكون عارفين أن جسمنا المادى ده بيحيط به جسم تانى طاقى .. الجسم الطاقى ده بيتأثر بأى ضغوط أو طاقة سلبية حواليه و بالتالى بيأثر فى الجسم المادى ... لذلك بنلاقى كتير من الدراسات الحديثة بتؤكد أن الأمراض اللى بيعانى منها الإنسان سواء بسيطة زى دور البرد أو الصداع أو الأمراض الشديدة زى أنواع السرطانات بتكون نتيجة ضغوط كبيرة جدا الإنسان بيتعرض لها و بيفشل فى التعامل معاها... و كل ما تكون طاقة الإنسان كبيرة كفاية كل ما ده هيقوى جسمه الطاقى و المادى و بيعطى له مناعة لمقاومة الأمراض... و علشان كدة العلاج بالطاقة مش بس وسيلة للعلاج و لكنه كمان وسيلة لتقوية المناعة و منع حدوث المرض من الأساس... يعنى العلاج بالطاقة مفيد للمرضى و غير المرضى
*ازاى العلاج بالطاقة بيتم؟
-بشكل أساسى فى سبع مراكز للطاقة فى الجسم و مراكز أخرى فرعية ، و لكن المراكز السبعة الرئيسية هى اللى بتغذى أعضاء الجسم كلها
المراكز السبعة دول لو فى أى مركز منهم الطاقة مش متدفقة فيه بشكل صحيح ده بيجلب المرض
الأمر أشبه بنهر جارٍ و الماية متدفقة فيه... لو جه جذع شجرة كبير سد مجرى النهر ايه اللى هيحصل؟
الماية مش هتدفق بشكل سليم من الجهة الأخرى للنهر
ده اللى بيحصل بالضبط في جسم الإنسان ... عشان كدة و ظيفتى كمعالجة بالطاقة أنى اتأكد أن مراكز الطاقة كلها شغالة كويس و الطاقة متدفقة فيها بشكل سليم و لو فى مركز فيه عطل فى تدفق الطاقة بيتم علاجه
*طيب المعالج بيعرف منين أنهى مركز طاقة فى الجسم اللى مش شغال بشكل سليم؟
ده بنعرفه أما بندرس العلاج بالطاقة بشكل متعمق ... و لكن خليني أقولك أن كل مركز من المراكز السبعة الرئيسية مسؤول عن صحة جزء فى جسم الإنسان ... مثلا فى مركز طاقة فى القلب .. فلو العميل بيعانى من حزن أو صدمة فى حياته أو اكتئاب فده معناه أن مركز القلب مش شغال بشكل سليم و من هنا بنبدأ نشخص و نعالج
*ليه العلاج هنا بيتم عن بعد و ازاى اصلا؟
- لأن ده شئ عملى جدا للعميل و المعالج... بمعنى كل واحد بيكون قاعد فى بيته و مش شرط يتقابلوا لو المسافة بينهم بعيدة مثلا
و بيتم عمل جلسة عن بعد بنفس الطريقة اللى بتتم بيها الجلسة بشكل مباشر لو العميل قدامى
*طيب ازاى الطاقة بتوصل رغم المسافة دى كلها؟
- ببساطة... كلنا متصلين ببعض عن طريق الجسم الطاقى بتاع كوكب الأرض.. و ده بيخلى كل الناس اللى عايشة على الأرض متصلين ببعض و ده بيسمح بنقل الطاقة بينهم بسهولة
فالعلاج عن بعد بيتنقل من المعالج للعميل لو كل واحد فى بيته حتى لو فى مدينة تانية أو بلد تانية خالص لأننا طاقيًا متصلين ببعض.
ليست هناك تعليقات:
إرسال تعليق